1 Zino niizo mbuli za uhelelo za Daudi,

"Mbuli za Daudi mwana wa Yese,

munhu yatendigwe kuwa mkulu,

yoyasaguligwe na Mulungu wa Yakobo,

mtungaji nyila zinogile za Isilaili.

2 "Muhe wa Mndewa Mulungu ulonga kufosela niye,

mbuli yake ikala muna umulomo wangu.

3 Mulungu yeli luwe lwa Isilaili kanilongela,

‘Yoyotawala wanhu viya viilondeka,

na yoyotawala kwa kumdumba Mulungu,

4 yeye kalinga fana viya mhwani yau zuwa vidilawa imitondo,

imitondo ilibule mawingu,

fana mvula yoyokoteza mayani muisi.’

5 "Vino haili ivo kwa welesi wangu haulongozi wa Mulungu?

Kwaviya katenda na niye lagano da siku zose,

dodikigwe goya na kugangamizigwa.

Kezanitenda niudeng'helele ulopozi wangu,

na kuninogela chiya chinilonda.

6 Mbali wanhu wehi wezakwasigwa mumgwazo fana miwa ya mbago viikwasigwa,

kwaviya haiduganyigwa kwa makono.

7 Munhu yondayadalise miwa iyo,

yasang'hanile chiya cha chuma hebu muhini wa mgoha.

Miwa izanangigwa bahobaho kwa moto na wanhu wehi ivo ivo."

8 Yano niyayo mazina ya magalu woyakalile nawo Daudi. Yoshebu Bashebesi, Mhakimoni, yoyakalile mulangulizi wa waja watatu wakalile magalu wa watowang'hondo. Yeye katowa ng'hondo na mgoha wake na kawakoma wanhu magana manane kwa lusita lumwe kwiing'hondo.

9 Wekaidi wake kakala Eleazali mwana wa Dodo mwana wa Ahohi. Yeli mwa iwaja magalu watatu wowakalile hamwe na Daudi, viwawaligile Wafilisiti wakalile waiduganya uko muladi kwiitowa. Na watowang'hondo wa Waisilaili wakimbila. 10 Mbali Eleazali kema chigangamavu na kawakoma Wafilisiti mbaka mkono wake ulegela na ugendelela kwamhilila zele jake. Mndewa Mulungu kaweng'ha uhumi mkulu siku iyo. Mabumbila ya watowang'hondo ya Waisilaili yabwela kwa Eleazali kusola vinhu va Wafilisiti wakalile wadanganika.

11 Galu imwenga kakala Shama mwana wa Agi Mhalali. Wafilisiti viwaiduganye uko Lehi, hanhu hakalile mgunda umemile dengu, mabumbila ya watowang'hondo wa Isilaili wawakimbila Wafilisiti. 12 Mbali Shama kema chigangamavu muludonho wa mgunda uwo muladi kuugombela, nayo kawakoma Wafilisiti. Mndewa Mulungu kawapatila uhumi mkulu.

13 Lusita lwa kugobola, magalu watatu muna iwakulu wa watowang'hondo malongo matatu wahita kwa Daudi muna dituka da Adulamu na lusita ulwo bumbila da watowang'hondo da Wafilisiti wakala weka lago jawo muna dibawe da Lefaimu. 14 Lusita ulwo Daudi kakala muna dituka, bumbila da Wafilisiti dikala kudibululu da Beselehemu. 15 Daudi kakala na ng'hilu, kalonga, "Nolonda munhu yaning'he mazi ya kung'wa kulawa inzasa ili habehi na lwivi lukulu lwa kwingilila Beselehemu!" 16 Mbali magalu wawo watatu waibebenyeka kuna dilago da watowang'hondo wa Wafilisiti na kudeha mazi muna ichisima chiya chili habehi na hanhu ha kwingilila Beselehemu. Wamgalila Daudi, mbali Daudi kalema kuyang'wa na kayetila hasi kuwa nhosa kwa Mndewa Mulungu. 17 Daudi kalonga, "Sidaha kung'wa mazi yano, weye Mndewa Mulungu. Mazi yano yalinga fana damu ya magalu wano hawadumbile kudanganika kwa kunigalila mazi niye." Ivo Daudi hayang'wile.

Yayo ni yayo yawatendile waja magalu watatu.

18 Kaidi Abishai mdodo wake Yoabu mami yawo katangigwa Seluya kakala mulangulizi wa bumbila da magalu malongo matatu. Iyo kawakoma na mgoha wake wanhu 300. Nayo kawa na nhogolwa fana waja magalu watatu. 19 Kamanyika ng'hani mwa iwaja malongo matatu na kawa mulangulizi wawo, mbali hapetigwe mwa iwaja magalu watatu.

20 Benaya mwana wa Yehoyada kakala mtowang'hondo galu kulawa Kabiseeli, katenda mbuli nyingi za ugalu. Kawakoma magalu waidi wakalile magalu kufosa wose wa Moabu. Siku dimwe kahumuluka muna dikombo dikalile seluji na kamkoma simba. 21 Iviya kamkoma Mmisili yakalile mtali. Mmisili iyo kakala na mgoha mmakono, mbali Benaya kamgendela na mhome na kumuhoka Mmisili mgoha mmakono yake na kamkoma kwa mgoha wake mwenyewo. 22 Zino zikala mbuli za ugalu wa Benaya mwana wa Yehoyada, nayo iviya kakala yamanyike ng'hani fana waja magalu watatu. 23 Kapata hishima ng'hani kufosa waja malongo matatu, mbali hapetigwe mwa iwaja magalu watatu. Daudi kamwika kuwa mkulu wa wakalizi wake mwenyewo.

24 Mwaiwawo malongo matatu wakala Asaheli mdodo wake Yoabu na Elihanani mwana wa Dodo kulawa Beselehemu 25 na Shama Mhalodi na Elika Mhalodi 26 na Helesi kulawa Paliti na Ila mwana Ikeshi kulawa Tekoa 27 na Abiezeli kulawa Anasosi na Mebunai kulawa Hushahi 28 na Salimoni Mwahohi na Mahalai kulawa Netofasi 29 na Helebi mwana wa Baana kulawa Netofasi na Itayi mwana wa Libai kulawa Gibea wawo wa kabila da Benyamini 30 na Benaya wa uko Pilasoni na Hidayi kulawa habehi na vizanda va Gaashi 31 na Abi Aliboni Mwalaba na Azimavesi wa uko Bahulimi 32 na Eliaba wa uko Shaaliboni na wanage Yasheni na Yonasani 33 na Shama kulawa Halali na Ahiamu mwana wa Shalali kulawa Halali 34 na Elifeleti mwana wa Ahasabai kulawa Maakasi na Eliamu mwana wa Ahitofeli kulawa Giloni 35 na Hezilo kulawa Kalimeli na Paalai kulawa Alibi 36 na Igali mwana wa Nasani kulawa Soba na Bani kulawa kabila da Gadi 37 na Seleki Mwamoni na Nahalai yolawa Beelosi yakalile mpagazi wa via va ng'hondo va Yoabu mwana wa mwanamke Seluya 38 na Ila Muisilite na Galebu Muisilite 39 na Uliya Muhiti. Magalu wose hamwe na wano malongo matatu, wakala malongo matatu na saba.