1 Chila mwanduso wa mwaka wa sambi wafalume wahitaga kuna ing'hondo, Daudi kamtuma Yoabu na wasang'hani wake hamwe na watowang'hondo wa Waisilaili kwiitowa. Nawo wawananga Waamoni na kuzinga bululu da Laba muladi wakaya watogole kuhumwa. Mbali Daudi mwenyewo kasigala Yelusalemu.

2 Siku dimwe lusita lwa ichigulogulo, Daudi kalamuka kulawa muna zinhongo na kahita uchanyha ya chisuwili chibadagale cha kaye yake. Viyakalile kogenda uko, kawona muke imwe kokoga, na iyo kakala lumondo ng'hani. 3 Daudi katuma msenga kuuza mbuli ya muke iyo. Msenga iyo kamulongela Daudi, "Muke iyo kotangigwa Besisheba mwana wa Eliamu yeli muke wa Uliya Muhiti." 4 Daudi katuma wasenga wamgale Besisheba. Ivo Besisheba keza kwa Daudi nayo kambandama. Lusita ulo kakala kamala kuisafya kulawa muna zisiku zake. Maabaho kabwela ukaye yake. 5 Mwanamke iyo kapata wimo na kamgalila usenga Daudi, kamulongela "Niye nina wimo."

6 Ivo Daudi katuma usenga kwa Yoabu, "Mbweleze Uliya Muhiti kumwangu." Yoabu kamtuma Ulia kwa Daudi. 7 Uliya viyafikile, Daudi kamuuza mbuli ya Yoabu na mbuli ya watowang'hondo na ng'hondo viigendelela. 8 Maabaho Daudi kamulongela Uliya, "Hita ukaye yako na unawe migulu." Uliya viyasegele haikaye ya mfalume, Daudi kamtumila chitumetume ukaye yake. 9 Mbali Uliya hahitile, kagona hamwe na wasang'hani habehi na ulwivi lwa kaye ya mfalume. 10 Daudi viyalongeligwe kuwa Uliya hahitile ukaye yake, Daudi kamuuza Uliya, "Weye kulawa mwanza, vino habali huhitile ukaye yako?"

11 Ulia kamwidika Daudi, "Sanduku da lagano hamwe na watowang'hondo wa Isilaili na Yuda wokala muna yamahema kuna ing'hondo. Mwenevale wangu Yoabu na wasang'hani wake wose weka lago jawo kuchuwala, ivo yodahikaze niye nihite ukaye nikaje na kung'wa na kugona na muke wangu? Ukweli fana viukala, sizatenda chinhu fanile icho bule." 12 Maabaho Daudi kamulongela Uliya, "Lelo sigala hano diyelo iviya na igolo nizakuleka ubwele kwa watowang'hondo." Ivo Uliya kasigala kudibululu da Yelusalemu siku ija na igolo yake. 13 Daudi kamgoneka Uliya kuja na kung'wa hamwe nayo. Nayo Daudi kamtenda yakolwe. Mbali ichigulogulo Uliya hahitile ukaye, ila kahita kugona muna dilili jake hamwe na wasang'hani wa mwenevale wake.

14 Imitondo yake Daudi kamwandikila usenga Yoabu na kamtuma Uliya yaugale. 15 Muna usenga kandika vino, "Mwike Uliya kuulongozi kuna ing'hondo ng'hulu ng'hani, maabaho muleke uko na ubwele kuchisogo muladi yatowigwe mbaka yadanganike." 16 Baho Yoabu viyakalile kadizunguluka bululu, kamwika Uliya hanhu baho kavimanya kuwa watowang'hondo wa wehi wakala magalu. 17 Wanhu wa bululu ijo viwezile kuitowa na Yoabu, watowang'hondo wamwenga wa Daudi wadanganika na Uliya Muhiti iviya kadanganika.

18 Maabaho Yoabu katuma usenga kwa Daudi kumulongela mbuli zose za ng'hondo, 19 na kamulagiliza imsenga, "Wahakomeleza kumulongela mfalume kusonhela mbuli zose za ng'hondo, 20 mfalume kodaha kuwona ludoko na kukuuza, ‘Habali mukwenhukila habehi na ng'huta za bululu vimukalile moitowa? Hamvimanyile bule wezadaha kuwatowa misale kulawa kuna zinhumba izo? 21 Vino hamkumbuka viya viyadanganike Abimeleki mwana wa Yelubeshesi? Mwanamke kampigisila dibwe da kudundila kulawa hana ing'huta na Abimeleki kadanganika uko Sebesi. Habali mukwenhuka habehi na ing'huta?’ One yahakuuza ivo, mulongele, ‘Iviya msang'hani wako Ulia Muhiti kadanganika.’ "

22 Ivo msenga kasegela, viyafikile kamulongela Daudi mbuli zose ziyatumigwe na Yoabu yazilonge. 23 Msenga kamulongela Daudi, "Wehi wetu wachihuma. Walawa kunze ya bululu na kuchitowa mwiichuwala, mbali cheye chiwabweleza mbaka kuulwivi lukulu lwa bululu. 24 Maabaho wachitowa misale cheye, wasang'hani wako, kulawa kwiinhumba. Watowang'hondo wamwenga wadanganika. Iviya msang'hani wako, Ulia Muhiti, kadanganika."

25 Daudi kamulongela msenga ija, "Mulongele vino Yoabu, ‘Mbuli ino sekeikugalile lugano kwaviya panga dabule meso. Ng'hondo yokoma munhu yoyose. Iyohe kuditowa bululu na udinange.’ Mulongele ivo Yoabu muladi kumguma moyo."

26 Besisheba muke wa Ulia viyahulike kuwa mulumake kadanganika, kamulilila. 27 Ndilo iyo viimalile, Daudi kalagiliza kuwa muke iyo yagaligwe kuna ikaye ya mfalume. Nayo kawa muke wake na kamwelekela mwana wa chilume. Mbali mbuli iyatendile Daudi imwihila Mndewa Mulungu.