1 Vizifosile mbuli izo, Daudi kawatowa Wafilisiti na kawahuma. Daudi kadisola bululu da Mesige Amma kulawa muna yamakono ya Wafilisiti.

2 Viyafosile yayo Daudi kawahuma Wamoabu. Kawalongela wagone hasi kwa msitali na kuwalinga kwa utali wa luzabi. Chila viyalingile utali wa luzabi uwo miyanza midi bumbila ijo dikomigwa. Viyalingile lweketatu bumbila ijo hadikomigwe bule. Wamoabu wakala watumwa wa Daudi na wamuliha kodi.

3 Maabaho Daudi kamuhuma Hadadezeli, mwana wa Lehobu mfalume wa Soba, viyahitile kutawala kaidi hanhu ha lwanda lwa Efulate. 4 Daudi kawahoka wakwelafalasi 1,700 na watowang'hondo wogenda kwa magulu 20,000. Maabaho Daudi kawakanha imige falasi waja wobulula matololi, mbali falasi gana dimwe kawasigaza.

5 Baho Washami kulawa Damasiki viwezile kumtaza Hadadezeli mfalume wa Soba, Daudi kawakoma wanhu 22,000. 6 Maabaho Daudi kaweka watowang'hondo muna ufalume wa Washami uko Damasiki, Washami wawo wamsang'hanila Daudi na kumuliha kodi. Mndewa Mulungu kamtenda Daudi yahume chila hanhu hoyahitile.

7 Baho Daudi kazisola ngao za zahabu ziwamhile watowang'hondo wa Hadadezeli na kazigala Yelusalemu. 8 Iviya kasola shaba nyingi ng'hani kulawa na Beta na Belosai mabululu ya Hadadezeli.

9 Mfalume Toyi wa Hamasi viyahulike kuwa Daudi kadihuma bumbila jose da watowang'hondo da Hadadezeli, 10 kamtuma Yolamu mwanage kwa mfalume Daudi kumulamsa na kumuhongeza kwaviya kakala kaitowa na Hadadezeli na kumuhuma, iviya Hadadezeli kaitowa na Toyi miyanza mingi. Yolamu kamgalila Daudi vitumetume va viya vovitendigwe kwa hela na zahabu na shaba. 11 Mfalume Daudi kavika hakwe viya vino kwa Mndewa Mulungu fana viya viyatendile kwa hela na zahabu kulawa muna izisi zose zoyazihumile. 12 Zisi izo ni Edomu na Moabu na Amoni na Filisiti na Amaleki, iviya keka hakwe vinhu viyahokile kulawa kwa Hadadezeli mwana wa Lehobu mfalume wa Soba.

13 Daudi kamanyika ng'hani viyakalile kobwela viyamalile kuwakoma Waedomu 18,000 kuna Dibawe da Munyu.

14 Keka malago ya watowang'hondo muna iisi yose ya Edomu. Waedomu wose wa uko wawa wasang'hani wa Daudi. Mndewa Mulungu kamtenda Daudi yahume chila hanhu hoyahitile.

15 Daudi katawala Isilaili yose na katagusa voilondeka kwa wanhu wake wose. 16 Yoabu yelekigwe na mwanamke Seluya, kakala mkulu wa mabumbila ya watowang'hondo. Yehoshafati, mwana wa Ahiludi kakala mwikaji lukumbuso wa mfalume. 17 Sadoki, mwana wa Ahitubu na Ahimeleki, mwana wa Abiasali wakala wakulu wa nhambiko. Selaya kakala mwandikaji. 18 Benaya, mwana wa Yehoyada kakala mulangulizi wa Wakelesi na Wapelesi. Na wana wa Daudi wakala wakulu wa nhambiko.