1 Ahitofeli kamulongela Abisalomu, "Nilekele nisagule wanhu 12,000, nimsondelele Daudi ichilo chino. 2 Nizamtowa kuno kalegela na kufa moyo na nizamtenda yadumbe na wanhu wake wose wezakimbila. Nizamkoma mfalume muhala, 3 na kuwabweleza wanhu wose kumwako, fana viya mhambe viyobwela ukaye kwa mulumake. Weye kouzahila ugima wa munhu imwe muhala na wanhu wamwenga wezakuwa na tindiwalo." 4 Mbuli ino ya Ahitofeli imnogeza Abisalomu na walala wose wa Isilaili.

5 Maabaho Abisalomu kalonga, "Lelo mtange Hushai Mwaliki muladi chimtegeleze choyolonda kulonga." 6 Hushai viyafikile, Abisalomu kamulongela, "Dino niijo gesa da Ahitofeli doyaching'hile, vino cholondeka chidisondelele? One siivo, uchilongele mbuli ya kutenda."

7 Hushai kamwidika Abisalomu, "Mbuli yailongile Ahitofeli hainogile." 8 Hushai kamulongela, "Weye kovimanya kuwa tati yako na wanhu wake ni magalu na wana ludoko fana dubu zike muichuwala yoyahokigwe wanage. Kufosa yayo, kwaviya tati yako ni galu wa ng'hondo, hezakala hamwe na watowang'hondo wake ichilo. 9 Mbaka sambi kaifisa muna idituka hebu hanhu hamwenga ha kuifisa. Munhu yoyose imwenga yondayahulike kukomigwa kwa wanhu muna umwanduso wa ng'hondo, kezalonga kuwa ukomaji ulawilila muna dibumbila da Abisalomu. 10 Wanhu wose wahahulika ivo, hata waja wanhu wako magalu weli na mizoyo igangamale fana simba, wezalipuka moyo kwa kudumba. Mana Waisilaili wose wavimanya kuwa tati yako galu na wose weli hamwe nayo magalu. 11 Lelo niye nogesa, uwakunzagize Waisilaili wose kulawa mwanduso wa isi uko Dani mbaka uhelelo wa isi uko Belisheba, wawe wengi fana msanga wa bahali. Weye mwenyewo uhite kuing'hondo. 12 Cheye chizamuhitila Daudi hanhu hohose hondayapatike. Chizamzamhila fana viya tungwe vidigwa muna iisi na kugubika chila chinhu. Habule munhu yondayasigale mgima, yeye mwenyewo hebu wanhu wake weli hamwe nayo. 13 One yahakimbilila bululu dimwenga, Waisilaili wose wezagala nzabi na kukwega mabwe ya mhongono ya bululu ijo mbaka kuna dikolongo. Habule chinhu chochose chondachisigale, hata dibwe dodo da bululu ijo."

14 Abisalomu hamwe na wanhu wose wa Isilaili walonga, "Gesa da Hushai Mwaliki dinoga kufosa gesa da Ahitofeli." Wadilema gesa da Ahitofeli kwaviya Mndewa Mulungu kailunga kudilema gesa dinogile da Ahitofeli muladi yadahe kumgalila Abisalomu ifa.

15 Hushai kawalongela Sadoki na Abiasali wakulu wa nhambiko, "Ahitofeli kawalongela Abisalomu na walala wa Isilaili viya va kutenda, niye niwalongela wawo kutenda vinhu vimwenga. 16 Galeni usenga himahima na mulongeleni Daudi, ‘Ichilo sekeugone kuna iviloko va kuichuwala, mbali hita bila kuswela muladi mfalume na wanhu wake sekewakomigwe.’ "

17 Yonasani na Ahimaasi wakala wogozela kuna inzasa ya Eni Logeli. Msang'hani imwe wa chike wa Sadoki na Abiasali kawagalila usenga uwo Yonasani na Ahimaasi wahite kumulongela mfalume Daudi, kwaviya hawalondile kuwoneka mudibululu da Yelusalemu. 18 Mbali lusita luno, wawoneka na mbwanga imwe yoyahitile kumulongela Abisalomu. Ivo Yonasani na Ahimaasi wasegela himahima na wahita uko Bahulimu kuna ikaye ya munhu imwe yoyakalile na chisima kuuluwa lwake. Wengila umo muna ichisima na kwiifisa. 19 Muke wa munhu iyo kasola ngubiko na kuchigubika chisima icho maabaho kanika ngano. Kwa ivo habule munhu yavimanyile kuwa kuna wanhu mgati. 20 Wasang'hani wa Abisalomu viwafikile muna ikaye, wamuuza muke iyo, " Wakulihi Ahimaasi na Yonasani?"

Muke iyo kawedika, "Waloka ulwanda."

Wasang'hani wa Abisalomu wawazahila mbali hawawapatile bule, ivo wabwela kudibululu da Yelusalemu. 21 Wasang'hani wa Abisalomu viwasegele, Yonasani na Ahimaasi walawa kunze ya ichisima. Wahita kwa mfalume Daudi na kumulongela, "Loka umwambu wa ulwanda himahima, kwaviya Ahitofeli kamwing'ha magesa yehile Abisalomu kusonhela weye." 22 Daudi na wanhu wose wowakalile hamwe nayo, wandusa kuloka lwanda lwa Yoludani. Wanhu wose wakomeleza kuloka viifikile imitondo.

23 Ahitofeli viyawone kuwa magesa yake yalemigwa, kasasala chihongwe wake na kahita ukaye kuna idibululu jake. Viyafikile ukaye yake, keka goya mbuli zake, maabaho kaitumbika mwenyewo na kadanganika. Kawandigwa kuna dileme da tati yake.

24 Daudi kahita uko Mahanaimu, Abisalomu kaloka Yoludani hamwe na watowang'hondo wose wa Waisilaili. 25 Abisalomu kamsagula Amasa kuwa mkulu wa watowang'hondo hanhu ha Yoabu. Amasa kakala mwana wa Yeseli Muisilaili yamsolile Abigaili mami yake Nahashi. Nahashi kakala na mwali yatangigwe Seluya, mami yake Yoabu. 26 Waisilaili na Abisalomu weka lago jawo muna iisi ya Gileadi.

27 Daudi viyafikile Mahanaimu, Shobi na Makili na Balizilai wakala baho. Shobi kakala mwana wa Nahashi Mwamoni yoyalawile bululu da Laba. Makili kakala mwana wa Amieli yoyalawile bululu da Lodebali. Balizilai kakala Mgileadi kulawa bululu da Logelimu. 28 Wagala malili na nongo na via va ulongo, iviya wagala ngano na shayili na usage na uhishi na ng'hunde na dengu na 29 uki na siagi na ng'hondolo na mtindi kulawa muna imifugo yawo kwa ichimu cha Daudi na wanhu wowakalile nayo. Wagala vinhu ivo kwaviya wavimanya kuwa wanhu waja wakala walegele na wana nzala na ng'hilu kwa ichimu cha kugenda muna ichuwala.