1 Baho makabila yose ya Isilaili wamuhitila Daudi uko Hebuloni na wamulongela, "Lola cheye cha damu imwe. 2 Umwaka Sauli viyakalile mfalume, weye niiyo uwalongoze watowang'hondo wa Isilaili kuing'hondo. Mndewa Mulungu kakulongela, ‘Kwizawadima wanhu wangu Waisilaili na kwizakuwa mtawala wawo.’ " 3 Ivo walala wose wa Isilaili wahita kwa mfalume Daudi uko Hebuloni. Nayo katenda nawo lagano haulongozi wa Mndewa Mulungu. Wamuhaka mavuta Daudi yawe mfalume wa Isilaili. 4 Daudi kawa na lika da miyaka malongo matatu baho viyawile mfalume na katawala miyaka malongo mane. 5 Uko Hebuloni katawala Yuda kwa miyaka saba na miyezi sita na muna Yelusalemu katawala isi ya Isilaili na Yuda miyaka malongo matatu na nhatu.

6 Maabaho mfalume na wanhu wake wahita Yelusalemu kuitowa na Wayebusi wowakalile wakaya wa isi iyo. Wayebusi wamulongela Daudi, "Hwizakwingila hano, hata vipofu na mbetembete wodaha kukuwinga," kwaviya wagesa Daudi hadaha kwingila muna dibululu diya.

7 Mbali Daudi kaisola mhongono ya Sayuni, sambi dotangigwa bululu da Daudi.

8 Siku ija Daudi kawalongela wanhu wake, "Yoyose yondayawahume Wayebusi, yasang'hanile hanhu baho hoyokulumila mazi muladi kuwatowa waja wowaitangile ‘vipofu na mbetembete.’ " Lekamana wanhu wolonga, "Vipofu na mbetembete hawezakwingila muna ikaye ya mfalume."

9 Daudi kakala muna imhongono iyo na kaitanga mhongono iyo bululu da Daudi. Kazenga mhongono kuzunguluka bululu ijo, kwandusila Milo na kwingila mgati. 10 Na Daudi kaiyoha kuwa na nguvu ya kutawala, kwaviya Mndewa Mulungu Yeli na Udahi kakala hamwe nayo.

11 Mfalume Hilamu wa Tilo katuma wasenga kwa Daudi. Iviya, kawatuma waselemala wagalile magogo ya mibiki ya mielezi na wasongola mabwe. Nawo wamzengela kaye Daudi. 12 Ivo Daudi kavimanya kuwa Mndewa Mulungu kamgangamiza yawe mfalume wa Isilaili na kautemela mate ufalume wake kwa ichimu cha wanhu wake Waisilaili.

13 Viyasegele Hebuloni, Daudi kasola wake wadodo wamwenga uko Yelusalemu na wana wa chilume na wa chike welekigwa kumwake. 14 Yano mazina ya wose wowalekigwe kumwake uko Yelusalemu, Shamua na Shobabu na Nasani na Sulemani 15 na Ibihali na Elishua na Nefegi na Yafiya 16 na Elishama na Eliada na Elifeleti.

17 Wafilisiti viwahulike kuwa Daudi kahakigwa mavuta kuwa mfalume wa Isilaili, wose weza kumzahila Daudi. Mbali Daudi kahulika mbuli iyo na kengila muna imhong'hono. 18 Wafilisiti wafika kuna dibawe da Lefaimu na kupwililika. 19 Daudi kamuuza Mndewa Mulungu, "Vino nihite nikawatowe Wafilisiti? Vino kwizawaguma muna yamakono yangu?"

Mndewa Mulungu kamwidika, "Genda, kwaviya kweli nizawaguma Wafilisiti muna yamakono yako."

20 Daudi kahita Baali Pelasimu na kuwahuma Wafilisiti. Kalonga, "Mndewa Mulungu kafosa haludonho wa wehi wangu fana mazi mengi yokuluma kwa nguvu." Ivo hanhu baho hatangigwa Baali Pelasimu. 21 Wafilisiti waleka nyang'hiti zawo za milungu hanhu baho, Daudi na wanhu wake wazisola na wasegela nazo.

22 Wafilisiti wabwela kuna dibawe da Lefaimu na kupwililika. 23 Daudi viyamuuzile Mndewa Mulungu yatende choni, Mndewa Mulungu kamulongela, "Sekeuwatowe kulawa baho hauli, wazunguluke na kuwatowa kulawa habehi na mibiki ya mifolosadi. 24 Uhahulika dizi dolawa kuna zinhembeti za mibiki ya mifolosadi dohulikika fana sindo za watowang'hondo, genda himahima ukawatowe, kwaviya iyo yolagusa kuwa Mndewa Mulungu kakulongolela kuditowa bumbila da watowang'hondo da Wafilisiti." 25 Daudi katenda fana viya Mndewa Mulungu viyamulongele, nayo kawatowa Wafilisiti kulawa Geba mbaka mwiinzila ihita Gezeli.