1 Daudi kauza, "Vino hasigale hata munhu imwe muna ikaye ya Sauli? One kauko, nolonda kumulagusa ulondo wa kufunya umoyo kwa ichimu cha Yonasani."

2 Kukala na msang'hani imwe wa kaye ya Sauli yoyatangigwe Siba. Siba katangigwa kuhita kwa Daudi. Mfalume kamuuza, "Weye niiyo Siba?"

Nayo kamwidika, "Ona, niye ni msang'hani wako."

3 Mfalume kauza, "Vino hasigale hata munhu imwe muna ikaye ya Sauli muladi nidahe kumulagusa ulondo wa kufunya umoyo fana vinimulaganile Mulungu?"

Siba kamwidika mfalume, "Kauko mwana wa Yonasani kasigala, mbali mbetembete."

4 Mfalume kamuuza, "Iyo kakulihi?"

Siba kamwidika, "Kauko kuna ikaye ya Makili mwana wa Amieli uko Lodebali." 5 Ivo mfalume Daudi katuma wanhu wamgale kulawa Lodebali muna ikaye ya Makili mwana wa Amieli.

6 Ivo Mefiboshesi mwana wa Yonasani na mzukulu wa Sauli kafika. Viyafikile kwa Daudi katumbala mavindi mbaka chihanga chidalisa hasi na kumwing'ha mfalume hishima.

Daudi kamtanga, "Mefiboshesi!"

Mefiboshesi kamwidika, "Niiyo niye, msang'hani wako."

7 Daudi kamulongela, "Sekeudumbe, nizakulagusa ulondo wa kufunya umoyo kwa ichimu cha tati yako Yonasani. Mgunda wose ukalile wa wasaho yako Sauli nizakubwelezela na kwizakuja ndiya hana imeza yangu siku zose."

8 Mefiboshesi katumbala mavindi kalonga, "Mwenevale, vino habali kuwona vinoga kumwangu? Niye siyo chinhu kufosa imbwa yafile."

9 Maabaho mfalume kamtanga Siba, msang'hani wa Sauli, kamulongela, "Nimwing'ha Mefiboshesi, mzukulu wa mwenevale wako Sauli chila chinhu chochikalile cha Sauli na welesi wake. 10 Weye na wanago na wasang'hani wako mwizamulimila Mefiboshesi. Mwizamgalila mavuno mzukulu wa mwenevale wako kuwa ndiya yake. Mbali yeye kezakuja ndiya haimeza yangu." Lusita ulo Siba kakala na wana wa chilume longo na watano na wasang'hani malongo maidi.

11 Maabaho Siba kamwidika mfalume, "Nizatenda chila chinhu kwa kusondelela ndagilizi yako."

Ivo Mefiboshesi kakala koja ndiya yake kuna imeza ya Daudi, fana imwe wa wana wa mfalume. 12 Iviya Mefiboshesi kakala na mwana mdodo wa chilume yatangigwe Mika. Wanhu wose wa kaye ya Siba wakala wasang'hani wa Mefiboshesi. 13 Ivo Mefiboshesi yakalile mbetembete kakala uko Yelusalemu na chila siku kakala yoja ndiya mwiimeza ya mfalume.