1 Kukala na ng'hondo ya siku nyingi hagati ya wanhu wa ubanzi wa Daudi na wanhu wa ubanzi wa Sauli. Wanhu wa ubanzi wa Daudi wagendelela kuwa na nguvu, mbali wanhu wa ubanzi wa Sauli wagendelela kuwa nyondenyonde.

2 Wano ni wana wa chilume welekigwe na Daudi uko Hebuloni. Mwana wa udele kakala Aminoni, mami yake kakala Ahinoamu wa uko Yezileeli. 3 Wekaidi kakala Chileabu mwana wa Abigaili, mkefilwa wa Nabali kulawa Kalimeli, weketatu kakala Abisalomu mami yake katangigwa Maaka mndele wa Talimai, mfalume wa Geshuli. 4 Wekane kakala Adoniya mwana wa Hagisi na wetano kakala Shefatia mami yake katangigwa Abitali. 5 Wesita kakala Isileamu mwana wa muke imwenga wa Daudi yatangigwe Egila. Wawo wose welekigwa na Daudi uko Hebuloni.

6 Ng'hondo viikalile yogendelela hagati ya wanhu wa ubanzi wa Sauli na wanhu wa ubanzi wa Daudi, Abineli kongeza nguvu kwa wanhu wa Sauli. 7 Sauli viyakalile mgima kakala na muke mdodo yatangigwe Lisipa, mndele wa Aya. Ishiboshesi kamuuza Abineli, "Habali kumbandama muke mdodo wa tati yangu?"

8 Abineli kawona ludoko ng'hani kwa mbuli za Ishiboshesi, kalonga. "Vino kogesa nowasang'hanila wanhu wa Yuda? Lola, mbaka diyelo nilagusa ulondo kwa wanhu wa tati yako Sauli na ndugu zake na mbwiya zake. Sikugumile muna yamakono ya Daudi, mbali ung'hali konilonga vihile kuwa niye mbananzi kwa ichimu cha mwanamke ino. 9 Mulungu yanitaguse na kunikoma, one simtendele Daudi fana viyalahiligwe na Mndewa Mulungu. 10 Mndewa Mulungu kamulahila Daudi kuwa kezauhamiza ufalume kulawa kwa wanhu wa Sauli na kugangamiza ufalume wa Daudi kwa Isilaili na Yuda, kwandusila Dani mbaka Belisheba." 11 Ishiboshesi halongile mbuli kwa Abineli, kwaviya kakala komdumba.

12 Ivo Abineli katuma wasenga kwa Daudi wakamulongele, "Vino isi ino ya yelihi? Tenda lagano na niye, nizakutaza kuitenda Isilaili yose itawaligwe na weye."

13 Daudi kalonga, "Vinoga! Nizatenda lagano na weye. Mbali nolonda mbuli imwe kumwako, hwizaniwona kaidi mbaka unigalile Mikali mndele wa Sauli, baho kwizaniwona." 14 Maabaho Daudi katuma wasenga kwa Ishiboshesi mwana wa Sauli, kalonga, "Nibwelezele muke wangu Mikali yonimsolile kwa magovi gana ya Wafilisiti."

15 Ivo Ishiboshesi katuma wanhu wakamsole Mikali kulawa kwa mulumake Palitieli, mwana wa Laisha. 16 Mulumake kahita hamwe nayo kuno kolila, kamsondelela mbaka Bahulimu. Baho Abineli kamulongela Palitieli, "Bwela ukaye." Nayo kabwela.

17 Abineli kalonga na walala wa Isilaili, kalonga, "Kwa lusita lukulu mulonda kumtenda Daudi yawe mfalume wenu. 18 Lelo tendeni vino, kwaviya Mndewa Mulungu kamulongela Daudi, ‘Kwa kufosela weye msang'hani wangu Daudi nizawalopola wanhu wangu Isilaili kulawa muna yamakono ya Wafilisiti na kulawa muna yamakono ya wehi wawo wose.’ "

19 Iviya Abineli kalonga na wanhu wa kabila da Benyamini, maabaho kahita kulonga na Daudi uko Hebuloni mbuli zose ziwoneke kuwa zinoga kwa kabila da Benyamini na Waisilaili wamwenga.

20 Abineli hamwe na wanhu malongo maidi, wamuhitila Daudi uko Hebuloni na Daudi kawatendela dugila. 21 Abineli kamulongela Daudi, "Nisondelele sambi nohita yodahika kukugalila wanhu wose wa Isilaili, weye mwenevale wangu mfalume. Wezakwiza na kutenda lagano na weye, muladi uwe mfalume wawo na weye kwizawatawala wose fana viya viulonda." Nayo Daudi kamuleka Abineli yahite kwa tindiwalo.

22 Watowang'hondo wa Daudi wabwela kulawa kuna ing'hondo hamwe na Yoabu, wabwela na vinhu vingi viwahokile, mbali Abineli hakalile Hebuloni kwa Daudi kwaviya Daudi kamtuma yahite, nayo kahita kwa tindiwalo. 23 Yoabu viyabwelile hamwe na watowang'hondo wowokalile hamwe nayo, kalongiligwa kuwa Abineli mwana wa Neli, kakala yezile kumuwona mfalume Daudi, nayo kamulaga yahite, nayo kasegela kwa tindiwalo.

24 Ivo Yoabu kamuhitila mfalume na kumulongela, "Vino kutenda choni? Lola Abineli keza kumwako. Habali kumuleka yahite? Lelo kasegela! 25 Vino kuvimanya kuwa Abineli mwana wa Neli keza kukuvwizila? Keza muladi yavimanye kwingila kwako na kulawa kwako na yavimanye chila chinhu choutenda."

26 Yoabu viyalawile kulonga na Daudi, katuma wasenga wamgale Abineli, nawo wamfika kuna ichisima cha Sila na kumbweleza, mbali Daudi haimanyile bule mbuli iyo. 27 Abineli viyabwelile Hebuloni, Yoabu kamsola hamgwazo kuna ulwivi lukulu lwa bululu fana viya kolonda kulonga nayo chiidumwe. Na kamuhoma kwa mgoha Abineli mmunda. Yoabu kamkoma Abineli kwaviya Abineli kamkoma Asaheli mdodo wake.

28 Hamwande Daudi viyahulike mbuli izo kalonga, "Niye na ufalume wangu kweli chabule ubananzi siku zose haulongozi wa Mndewa Mulungu kusonhela kukomigwa kwa Abineli mwana wa Neli. 29 Ukomaji uwo uwe ubananzi wake Yoabu na kaye yose ya tati yake! Kaye ya Yoabu sekeiswele munhu yolawigwa na ufila hebu yeli na utamu wa dikulu hebu yogendela mhome hebu mwene kukomigwa kwa panga hebu mwene kulonda ndiya!"

30 Yoabu na Abishai ndugu yake wamkoma Abineli kwaviya kamkoma ndugu yawo Asaheli kuna ing'hondo uko Gibeoni.

31 Daudi kamulongela Yoabu na wanhu wose wakalile hamwe nayo, "Vuleni mawalo yenu, mukayawale mawalo ya maguniya, mudilongolele jeneza da Abineli na kuno momulilila." Mfalume Daudi kagenda kadisondelela jeneza. 32 Wamuwanda Abineli uko Hebuloni. Mfalume kalila kwa kulandula dizi habehi na leme da Abineli. Iviya wanhu wose walila.

33 Mfalume kamulilila Abineli kuno kolombokeza,

"Vino ilondeka Abineli yakomigwe fana viya viyokomigwa mbananzi?

34 Makono yake hayafungigwe,

na migulu yake haigumigwe mhingu fana mbananzi,

kadanganika fana viyodanganika munhu haulongozi wa wanhu wehi."

Na wanhu wose wamulilila kaidi.

35 Maabaho wose weza kumulamba Daudi yaje ndiya ing'hali imisi, mbali Daudi kailaha, kalonga, "Mulungu yanikome one nihalanza gate hebu chinhu chochose ding'hali zuwa hadinakuswa!"

36 Wanhu wose wayawona yayo yawanogela fana viya chila chinhu choyatendile mfalume. 37 Ivo siku iyo wanhu wose na Waisilaili wose wavimanya kuwa mfalume halagilize Abineli mwana wa Neli yakomigwe.

38 Maabaho mfalume kawalongela wasang'hani wake, "Hamuvimanyile kuwa diyelo mulangulizi mkulu kadanganika muna iisi ya Isilaili? 39 Niye nihakigwa mavuta niwe mfalume, mbali diyelo niwa nyondenyonde. Kwaviya wana wa Seluya wana nguvu kufosa niye, Mndewa Mulungu yawahume wehi wano kwa kusondelela sang'hano zawo zihile!"