1 Kukala na munhu mtatali ng'hani yatangigwe Sheba mwana wa Bikili Mbenyamini, katowa mhalati na kulandula dizi,

"Cheye siyo wanhu wa Daudi,

iviya chabule hanhu kwa mwana wa Yese.

Mweye wanhu wa Isilaili,

Chila munhu yahite ukaye yake."

2 Ivo wanhu wose wa Isilaili wamuleka Daudi na kumsondelela Sheba mwana wa Bikili. Mbali wanhu wa Yuda wailumba na mfalume wawo kwandusila Yoludani mbaka Yelusalemu.

3 Daudi viyabwelile ukaye yake muna imhongono ya chifalume uko Yelusalemu, kawasola waja wake zake wadodo longo woyawalekile muladi kukaliza mhongono ya chifalume na kawahindila muna ikaye imwe. Kawalolesa goya, mbali haibandame nawo. Wafungigwa na wakala fana wagane mbaka viwadanganike.

4 Maabaho mfalume kamulongela Amasa, "Niduganyile wanhu wose wa Yuda kwa siku tatu na weye mwenyewo uwe baho." 5 Amasa kahita kuwatanga wanhu wa Yuda. Mbali kakalama kubwela kwa lusita luja lowalongeligwe na mfalume.

6 Daudi kamulongela Abishai, "Lelo Sheba mwana wa Bikili kezachigalila mbuli zihile ng'hani kufosa viyatendile Abisalomu. Wasole wanhu wangu na mumuwinge. Sheba sekeyeze kuna bululu jojose dili na mhongono na kuchibanga." 7 Ivo wanhu wa Yoabu na Wakelesi na Wapelesi hamwe na watowang'hondo magalu, wose wasegela hasi ya ulangulizi wa Abishai. Wasegela Yelusalemu muladi wamuwinze Sheba mwana wa Bikili. 8 Lusita viwakalile kuna uluwe lukulu uko Gibeoni, Amasa keza kuwahokela. Yoabu kakala kavala mawalo yake ya kuitowela ng'hondo na kaifunga mkwiji uli na yala muna ichigudi chake. Viyakalile kohita kuulongozi, mwele ulagala kulawa muna iyala yake. 9 Yoabu kamulongela Amasa, "Kwamgima ndugu yangu?" Maabaho Yoabu kamwamha Amasa ndevu kwa mkono wake wa kulume muladi yamnonele. 10 Mbali Amasa hauwone umwele ukalile muna mkono wa Yoabu, nayo Yoabu kamuhoma munda, utumbo wake ugwa hasi. Kadanganika bahaja. Yoabu halondeke kumuhoma mwanza wekaidi. Maabaho Yoabu na ndugu yake Abishai wamuwinza Sheba mwana wa Bikili. 11 Imwe wa walume wa Yoabu kema habehi nayo, kalonga, "Munhu yoyose yomulonda Yoabu na munhu yoyose yeli ubanzi wa Daudi, yamsondelele Yoabu!" 12 Amasa kakala katambalala muna idamu yake mudikulugumbi. Munhu imwe kawona kuwa yoyose yafosile haja kema na kulola. Munhu iyo viyavimanyile kuwa chila munhu kakala yokwima, kambulula Amasa kulawa hadikulugumbi mbaka kumgunda na kamgubika na walo. 13 Na viyasegezigwe muna dikulugumbi, wanhu wose wafosa na wamsondelela Yoabu muladi kumuwinza Sheba mwana wa Bikili. 14 Sheba kafosa muna iisi ya makabila yose ya Isilaili mbaka bululu da Abeli ya Besi Maaka na kufosa hanhu hose ha Wabikili waja waikunzagiza hamwe na kumsondelela. 15 Walume wose wowakalile na Yoabu weza na kumzunguluka Sheba mwana wa Bikili uko Abeli ya Besi Maaka. Watenda chisugulu na wakwela na wadizunguluka bululu kwa kwika mabumbila ya watowang'hondo, muladi wadahe kuitowa mhongono ya bululu ilagale. 16 Baho mwanamke imwe yeli na ubala muna dibululu kalandula dizi, kalonga, "Tegelezeni, tegelezeni! Mulongeleni Yoabu yeze hano habehi nilonge nayo." 17 Yoabu kahita haulongozi wake, mwanamke iyo kamuuza, "Weye iyo Yoabu?" Yoabu kamwidika, "Iyo niye." Mwanamke ija kamulongela, "Unitegeleze niye msang'hani wako chondanikulongele." Yoabu kamulongela, "Notegeleza." 18 Maabaho mwanamke ija kalonga, "Umwaka wanhu walonga, ‘Uhawa na mbuli ya kuuza, hita uko Abeli ukatazigwe,’ na ivo viwatendaga. 19 Cheye cha wanhu wa tindiwalo, chili waminika muna iisi ya Isilaili. Weye kolonda kudibananga bululu dikulu muna iisi ya Isilaili, habali kolonda kuwananga wanhu wa Mndewa Mulungu?" 20 Yoabu kamwidika, "Haidahika, sidaha kumnangani hebu kudinanga bululu. 21 Viulongile siyo kweli! Mbali munhu imwe zina jake Sheba mwana wa Bikili kulawa kuna iisi ya vilima va Efulaimu, kamulema mfalume Daudi. Nitulileni munhu ino na niye nizasegela bululu dino."

Mwanamke ija kamulongela Yoabu, "Ditwi jake dizakwasigwa kufosela uchanyha ya ng'huta." 22 Ivo mwanamke ija kahita kwa wanhu wose kuno kana gesa jake dinogile. Wawo wadumula ditwi da Sheba mwana wa Bikili na kumwasila Yoabu. Ivo Yoabu katowa mhalati na wanhu wake waimwaga, chila munhu kabwela ukaye yake. Maabaho Yoabu kabwela kwa mfalume uko Yelusalemu.

23 Yoabu kakala mkulu wa mabumbila yose ya watowang'hondo wa Isilaili. Benaya mwana wa Yehoyada kakala kowalanguliza Wakelesi na Wapelesi. 24 Adolamu kakala mulangulizi wa waja watendile sang'hano za kuwangilizigwa kwa mfalume. Yehoshafati mwana Ahiludi kakala mwikaji lukumbuso wa mfalume. 25 Sheva kakala mwandikaji, Sadoki na Abiasali wakala wakulu wa nhambiko, 26 iviya Ila Muyaili kakala mkulu wa nhambiko lusita viyatawale Daudi.