1 Vizifosile mbuli izo, Abisalomu, mwana wa Daudi kakala na lumbu lumondo yatangigwe Tamali. Nayo Aminoni, mwana wa Daudi kamulonda.

2 Tamali kakala mhambe na kwa ichimu cha wakalizi wake, Aminoni hadahile kumtendela chochose. Mbali Aminoni kanogelwa ng'hani na Tamali mbaka kawa mtamu. 3 Mbali Aminoni kakala na mbwiyake yatangigwe Yonadabu, mwana wa Shama ndugu wa Daudi. Yonadabu kakala mbala ng'hani. 4 Yonadabu kamulongela Aminoni, "Weye kwa mwana wa mfalume, habali kosoka na kowoneka husangalala chila siku? Vino habali hulonda kunilongela?"

Aminoni kamwidika, "Nomulonda Tamali, lumbu jake Abisalomu,* ndugu yangu."

5 Yonadabu kamulongela, "Itende kuwa kwa mtamu na tambalala mudikomwa. Tati yako yaheza kukulaula, mulongele, ‘Mulekele Tamali lumbu jangu yeze yanigalile ndiya nije. Nolamba mulekelele yeze kunisasalila ndiya haulongozi wangu, muladi yanyang'hize.’ " 6 Aminoni kaitenda fana mtamu na katambalala muna dikomwa.

Mfalume Daudi kahita kumulaula na Aminoni kamulongela, "Nolamba Tamali yeze yanisasalile magate chidogo kuno nomulola. Maabaho yeye mwenyewo yanilise."

7 Ivo Daudi kamtuma msenga yamulongele Tamali kuna imhong'hono, "Hita kwiikaye ya lumbu jako Aminoni ukamsasalile ndiya." 8 Tamali kahita kuna ikaye ya Aminoni, lumbu jake. Kamfika katambalala hasi. Kasola usage kabuluga kwa makono na kamsasalila magate kuno Aminoni komulola. Maabaho kayambika. 9 Tamali kasola chikalango na kamkwenhukila Aminoni haulongozi wake mbali kalema kuja. Nayo Aminoni kalonga, "Mweye mose laweni kunze." Baho wanhu wose walawa. 10 Maabaho Aminoni kamulongela Tamali, "Nigalile magate yayo muchiheleto changu na unyang'hize." Tamali kasola yamagate yoyatendile na kuyagala muna ichiheleto cha Aminoni, lumbu jake. 11 Mbali viyakalile yomgalila magate lumbu jake muladi yaje, Aminoni kamgwila Tamali na kamulongela, "Izo ugone na niye lumbu jangu."

12 Tamali kamwidika, "Siivo bule lumbu jangu, sekeuniwangilize. Mbuli ino hailondeka kutendeka muna iisi ya Isilaili! Sekeutende mbuli ino ya mdukula. 13 Niye sidaha bule kufunyila umoyo chinyala icho. Na kwa ubanzi wako kwizakuwa imwe wa wabozi wa Isilaili. Lelo niye nokulamba ulonge na mfalume kwaviya hezalema unisole." 14 Mbali Aminoni hatogole kumtegeleza Tamali na kwaviya kakala na nguvu kumfosa Tamali, kambandama kwa nguvu.

15 Haichanduso Aminoni kakala komulonda ng'hani mbali lelo kamwihila ng'hani kufosa viya viyamulondile. Kamulongela Tamali, "Inuka ulawe kunze!"

16 Tamali kamwidika "Siivo bule, wihi uno wa kuniwinga wiha ng'hani kufosa uja wounitendele."

Mbali Aminoni halondile kumtegeleza. 17 Kamtanga mbwanga yomsang'hanila na kamulongela, "Msegeze muke ino haulongozi wangu! Mulave kunze na hinda ulwivi!" 18 Maabaho msang'hani kamulava kunze na kahinda ulwivi.

Tamali kakala yayawale walo tali dili na makono matali, kwaviya niivo viwayawale wandele wa mfalume wakalile mhambe lusita ulo. 19 Tamali kaihaka maivu mditwi kadidega walo jake na kageleka yamakono mditwi, maabaho kasegela kuno kolila kwa dizi kulu. 20 Abisalomu lumbu jake kamulongela, "Vino Aminoni lumbu jako kagona na weye? Nyamala mwali wangu kwaviya iyo ni lumbu jako. Sekewiike mbuli iyo muumoyo wako." Ivo Tamali kakala muna ikaye ya Abisalomu, lumbu jake kuno kana lugano na kadumwe.

21 Mfalume Daudi viyahulike mbuli izo zose, kengilwa na ludoko. 22 Abisalomu kamwihila ng'hani Aminoni mbaka halongile nayo dinogile hebu dihile, kwaviya kamguma chinyala lumbu jake Tamali.

23 Miyaka midi hamwande, Abisalomu kakala na wasang'hani wa kukanha mazoya ya ng'hondolo uko Baali Hazoli ili ubanzi wa Efulaimu. Nayo Abisalomu kawagoneka wana wa chilume wose wa mfalume.

24 Abisalomu kamuhitila mfalume na kumulongela, "Lola niye ninawo wakanha mazoya ng'hondolo. Nokulamba weye mfalume hamwe na wasang'hani wako, muhite hamwe na niye."

25 Mfalume kamwidika, "Siivo bule mwanangu. Sekechihite chose, sekechiwe mbahasha kumwako." Mbali Abisalomu kamulamba ng'hani tati yake yahite. Mfalume kalema, mbali kamtemela mate.

26 Maabaho Abisalomu kamulongela, "One huhita, lelo mulekelele ndugu yangu Aminoni chihite nayo."

Mfalume kauza, "Habali yahite na mweye?" 27 Mbali Abisalomu kagendelela kumulamba mbaka mfalume kamulongela Aminoni na wanage wamwenga wahite hamwe nayo. Abisalomu kasasala dugila difaya da chifalume.

28 Abisalomu kawalongela wasang'hani wake, "Muloleni Aminoni vondayang'we divai na kudeng'helela. Vondanimulongeleni, ‘Mumtowe Aminoni,’ mumkome. Sekemumdumbe, yayo niyayo malagilizo kumwenu. Mugangamale na muwe magalu." 29 Wasang'hani wa Abisalomu wamtendela Aminoni fana viwalagilizigwe na Abisalomu. Maabaho wana wa chilume wa mfalume wasegela. Chila imwe wawo kakwela mnyama wake yalingile fana chihongwe na kukimbila. 30 Viwakalile wang'hali mzila Daudi kapata usenga kuwa Abisalomu kawakoma wana wose wa chilume wa mfalume na habule hata imwe wawo yoyasigale. 31 Mfalume Daudi kenuka na kayadega mawalo yake kwa usungu, kagona hasi. Iviya wasang'hani wake wose wowakalile wema habehi nayo wayadega mawalo yawo. 32 Mbali Yonadabu, mwana wa Shama, ndugu yake Daudi kamulongela, "Mwenevale sekeugese wanago wose wakomigwa. Aminoni muhala niiyo yakomigwe, mbali Abisalomu kailunga kutenda mbuli iyo kwandusila lusita luja Aminoni viyamgumile chinyala lumbu jake Tamali. 33 Ivo mwenevale wangu, mfalume, sekeugese muumoyo wako kuwa wanago wose wa chilume wadanganika. Aminoni muhala niiyo yadanganike."

34 Mbali Abisalomu kakala kamala kukimbila. Mbwanga ija yakalile na zamu ya ukalizi kawona bumbila kulu da wanhu wokwiza ubanzi wa mulima kuna inzila ilawile Holonaimu. 35 Yonadabu kamulongela Daudi, "Waja wanago wokwiza, fana viya vinikulongele." 36 Lusita luja msang'hani viyakomeleze kulonga, wana wa chilume wa mfalume wengila na wandusa kulila ng'hani. Iviya Daudi na wasang'hani wake walila kwa usungu.

37 Mbali Abisalomu kakimbila kahita kwa Talimai mwana wa Amihudi yeli mfalume wa Geshuli. Mfalume Daudi kamulilila mwanage siku nyingi. 38 Abisalomu kakimbilila Geshuli na kakala uko kwa lusita lwa miyaka mitatu. 39 Mfalume kalonda kulawa kumuhitila Abisalomu kwaviya ndilo ya Aminoni ikala imalile.