1 Mndewa Mulungu kamtuma Nasani kwa Daudi. Viyafikile kumwake kamulongela, "Kukala na wanhu waidi wowakalile muna dibululu dimwe. Imwe kakala na vinhu vingi na imwenga kakala ngayengaye. 2 Ija yeli na vinhu vingi kakala na ng'hondolo wengi na ng'ombe wengi, 3 mbali ija ngayengaye kakala kabule chinhu ila ng'hondolo mdodo zike niiyo yoyakalile kamgula. Kamwika goya ng'hondolo iyo na kakulila kumwake na wanage. Ng'hondolo iyo kaja hamwe na mwenevale wake na kung'hwila nhungo yake, iviya ng'hondolo iyo kagona muna imhambaga mwa mwenevale wake. Kumwake kawa fana mwanage. 4 Siku dimwe munhu yeli na vinhu vingi keziligwa na nyambenyambe. Munhu yeli na vinhu vingi halondile bule kumchinjila imwe wa ng'hondolo zake mwenyewo hebu ng'ombe wake muladi yamsasalile ija nyambenyambe, mbali kamuhoka ngayengaye ng'hondolo wake na kumsasalila nyambenyambe ija."

5 Maabaho Daudi viyahulike ivo, kamuwonela ludoko munhu ija yeli na vinhu vingi. Kamulongela Nasani, "Noilaha kwa Mndewa Mulungu yeli mgima, munhu yatendile mbuli iyo kolondeka kudanganika! 6 Kolondeka yamulihe ija ngayengaye mwanang'hondolo iyo miyanza mine, kwaviya katenda mbuli ihile na hakalile na ubazi."

7 Nasani kamulongela Daudi, "Weye niiyo munhu ija. Lelo Mndewa Mulungu, Mulungu wa Isilaili kolonga vino, ‘Nikuhaka mavuta uwe mfalume wa Isilaili na nikulopola kulawa mmikono ya Sauli. 8 Nikwing'ha wanhu wa kaye ya mwenevale wako na wake wa mwenevale wako wawe wako. Nikwing'ha wanhu wa Isilaili na Yuda. Mbuli zino zose zahawile ndodo nahakongezele. 9 Habali kuzizeha mbuli zangu na kutenda mbuli zihile haulongozi hangu? Kumulungila Uliya Muhiti yakomigwe na panga da Waamoni na kweli kakomigwa na Waamoni, maabaho kumsola muke wake yawe muke wako. 10 Lelo panga hadizasegela muna ikaye yako, kwaviya kunizeha na kumsola muke wa Ulia Muhiti yawe muke wako.’ 11 Mndewa Mulungu kolonga, ‘Lola nizagala manhesa muna uwelesi wako mwenyewo. Nizawasola wake zako na kumwing'ha mkaya miyago kuno weye kolola. Nayo kezagona nawo chila munhu kolola. 12 Weye kutenda mbuli iyo kwa chifiso, mbali niye nizatenda mbuli iyo Waisilaili wose wolola.’ "

13 Daudi kamulongela Nasani, "Nimuhasanya Mndewa Mulungu."

Nasani kamwidika, "Mndewa Mulungu kakulekelela uhasanyi wako, hwizadanganika bule. 14 Mbali kwa mbuli ino kumzeha Mndewa Mulungu, ivo mwana yondayelekigwe kezadanganika." 15 Maabaho Nasani kabwela ukaye yake.

Mndewa Mulungu kamwing'ha utamu mwana wa Besisheba, mkefilwa wa Ulia yoyamwelekele Daudi, nayo kawa mtamu ng'hani. 16 Daudi kampula Mulungu muladi mwanage yahone. Hadile chinhu chochose na kengila muna ichiheleto chake na kagona hasi ichilo chose. 17 Walala wowakalile muna ikaye yake wamwimila hamgwazo na kumwinula kulawa hasi, mbali kalema na hadile ndiya yoyose. 18 Siku yesaba imwana kadanganika na wasang'hani wa Daudi wadumba kumulongela kuwa mwana kadanganika. Kwaviya walonga, "Mwana viyakalile mgima, vichilongile nayo Daudi hachitegeleze. Vino yodahikaze kumulongela mwana kadanganika? Kodaha kuilumiza!"

19 Daudi viyawawone wasang'hani wake woinyong'onyela, kavimanya kuwa mwanage kadanganika. Ivo kawauza, "Mwana kadanganika?"

Wamwidika, "Ona kadanganika."

20 Baho Daudi kenuka hasi, koga na kaiboboda mavuta na kwasakanya viwalo vake. Kahita mwiidihema da Mndewa Mulungu na katosa umo. Maabaho kabwela ukaye yake na viyapulile ndiya wamsasalila kaja.

21 Wasang'hani wake wamuuza, "Mbuli yaki ino youtendile? Mwana viyakalile mgima kuleka kuja na kukala ulila, mbali mwana viyadanganike, kwinuka kuja ndiya."

22 Daudi kawedika, "Mwana viyakalile mgima, nileka kuja na nikala nolila. Ivo nigesa, ‘Yelihi yovimanya? Yodahika Mndewa Mulungu kezaniwonela ubazi na kezamuhonya imwana.’ 23 Mbali lelo kadanganika, habali nileke kuja? Vino niye nodaha kumbweleza kaidi imwana yawe mgima? Nizahita kumwake, mbali yeye hadaha kubwela kumwangu."

24 Daudi kamguma moyo Besisheba muke wake. Kahita kumbandama na kapata wimo na kuibasula mwana wa chilume, nayo katangigwa Solomoni. Mndewa Mulungu kamulonda imwana, 25 ivo kamtuma mulotezi Nasani kumwing'ha imwana zina Yedidia, fambulo jake Mndewa Mulungu komulonda.

26 Lusita ulo Yoabu kagendelela kuitowa na bululu da Laba da Waamoni na kaisola mhongono ya chifalume. 27 Yoabu katuma wasenga kwa Daudi kulonga, "Niitowa ng'hondo na bululu da Laba na nidisola sima jawo. 28 Lelo waduganye wanhu wose wowasigale, udizunguluke bululu na kudisola. Buleivo nizadisola na dizatangigwa kwa zina jangu." 29 Ivo Daudi kawaduganya wanhu wose kahita Laba. Kaditowa na kudisola bululu ijo. 30 Maabaho kasola kombelo da mfalume wawo mditwi jake. Kombelo dikala na nzamo ya chilo malongo matatu na tano, dihambigwa kwa dibwe da bei ng'hulu. Nayo Daudi kavazigwa kombelo ijo mditwi jake. Maabaho yeye na watowang'hondo wake wasola vinhu vingi ng'hani va bei ng'hulu muna dibululu ijo. 31 Kaweka wanhu wa bululu ijo wasang'hanile usang'hano kwa kusang'hanila misumeno na sululu na nhemo nayo kaweka muna isang'hano ya kusoma matafali. Katenda ivo muna yamabululu yose ya Waamoni, maabaho Daudi na wanhu wake wose wabwela Yelusalemu.