1 Yoabu mwana wa Seluya kavimanya kuwa mfalume kakala yogesa ng'hani kumuwona Abisalomu. 2 Ivo Yoabu katuma wanhu uko Tekoa wamulondele mwanamke yeli na ubala. Lusita viyafikile kamulongela, "Itende fana kwa muindilo na sekeuibobode mavuta mbali uvale mawalo ya ndilo. Lelo uitende fana mwanamke yeli muindilo kwa lusita lutali. 3 Maabaho hita kwa mfalume ukamulongele mbuli zonikulongele." Maabaho Yoabu kamulongela mwanamke mbuli ya kulonga.

4 Mwanamke kulawa Tekoa kamuhitila mfalume na kumtumbala mavindi mbaka chihanga chidalisa hasi kwa hishima na kalonga, "Weye mfalume, nitaze!"

5 Mfalume kamuuza "Kogazigwa na choni?"

Nayo kamwidika, "Kweli namgane. Mulumangu kadanganika. 6 Mwenevale, nikala na wana wa chilume waidi, siku dimwe viwakalile kumgunda wandusa kuitowa. Kwaviya hakuwile na munhu yoyose wa kuwalamula, imwe kamtowa miyage na kamkoma. 7 Lelo ndugu zangu wose wanihinduka. Wolonda nimulave kumwawo mwana iyamkomile miyage wadahe kumkoma kwa kuliha ugima wa ndugu yake. Mbali wolonda kumkoma muladi wasole uhazi wake. Lelo wahatenda ivo wezasegeza huwilo jangu dodisigale na zina da mulumangu na lukolo lwake lwizakwaga muna iisi."

8 Mfalume kamulongela mwanamke ija, "Bwela ukaye yako. Niye nizailola goya mbuli yako."

9 Mwanamke ija kulawa Tekoa kamulongela, "Mwenevale wangu, ubananzi wose ukale kumwangu na muna uwelesi wangu. Mbali weye na ufalume wako sekemuwe na ubananzi."

10 Mfalume kamwidika, "One munhu yoyose yahakulonga mbuli yoyose, mgale kumwangu na hezabwelela kukugaza kaidi."

11 Mwanamke kamulongela, "Nokulamba mfalume nipulile kwa Mndewa Mulungu, Mulungu wako, muladi ndugu yangu yolihiza chisasi cha ukomaji wa mwanangu sekeyongeze ubananzi umwenga wa kumkoma mwanangu ija imwenga."

Mfalume Daudi kamulaganila, "Noilaha fana Mndewa Mulungu voyokala, habule hata lunyele lumwe lwa mwanago londalulagale."

12 Mwanamke ija kamulongela, "Nokulamba mwenevale wangu, unilekelele nilonge mbuli imwe muhala kumwako."

Nayo kamwidika, "Haya longa."

13 Mwanamke kamulongela, "Habali kuilunga kutenda mbuli zino kwa wanhu wa Mulungu? Kwa ichimu cha ulamuzi wako muna imbuli ino weye mwenyewo kuitagusa kuwa mbananzi, kwaviya humbweleze ija yawingigwe. 14 Cheye chizadanganika. Cheye chilinga fana mazi viyokwitika hasi, hayadahika kuzoleka kaidi. Mbali Mulungu hasegeza ugima wetu, yeye kotenda nzila muladi ija yawingigwe yadahe kubwela. 15 Niye niza kulonga na weye mwenevale wangu mfalume kwaviya wanhu wanitenda niwe na ludumbo. Nigesa, ‘Nizalonga na mfalume yahadahika kezanitendela niye msang'hani wake chonipula. 16 Kwaviya mfalume kezanihulika na kuchilopola niye na mwanangu kulawa muna yamakono ya wanhu walondile kuchikoma na kuchisegeza muna uhazi woyaching'hile Mulungu.’ 17 Ivo niye nilonga, ‘Mbuli ya mwenevale wangu mfalume inigalile tindiwalo, kwaviya mwenevale wangu mfalume kalinga fana msenga wa kuulanga wa Mulungu, yofambula yanogile na yehile. Mndewa Mulungu yawe hamwe na weye.’ "

18 Mfalume kamulongela mwanamke ija, "Nizakuuza mbuli, weye kolondeka sekeunifise ukweli."

Mwanamke ija kamwidika, "Niuze mbuli yoyose mwenevale wangu."

19 Daudi kamuuza, "Vino Yoabu kakutuma kumwangu?"

Mwanamke ija kamwidika, "Mwenevale wangu, noilaha kwa ugima wako kuwa habule munhu yodaha kukufisa mbuli. Ona, Yoabu niiyo yanilagilize na yanilongele mbuli za kulonga. 20 Yoabu katenda ivo muladi ugalule magesa yako kusonhela Abisalomu. Mbali weye, mwenevale wangu kuna ubala fana viya wasenga wa kuulanga wa Mulungu na kovimanya chila chinhu chochilawilila muna iisi."

21 Mfalume kalagiliza Yoabu yagaligwe, viyafikile kamulongela, "Notogola na kutenda. Lelo mbweleze ukaye mbwanga ija Abisalomu."

22 Yoabu kagwa hasi chingubingubi na katumbala mavindi mbaka chihanga chake chidalisa hasi, maabaho kamtemela mate mfalume, kalonga, "Diyelo niye msang'hani wako novimanya kuwa nitogoligwa haulongozi wako kwaviya kunitendela chinipulile."

23 Ivo Yoabu kahita Geshuli kumbweleza Abisalomu Yelusalemu. 24 Mbali mfalume kalonga, "Abisalomu yahite kwiikaye yake. Kolondeka sekeyachiwone chihanga changu." Ivo Abisalomu kahita kuna ikaye yake na hachiwone chihanga cha mfalume.

25 Muna isi yose ya Isilaili habule hata munhu imwe yatogoligwe kuwa kanoga fana Abisalomu, kwandusila hadidosi jake mbaka muna ulwayo kakala yatelele lukuli lwose. 26 Chila lusita viyawegule nyele zake, kwa viya kakala yowegula mwanza umwe kwa mwaka, nyele zake zikala zizamile ng'hani. Viyazipimile zikala chilo mbili kwa chipimo cha chifalume. 27 Abisalomu kakala na wana watatu wachilume, hamwe na mndele imwe zina jake Tamali, yoyakalile lumondo.

28 Abisalomu kakala Yelusalemu miyaka midi bila ya kumuwona mfalume. 29 Maabaho Abisalomu kamtanga Yoabu kwa lungilo da kumtuma kwa mfalume, mbali Yoabu kalema kwiza kwa Abisalomu. Maabaho kamtanga mwanza wekaidi, mbali kalema kwiza. 30 Ivo Abisalomu kawalongela wasang'hani wake, "Loleni Yoabu kana mgunda wa shaili habehi na mgunda wangu, hiteni mukaulunguze." Ivo wasang'hani wa Abisalomu waulunguza mgunda wa Yoabu kwa moto.

31 Yoabu kahita ukaye kwa Abisalomu kumuuza, "Habali wasang'hani wako waulunguza mgunda wangu?"

32 Abisalomu kamwidika Yoabu, "Lola nikugalila usenga kwiza kuno nidahe kukutuma kwa mfalume kumulongela, ‘Vino habali nisegela Geshuli? Yahawile vinoga kumwangu kusigala uko.’ Lelo nitaze kumuwona mfalume. One nina ubananzi nayanikome."

33 Yoabu kahita na kumulongela mfalume mbuli izo zose. Maabaho Daudi kamtanga Abisalomu, nayo kengila kwa mfalume na kamtumbalila mavindi mbaka chihanga chidalisa hasi. Na mfalume kamnonela Abisalomu.