1 Vizifosile mbuli izo, Abisalomu kasasala matololi ya kubululigwa na falasi hamwe na watowang'hondo malongo matano wakimbile haulongozi wake. 2 Abisalomu kazowela kulamuka mitondo ng'hani na kuhita kwima kuna inzila yoisonhela kuna ulwivi ulukulu wa bululu. Munhu yoyose yakalile na mbuli yoyalondile kuigala kwa mfalume muladi kupata ulamuzi wake, Abisalomu komtanga munhu iyo hamgwazo na kumuuza, "Weye kolawa bululu dilihi?" One yahedike, "Niye msang'hani wako nolawa dimwe da makabila ya Isilaili." 3 Abisalomu komulongela munhu iyo, "Lola, mbuli yako inoga ng'hani, mbali habule munhu yasaguligwe na mfalume kukuhumiza." 4 Kaidi Abisalomu komulongela, "One nihawile msemi wa isi ya Isilaili, chila munhu yeli na manyulunyulu hebu mbuli yahezile kumwangu na hamuhumize fana viilondeka."

5 Iviya, munhu yoyose yamkwenhukile na kumtumbalila mavindi haulongozi wake, Abisalomu kogolosa makono na kamuhagatila na kumnonela. 6 Ivo niivo Abisalomu viyawatendele Waisilaili wose wowezile kwa mfalume muladi yawahumize. Kwa kutenda ivo, Abisalomu kawatenda wanhu wa Isilaili wamulonde kufosa Daudi.

7 Viifosile miyaka mine, Abisalomu kamulongela mfalume, "Nolamba unilekelele nihite uko Hebuloni muladi nifikize chiya chonimulahile Mndewa Mulungu. 8 Vinikalile Geshuli muna iisi ya Shamu, nimulahila Mndewa Mulungu nilonga, ‘One Mndewa Mulungu konibweleza kudibululu da Yelusalemu nizamtambikila uko Hebuloni.’ "

9 Mfalume kamwidika, "Hita kwa tindiwalo." Abisalomu kahita Hebuloni. 10 Mbali Abisalomu katuma usenga wa chifiso kwa makabila yose ya Isilaili kulonga, "Hondamuhulike dizi da mhalati, baho longeni, ‘Abisalomu ni mfalume uko Hebuloni!’ " 11 Abisalomu viyahitile uko Hebuloni, kahita na wanhu magana maidi kulawa Yelusalemu. Nawo wahita uko kwa lungilo dinogile na hawavimanyile chochose choyailungile Abisalomu. 12 Abisalomu viyakalile yolava nhambiko, katuma usenga kumtanga Ahitofeli Mgiloni kulawa kuna dibululu jake da Gilo. Yeye kakala yomwing'ha magesa yake Daudi. Lungilo dihile da Abisalomu jongezeka kupata nguvu na wanhu wowamsondelele Abisalomu wakala wokongezeka.

13 Msenga keza kumulongela Daudi, "Waisilaili wonogelwa na Abisalomu."

14 Ivo Daudi kawalongela wasang'hani wake wowakalile nayo Yelusalemu, "Inukeni chikimbile, one hachitendile ivo, hachidaha kumbanga Abisalomu! Cholondeka chisegele himahima sekeyeze kuchigalila ndilo na kudinanga bululu kwa panga!"

15 Mbali wasang'hani wake wamulongela, "Weye mwenevale wetu mfalume, cheye wasang'hani wako. Chiisasala kutenda chochose chondaulonge." 16 Ivo mfalume kasegela hamwe na kaye yake, mbali kawaleka wake zake iwadodo longo kuilolesa goya kaye yake.

17 Ivo mfalume na wanhu wake wose wasegela. Mbali wema chidogo viwafikile kaye ya uhelelo ya kudibululu. 18 Wasang'hani wose wa mfalume na Wakelesi wose na Wapelesi wose, hamwe na Wagiti magana sita wowamsondelele mfalume Daudi kulawa kuna dibululu da Gasi, wasegela hamwe nayo na wamulongolela. 19 Maabaho mfalume Daudi kamuuza Itayi Mgiti, "Habali hata weye kusegela hamwe na cheye? Bwela ukaye na kala na mfalume iyo wa sambi, kwaviya weye siyo mkaya wa isi ino, iviya kwa mfosanzila kulawa kuna iisi yako. 20 Weye kwiza kuno zuzizuzi muhala. Habali kuisondelela na cheye hata niye sikumanya konihita? Bwela ukaye hamwe na ndugu zako. Nayo Mndewa Mulungu yakulagusile ulondo wake wa kufunya umoyo na uwaminika wake."

21 Mbali Itayi kamwidika mfalume, "Fana viya viyokala Mndewa Mulungu na weye mwenevale wangu viukala, hohose hondauwe, one ihawa nodanganika hebu nosigala mgima, niye msang'hani wako nizakuwa baho."

22 Daudi kamulongela Itayi Mgiti, "Longola kuulongozi!" Bahaja Itayi kahita hamwe na watowang'hondo wake na kaye zawo.

23 Daudi viyakalile kosegela hamwe na wanhu wake, wanhu wa Yelusalemu walila kwa dizi kulu. Mfalume Daudi kaloka muna ichizanda cha Chidiloni hamwe na wanhu wake wose. Wofosa kusonhela kuichuwala.

24 Sadoki kakala haja na Walawi wowakalile wadipapa sanduku da lagano da Mndewa Mulungu. Wadika hasi sanduku da lagano da Mndewa Mulungu, Abiasali kakala uko mbaka wanhu wose viwasegele. 25 Maabaho mfalume kamulongela Sadoki, "Dibweleze disanduku da lagano kudibululu. One Mndewa Mulungu kanogelwa na niye, kezanibweleza na kunilekela kuwona kaidi sanduku ijo na hanhu hodikala. 26 Mbali one Mndewa Mulungu hanogelwa na niye, niye niisasala yanitendele chochose choyowona chinoga."

27 Mfalume kamulongela mkulu wa nhambiko Sadoki, "Weye kodaha kuchiwona chochilawilila hano, lelo msole mwanago Ahimaasi na Yonasani mwana wa Abiasali na mubwele ukaye kwa tindiwalo. 28 Mbali nizagozela hana iviloko kuno kuna ichuwala, mbaka vondanipate mbuli kulawa kumwako." 29 Ivo Sadoki na Abiasali wadibweleza sanduku da lagano da Mulungu kuna dibululu da Yelusalemu na wasigala umo.

30 Mbali Daudi kagendelela kukwela Mulima wa Mizaituni kuno kolila. Kahita bila ya vilatu na kuno kaigubika ditwi jake. Wanhu wose wowakalile hamwe nayo wagubika matwi yawo. Wakala wokwela mulima kuno wolila. 31 Lusita ulo Daudi kalongiligwa kuwa Ahitofeli kakala yomtaza Abisalomu kuilungila vinhu vihile kusonhela yeye. Baho Daudi kapula na kalonga, "Weye Mndewa Mulungu, ugalule magesa ya Ahitofeli kuwa ubozi."

32 Daudi viyafikile kuna uludonho wa mulima hanhu haja wanhu howazowele kumtambikila Mulungu, Hushai Mwaliki kakala uko kumgozela kuno viwalo vake videgeka na kana matimbwisi mditwi jake kulagusa kana usungu. 33 Daudi kamulongela, "One uhahita hamwe na niye, kwizakuwa mbahasha kumwangu. 34 Mbali ubwele kudibululu ukamulongele Abisalomu, ‘Weye mfalume, nizakuwa msang'hani wako. Lusita lufosile nikala msang'hani wa tati yako, mbali sambi nizakuwa msang'hani wako.’ Kwa kutenda ivo kwizanitaza kulema gesa da Ahitofeli. 35 Vino wakulu wa nhambiko Sadoki na Abiasali hawezakuwa hamwe na weye? Walongele chochose chondauhulike muna ikaye ya mfalume. 36 Lola wanawo waidi, Ahimaasi mwana wa Sadoki na Yonasani mwana wa Abiasali wahamwe nawo. Na weye uwatume wawo wanigalile mbuli zose zondauhulike."

37 Ivo Hushai mbwiyake Daudi kafika Yelusalemu na lusita ulwo Abisalomu kengila uko Yelusalemu.