1 Vizifosile mbuli izo, Daudi kamuuza Mndewa Mulungu, "Vino nihite bululu dimwe muna yamabululu yeli Yuda?"

Mndewa Mulungu kamwidika, "Hita."

Daudi kamuuza, "Nihite bululu dilihi?"

Mndewa Mulungu kamwidika, "Hita bululu da Hebuloni." 2 Ivo Daudi kahita Hebuloni hamwe na wake zake waidi, Ahinoamu yalawile Yezileeli na Abigaili mgane wa Nabali yalawile Kalimeli. 3 Daudi kawasola wanhu wakalile hamwe nayo, chila munhu na kaye yake. Wakala muna dibululu da Hebuloni na vibululu vake. 4 Maabaho wanhu wa kabila da Yuda weza Hebuloni na kumuhaka mavuta Daudi muladi yawe mfalume wawo.

Daudi viyalongeligwe kuwa wanhu wa Yabeshi Gileadi wawo wamuwandile Sauli, 5 Daudi katuma wasenga kwa wanhu wa Yabeshi Gileadi, kawalongela, "Mndewa Mulungu yamtemeleni mate, kwaviya mumtendela vinogile Sauli mwenevale wenu kwa kumuwanda. 6 Lelo Mndewa Mulungu yamulaguseni ulondo wa kufunya umoyo na waminika, niye iviya nizamulagusani unovu kwaviya mutenda mbuli iyo. 7 Ivo muwe wagangamavu na magalu, kwaviya Sauli mwenevale wenu kadanganika na wanhu wa kabila da Yuda wanihaka mavuta niwe mfalume wawo."

8 Abineli mwana wa Neli, mkulu wa watowang'hondo wa Sauli, kakala kamsola Ishiboshesi mwana wa Sauli na kumgala uko Mahanaimu. 9 Kamtenda Ishiboshesi yawe mfalume wa isi ya Gileadi na Asheli na Yezileeli na Efulaimu na Benyamini na Isilaili yose. 10 Ishiboshesi mwana wa Sauli kakala na miyaka malongo mane viyatendigwe kuwa mfalume wa Isilaili. Kalanguliza miyaka midi, mbali kabila da Yuda wamsondelela Daudi. 11 Daudi kakala mfalume wa kabila da Yuda uko Hebuloni kwa miyaka saba na miyezi sita.

12 Abineli mwana wa Neli, hamwe na wasang'hani wa Ishiboshesi mwana wa Sauli, wasegela bululu da Mahanaimu wahita bululu da Gibeoni. 13 Yoabu yelekigwe na mwanamke Seluya na wasang'hani wa Daudi, walawa kuhita kuiting'hana nawo habehi na sima da Gibeoni, wamwenga wakala ubanzi uno na wamwenga ubanzi uja wa chisima.

14 Abineli kamulongela Yoabu, "Walekelele wabwanga kulawa chila ubanzi waitowe mkono kwa mkono haulongozi wetu."

Yoabu kamwidika, "Vinoga, waleke watende ivo."

15 Ivo wasegela, wahita kuumwambu wa chisima icho, peta yawo wakala wanhu longo na waidi ubanzi wa Ishiboshesi mwana wa Sauli kulawa kabila da Benyamini na, wanhu longo na waidi ubanzi wa Daudi. 16 Chila munhu kagwila muna iditwi da miyage na kumkanha na panga muna ulubavu lwa miyage na wadanganika hamwe. Hanhu baho uko Gibeoni hatangigwa Helikasi Hasulimu*.

17 Ng'hondo ya siku iyo ikala ng'hulu ng'hani. Abineli na wanhu wa Isilaili watowigwa na watowang'hondo wa Daudi mbaka wapotwa. 18 Wana watatu wa Seluya iviya wakala uko, Yoabu na Abishai na Asaheli. Asaheli kadaha kukimbila fana mhala. 19 Asaheli kamuwinga Abineli bila kubaguka ukulume hebu ukumoso. 20 Abineli kahinduka kuchisogo, kamuuza, "Vino weye Asaheli?"

Nayo kamwidika, "Iyo niye."

21 Abineli kamulongela, "Leka kuniwinga niye, hinduka ukulume hebu ukumoso umgwile mbwanga imwenga na uvisole viya vake va ng'hondo." Mbali Asaheli hatogole kuhinduka na halekile kumuwinga.

22 Abineli kamulongela Asaheli mwanza wekaidi, "Leka kuniwinga! Habali nikukome? Nizamulolaze sekulu wako Yoabu muna ichihanga?"

23 Mbali Asaheli kalema kuhinduka. Ivo Abineli kamuhoma muna umunda na nhonga ya mgoha wake kwa kuchisogo na umgoha ulawila kumgongo wa Asaheli. Asaheli kagwa hasi na kadanganika bahobaho. Wanhu wose wafikile baho hoyagwile Asaheli na kudanganika, wema.

24 Mbali Yoabu na Abishai wamuwinga Abineli, zuwa vidingile wafika kuna umulima wa Ama, ukalile ubanzi wa ulawilo wa zuwa wa Giya, kuna inzila ihita kuichuwala cha Gibeoni. 25 Wanhu wa kabila da Benyamini waiduganya hamwe kuilumba na Abineli, wawa chibumbila chimwe, wema uchanyha ya mulima.

26 Maabaho Abineli kamtanga Yoabu, kalonga, "Vino chizaitowa siku zose? Vino huwona kuwa uhelelo wake wizakuwa usungu? Vino zuwaki kwizawalongela wanhu wako waleke kuwawinga ndugu zawo?"

27 Yoabu kalonga, "Fana Mulungu viyokala, one hulongile ivo, wanhu wahagendelele kuwawinga ndugu zawo mbaka igolo imitondo."

28 Ivo Yoabu katowa mhalati na wanhu wose wema, waleka kuwawinga Waisilaili na hawaitowile kaidi.

29 Abineli na wanhu wake wafosa kolongo da Alaba ichilo chose, waloka lwanda lwa Yoludani, wagendelela imitondo yose mbaka wafika Mahanaimu.

30 Yoabu kabwela kulawa kumuwinga Abineli na kawaduganya hamwe wanhu wake wose na kawapeta. Watowang'hondo wa Daudi wahunguka longo na kenda hamwe na Asaheli. 31 Mbali watowang'hondo wa Daudi wawakoma wanhu wa kabila da Benyamini magana matatu na malongo sita wowakalilile hamwe na Abineli. 32 Yoabu na wanhu wake wasola mtufi wa Asaheli na wauwanda kuna dileme da tati yake uko Beselehemu. Maabaho wagenda ichilo chose na chilochilo wafika kuna dibululu da Hebuloni.