1 Yoabu kalongeligwa, "Mfalume Daudi kolila na kumtendela nhanga Abisalomu." 2 Kwa bumbila jose da watowang'hondo wa Daudi, uhumi wa siku ija ugaluka kuwa ndilo, kwaviya siku iyo wahulika, "Mfalume kana usungu kwa ichimu cha mwanage." 3 Siku ija watowang'hondo wengila Mahanaimu hupi, fana viya watowang'hondo wowokimbila ng'hondo kwa chinyala. 4 Mfalume kaigubika chihanga chake na kalila kwa dizi kulu, "Weye mwanangu Abisalomu! Weye Abisalomu, mwanangu, mwanangu!"

5 Maabaho Yoabu kengila muna ikaye ya mfalume na kalonga, "Diyelo kuwaguma chinyala wanhu wako wose wowaulopole ugima wako na ugima wa wanago wa chilume na wandele zako na ugima wa wanaake wako na wake zako wadodo, 6 kwaviya kuwalonda wehi wako na kuwehila waja wokulonda. Diyelo kulagusa kuwa, wakulu wa watowang'hondo na wasang'hani wako siyo chinhu kumwako. Ivo niwona, one Abisalomu yawile mgima na cheye chose chihadanganike, weye wahadeng'helele. 7 Lelo ulawe kunze ukawagume moyo wanhu wako. Noilaha kwa Mndewa Mulungu one hulawa kunze, habule munhu yondayasigale mbaka vondaifike ichigulogulo. Vino vizakuwa viha ng'hani kumwako kufosa manhesa yose yakufikile kwandusila viukalile mbwanga mbaka vino sambi."

8 Baho mfalume kasegela na kakala hana ichigoda chake habehi na ulwivi lukulu wa bululu. Wanhu viwalongeligwe kuwa mfalume kakala habehi na lwivi lukulu, wanhu wose wamuhitila.

Lusita ulwo wanhu wose wa Isilaili wakala wakimbila chila imwe kuikaye yake. 9 Makabila yose ya Isilaili, wanhu wakala woisosokanya wawo kwa wawo, walonga, "Mfalume kachilopola kulawa kwa wehi wetu. Niiyo yachilopole kulawa kwa Wafilisiti. Mbali sambi mfalume kaikimbila isi kwa ichimu cha Abisalomu, 10 nayo Abisalomu yochimuhaka mavuta kuwa mfalume wetu kadanganika kwiing'hondo. Kwa viya hamulonga jojose kumbweleza mfalume?"

11 Mfalume Daudi viyahulike chiwolonga Waisilaili, kawatuma wakulu wa nhambiko Sadoki na Abiasali wawauze walala wa Yuda, "Habali muwe wa uhelelo kunibweleza niye mfalume muna imhongono yangu? 12 Mweye cha damu imwe. Ivo habali muwe wa uhelelo kunibweleza niye mfalume? 13 Mweye mulongeleni Amasa, ‘Vino weye siyo cha damu imwe? Mulungu yaniduwile hata kunikoma, one sikusagule weye kuwa mkulu wa watowang'hondo wangu kusola hanhu ha Yoabu, kwandusila sambi na kugendelela.’ "

14 Wanhu wa Yuda wandusa kumsondelela kaidi Daudi, fana viya wakala munhu imwe. Wagala usenga kwa mfalume walonga, "Bwela na wanhu wako wose." 15 Ivo mfalume viyakalile muinzila kubwela Yelusalemu kafika lwanda lwa Yoludani.

Maabaho wanhu wa Yuda waiting'hana Giligali kumulosa mfalume lwanda lwa Yoludani. 16 Shimei mwana wa Gela wa kabila da Benyamini kulawa Bahulimu keza hamwe na wanhu wa Yuda muladi kumuhowela mfalume Daudi. 17 Hamwe nayo hakala Wabenyamini magana longo. Iviya Siba yakalile mulolesi wa kaye ya Sauli hamwe na wanage longo na tano na wasang'hani wake malongo maidi, wahita himahima Yoludani kuiting'hana na mfalume. 18 Waloka chiloko muladi kuwalosa wanhu wa mwiikaye ya mfalume na kutenda chila chinhu chiyalondile mfalume.

Shimei mwana wa Gela viyalokile Yoludani, katumbala mavindi haulongozi wa mfalume. 19 Kamulongela mfalume, "Mwenevale wangu, nokulamba unilekelele wihi wangu. Sekeukumbuke viya niye msang'hani wako vinitendile wihi siku ija viusegele Yelusalemu. Mfalume usegeze muumoyo wako. 20 Kwaviya niye msang'hani wako novimanya nitenda uhasanyi. Mbali diyelo niza fana viya wa mwanduso wa makabila ya Yosefu kuhulumuka na kumuhowela mwenevale wangu mfalume."

21 Mbali Abishai ija mami yake katangigwa Seluya, kalonga, "Vino Shimei halondeka kukomigwa kwa ichimu chino? Kamduwila ija yasaguligwe na Mndewa Mulungu."

22 Daudi kawedika Abishai na sekulu wake Yoabu, "Mweye hamwili hamwe na niye. Habali diyelo muwa wehi wangu? Vino diyelo yakomigwe munhu chakachaka muna iisi ya Isilaili? Hamvimanyile kuwa niye na mfalume wa Isilaili diyelo?" 23 Ivo mfalume kamulongela Shimei, "Weye hwizadanganika." Maabaho mfalume kamulahila.

24 Maabaho Mefiboshesi mzukulu wa Sauli keza muladi kumuhowela mfalume. Kakala hanawile magulu yake na hawegule ndevu zake na hafuwile mawalo yake kwandusila siku viyasegele mfalume Yelusalemu mbaka siku viyakalile kobwela kwa tindiwalo. 25 Viyalawile Yelusalemu kumuhowela mfalume, mfalume kamulongela Mefiboshesi, "Habali huhitile hamwe na niye?"

26 Nayo kamwidika, "Mwenevale wangu mfalume, msang'hani wangu kanivwizila. Niye msang'hani wako nimulongela Siba, ‘Nikile goya chigoda cha chihongwe nidahe kukwela kuhita hamwe na mfalume.’ Kwaviya niye msang'hani wako ni mbetembete. 27 Nayo kakuvwizila weye kusonhela niye msang'hani wako. Mbali weye mwenevale wangu mfalume kulinga fana viya msenga wa kuulanga, ivo tenda jojose diugesa. 28 Kwaviya ndugu wose wa tati yangu wakala fana viya wanhu wa kudanganika haulongozi wa mwenevale wangu mfalume, mbali kunika niye msang'hani wako wa iwawo woja mwiimeza yako. Kwa ivo nidahe kumulamba mfalume kwa chinhu chochose?"

29 Ivo mfalume kamulongela, "Habali kogendelela kulonga mbuli izo? Niye nolamula, weye na Siba mwiigolele isi."

30 Mefiboshesi kamulongela mfalume, "Mulekele hata vose yasole yeye kwaviya sambi mwenevale wangu mfalume kobwela vinogile."

31 Balizilai Mgileadi kafika kulawa Logelimu muladi yoloke Yoludani hamwe na mfalume. 32 Balizilai kakala mulala ng'hani yeli na miyaka malongo manane. Kakala kamwing'ha ndiya mfalume baho viyakalile Mahanaimu kwaviya kakala munhu yeli na vinhu vingi. 33 Nayo mfalume kamulongela Balizilai, "Loka hamwe na niye na ukale na niye uko Yelusalemu. Niye nizakwing'ha viya vovilondeka kumwako."

34 Mbali Balizilai kamulongela mfalume, "Vino nina miyaka mingahi ya kukala mbaka nihite na mfalume uko Yelusalemu? 35 Nina miyaka malongo manane, vino nodaha kufambula mbuli inogile na ihile? Vino niye msang'hani wako nodaha kuvimanya kulanza chinhu chonija hebu choning'hwa? Vino ning'hali nohulika madizi ya wembaji wa chilume na ya wembaji wa chike? Habali niye msang'hani wako nyongeze mbahasha kwa mwenevale wangu mfalume? 36 Niye msang'hani wako nizaloka Yoludani hamwe na mfalume kwa utali mdodo muhala. Mbali habali mfalume kuning'ha gweko fana ijo? 37 Nileke niye msang'hani wako nibwele muladi nikadanganikile kuna dibululu jangu mwenyewo habehi na maleme ya tati yangu na mami yangu. Mbali kabahano msang'hani wako Kimhaimu. Muleke yaloke hamwe na weye mwenevale wangu mfalume. Umtendele mbuli zozikunogeza weye."

38 Mfalume kamulongela Balizilai, "Kimhaimu kezaloka Yoludani hamwe na niye na niye nizamtendela mbuli zozikunogeza. Weye iviya nizakutendela mbuli zozikunogeza."

39 Ivo wanhu wose waloka Yoludani, maabaho mfalume nayo kaloka. Mfalume kamnonela Balizilai na kumtemela mate. Balizilai kabwela ukaye yake.

40 Mfalume viyalokile kuhita Giligali, Kimhaimu kaloka hamwe nayo. Mabumbila yose ya watowang'hondo wa Yuda na nusu ya mabumbila ya watowang'hondo wa Isilaili wamulosa mfalume.

41 Wanhu wose wa Isilaili weza kwa mfalume na kumulongela, "Habali ndugu zetu wanhu wa Yuda wakubweleza weye mfalume kwa mvisa na wakulosa umwambu wa Yoludani, weye na kaye yako hamwe na wanhu wako wose?"

42 Wanhu wose wa Yuda wawedika wanhu wa Isilaili, "Chitenda vino kwaviya mfalume ni ndugu yetu. Habali muna ludoko na mbuli ino? Vino chija chinhu chochose cha mfalume? Vino chisola chinhu chochose kwa ichimu chetu wenyewo?"

43 Wanhu wa Isilaili wawedika wanhu wa Yuda, "Cheye niiyo wochilondeka kuwa na mfalume miyanza longo kufosa mweye. Lelo habali mochizeha? Vino hachiwile wa mwanduso kulonga kusonhela kumbweleza mfalume?"

Mbali wanhu wa Yuda wedika kwa ukali ng'hani kufosa wanhu wa Isilaili.