1 Mndewa Mulungu kawawonela ludoko kaidi Waisilaili na kamtenda Daudi kuwagalila magayo. Kamulongela, "Hita ukawapete wanhu wa Isilaili na wanhu wa Yuda."

2 Ivo mfalume kamulongela Yoabu mkulu wa watowang'hondo hamwe na waja wakalile hamwe nayo, "Zunguluka ivino sambi muna yamakabila yose ya Isilaili, kwandusila Dani mbaka Belisheba mukawapete watowang'hondo muladi nivimanye wengahi."

3 Mbali Yoabu kamwidika mfalume, "Mndewa Mulungu, Mulungu wako, yongeze wanhu miyanza gana mfalume yang'hali mgima. Mbali habali mwenevale wangu kolonda kutenda mbuli ino?"

4 Mbuli ya mfalume imuhuma Yoabu na walangulizi wa watowang'hondo, ivo wasegela kwa mfalume na wandusila kuwapeta watowang'hondo wa Isilaili. 5 Viwakomeleze kuloka Yoludani, weka lago uko Aloeli, ubanzi wa kusi wa bululu dili hagati ya bawe, kusonhela Gadi na Yazeli. 6 Wahita bululu da Kadeshi muna iisi ya Gileadi, yili iisi ya Wahiti. Wagendelela mbaka Dani Yaani na kuzunguluka kusonhela Sidoni. 7 Maabaho wahita kusonhela mhongono ya Tilo hamwe na mabululu yose ya Wahivi na ya Wakanaani, wahita mbaka Belisheba mbaka ubanzi wa kusi wa Yuda. 8 Viwakomeleze kufosa isi yose, wabwela Yelusalemu viimalile miyezi kenda na siku malongo maidi. 9 Yoabu kalava peta ya watowang'hondo kwa mfalume. Muna Isilaili kukala wanhu 800,000 weli na udahi wa kuitowa na muna isi ya Yuda kukala wanhu 500,000.

10 Daudi moyo wake unyunguwala viyakomeleze kuwapeta watowang'hondo, nayo kamulongela Mndewa Mulungu, "Nitenda uhasanyi mkulu kwa chiya chinitendile. Lelo nokupula weye Mndewa Mulungu, unisegezele ubananzi uno niye msang'hani wako. Nitenda mbuli za ubozi." 11 Na Daudi viyalamke imitondo, mbuli ya Mndewa Mulungu imwizila Gadi yoyomulotela Daudi na kalonga, 12 "Hita ukamulongele Daudi, Mndewa Mulungu kolonga vino, ‘Nina mbuli nhatu za kukulongela, weye usagule imwe na niye nizatenda.’ " 13 Ivo Gadi kahita kwa Daudi, kamulongela, "Vino kwizasagula miyaka mitatu ya nzala muna iisi yose hebu miyezi mitatu ya kuwakimbila wehi wako hebu siku nhatu za hulo kulu muna iisi yako? Ugese na unilongele chiusagule muladi nimulongele Mndewa Mulungu yanitumile." 14 Daudi kamulongela Gadi, "Nina usungu ng'hani, lelo silonda kutagusigwa na wanhu mbali muleke Mndewa Mulungu yeye mwenyewo yachitaguse kwaviya kana ubazi ng'hani." 15 Mndewa Mulungu kawagalila hulo muna iisi ya Isilaili imitondo ija ija na kugendelela kwa siku nhatu. Wanhu 70,000 wadanganika uko Dani mbaka uko Belisheba. 16 Msenga wa kuulanga kagolosa mkono wake muladi kuinanga Yelusalemu mbali Mndewa Mulungu kagalula choyailungile kutenda muumoyo wake kuwatagusa wanhu. Kamulongela ija msenga yoyakalile yowananga wanhu, "Leka! Yofaya, bweleza mkono wako." Lusita ulwo msenga wa kuulanga kakala hana ihanhu ha kubigila ndiya ha Alauna Myebusi. 17 Daudi viyamuwone msenga wa kuulanga iyo yowakoma, kamulongela Mndewa Mulungu, "Niye nihasanya na nitenda chinhu chino chihile. Wanhu wano walinga fana ng'hondolo. Watenda choni? Nitaguse niye na welesi wangu."

18 Siku iyo Gadi kamuhitila Daudi na kumulongela, "Hita ukamzengele Mndewa Mulungu lupango hana ihanhu ha kuhululila ha Alauna Myebusi." 19 Ivo Daudi kahita fana Mndewa Mulungu viyamulongele kufosela Gadi. 20 Alauna viyawawone mfalume na wasang'hani wake womwizila, kalawa kunze na kamtumbalila mavindi mbaka chihanga chake chidalisa hasi.

21 Alauna kalonga, "Mwenevale wangu mfalume kamwizila msang'hani wake kwa lungilo dilihi?" Daudi kalonga, "Niza kugula hanhu hako ha kubigila ndiya nimzengele lupango Mndewa Mulungu, muladi hulo dino dileke kukoma wanhu."

22 Alauna kamulongela Daudi, "Mwenevale wangu mfalume, usole chochose chochikunogela na uchilave nhambiko. Hano hana ng'ombe wa kulimila kwa ichimu cha nhambiko ya kutimbula, iviya kuna mibiki ya kubigila na mibiki ya kufungila ng'ombe muisingo kwa ichimu cha ngodi. 23 Niye nokwing'ha vinhu vino vose." Maabaho Alauna kamulongela mfalume, "Mndewa Mulungu wako yakutogole."

24 Mbali mfalume kamwidika Alauna, "Siivo, nokanhamiza kuvilihila kumwako kwa hela yoilondeka. Sidaha kumulavila Mndewa Mulungu, Mulungu wangu nhambiko za kutimbula sizilihile chochose."

Ivo Daudi kagula hanhu ha kuhululila hamwe na ng'ombe kwa shekeli za hela malongo matano. 25 Daudi kamzengela Mndewa Mulungu lupango uko na kulava nhambiko za kutimbula na nhambiko za kugala tindiwalo. Maabaho Mndewa Mulungu kedika chiyampulile kwa ichimu cha isi. Hulo dimala muna iisi ya Isilaili.