1 Daudi kamwimbila Mndewa Mulungu mbuli za wila uno, siku ija viyamulopole kulawa kwa wehi wake wose na iviya kulawa kwa Sauli.

2 Daudi kemba,

"Mndewa Mulungu ni luwe lwangu na mhongono yangu na mulopozi wangu.

3 Mulungu ni luwe lwangu,

hanhu honikala goya.

Yeye ni ngao yangu,

na yonilopola kulawa kwa wanhu wasede.

Iyo yeye mkombola wangu,

na koukaliza ugima wangu.

4 "Nomulamba Mndewa Mulungu yofaya kwing'higwa nhogolwa,

na niye nilopoligwa kulawa kwa wehi wangu.

5 Kwaviya ifa inizunguluka fana viya mawimbi yanigubika,

unango unikwenhukila himahima fana mazi mengi yoyokuluma.

6 Nzabi kulawa kuzimu zinizunguluka,

mitego ya ifa ininamata.

7 "Muna yamanhesa yangu nimtanga Mndewa Mulungu,

nimulamba Mulungu wangu yanitaze,

nayo kahulika dizi jangu muna ikaye yake,

na kahulika vinimpulile yanitaze.

8 Isi igudemeka na itingisika,

vandusilo va kuulanga vigudemeka,

vigudemeka kwaviya Mulungu kawona ludoko.

9 Yosi difuka kulawa muna imhula yake,

moto woulunguza ulawa muna umulomo wake,

makala ya moto yazipuka kulawa kumwake.

10 Kaunamiza ulanga na kahulumuka hasi,

kukala na wingu titu hasi ya magulu yake.

11 Kakwela mchanyha ya chilumbe chilingile fana msenga wa kuulanga, kazumha.

Nayo kaguluka mchanyha ya beho fana mabawa.

12 Kaigubika ziza banzi zose,

kazungulukigwa na mawingu yazamile yamemile mazi.

13 Kulawa kuna dibung'hulo dikalile kuulongozi wake,

makala ya moto yabwinhingwa.

14 Mndewa Mulungu kaduma kulawa kuulanga,

dizi da Yeli Uchanyha Ng'hani dihulikika.

15 Kawatowa misale yake wehi na kawapwililisa,

na lumwemwe lukulu luwatimula.

16 Kolongo da mazi diwoneka,

na vandusilo va isi vigubuligwa,

kwa kubwakila kwake Mndewa Mulungu,

kwa luvumo wa mhumuzi ya mhula yake.

17 "Kagolosa mkono kulawa mchanyha na kunyamha,

kanilava kulawa hana yamazi mengi.

18 Kanilopola na mwihi wangu yeli na nguvu,

yeli na nguvu ng'hani,

kanilopola kulawa kwa waja wanihile wakalile na nguvu kufosa niye.

19 Wanizila lusita vinikalile na magayo,

mbali Mndewa Mulungu kanikaliza.

20 Kanigala hanhu hanogile kukala,

kanilopola kwaviya kanogeligwa na niye.

21 "Mndewa Mulungu kanitendela mbuli zinogile, kwaviya notenda voilondeka,

koniliha gweko kwaviya niye nabule ubananzi.

22 Nisondelela nzila zake Mndewa Mulungu,

na simulekile Mulungu wangu hebu kutenda mbuli zihile.

23 Nogesa ndagilizi zake lusita lwose,

na siyalekile malagilizo yake yose.

24 Niwa nabule ubananzi haulongozi wa Mulungu,

na niikaliza sekenitende uhasanyi.

25 Mndewa Mulungu kaniliha kwa kutenda voilondeka,

kwaviya kovimanya kuwa nabule ubananzi.

26 "Weye Mndewa Mulungu kwa mwaminika kwa wanhu wokwaminika,

kwa welibule ubananzi koilagusa kuwa kwabule ubananzi.

27 Kwa ija yelile koilagusa kuwa kela,

mbali kwa ija mbalabala koilagusa mbala kufosa yeye.

28 Weye kowalopola wanyendanyenda,

mbali meso yako yowalema weli na magoda muladi uwahulumuse.

29 Kwaviya weye ni wenge jangu, weye Mndewa Mulungu,

Mndewa Mulungu kotenda ziza jangu kuwa bung'hulo.

30 Kwa kutazigwa na weye, nodaha kudihuma bumbila da watowang'hondo,

kwa kutazigwa na Mulungu wangu nodaha kuzumha ng'huta.

31 "Mulungu, nzila yako igoloka,

Mbuli ya Mndewa Mulungu izalawilila,

weye ni ngao kwa wose,

wose wokukimbilia uwataze.

32 Yelihi yeli Mulungu, mbali ni Mndewa Mulungu?

Yelihi yeli luwe, ila ni Mulungu wetu?

33 Mulungu ni mhongono yangu ili na igangamale,

nayo kowalongoza wanhu goya kuna inzila igoloke.

34 Koyatenda magulu yangu fana magulu ya ng'hulungu,

konidahiza kwima mchanyha ya milima.

35 Koyafundiza makono yangu kuitowa,

muladi niwe na nguvu ya kusang'hanila upinde wa shaba.

36 Kuning'ha ngao yako ya ulopozi,

nhazo yako initenda niwe mkulu.

37 Kuitenda nzila yangu iwe ngalamu,

na sambi sizatelebuka bule.

38 "Niwawinga wehi wangu mbaka niwahuma,

na sibwelile mbaka viwanangigwe.

39 Niwakomeleza na kuwananga sekewadahe kwima,

wagwa hasi ya magulu yangu.

40 Kuning'ha nguvu za kutowa ng'hondo,

kuwatenda wehi wangu wanyolile haulongozi wangu.

41 Kuwatenda wehi wangu wakimbile,

nowananga waja wowonihila.

42 Wamzahila munhu wa kuwalopola, mbali hawampatile,

na wampula Mndewa Mulungu, mbali hawedike.

43 Niwatowa wakala lunhili fana viya matimbwisi ya isi,

niwahonda na kuwabojoga fana nhope ya mzila.

44 "Kunilopola kulawa kwa kuitowa na wanhu wangu,

kunika goya niwe mtawala wa wanhu wa zisi zimwenga.

Wanhu siwamanyile wezanisang'hanila.

45 Nyambenyambe wanizila kuno wainyendanyenda,

viwanihulike mbuli zangu wanitegeleza.

46 Nyambenyambe nawo wamalilwa na nguvu,

Walawa muna zimhongono zawo kuno wogudemeka.

47 "Mndewa Mulungu mgima! Nhogolwa kwa luwe lwangu,

yatogolwe Mulungu wangu, luwe lwa ulopozi wangu.

48 Yeye niiyo Mulungu yolihiliza chisasi,

na kuzika zisi zose muna utawala wangu.

49 Na kunikaliza niye kulawa kwa wehi wangu,

kuninula uchanyha ya wehi wangu,

kunilopola kulawa kwa wanhu wehile.

50 Ivo nizakutogola weye Mndewa Mulungu muna iisi yose,

Niye nizakwimba nhogolwa ya zina jako.

51 Mulungu komwing'ha mfalume wake uhumi mkulu,

komulagusa ulondo wake mfalume yoyamsagule,

komulagusa ulondo wake Daudi na welesi wake siku zose."