1 Ishiboshesi, mwana wa Sauli viyahulike kuwa Abineli kadanganika uko Hebuloni, kafa moyo na Waisilaili wose wadumba. 2 Ishiboshesi kakala na wanhu waidi wowakalile walangulizi wa vibumbila va watowang'hondo, zina da imwenga katangigwa Baana na zina da wekaidi katangigwa Lekabu, wanage Limoni, munhu wa kabila da Benyamini kulawa bululu da Beelosi. Beelosi ikala hanhu ha kabila da Benyamini. 3 Wanhu wa Beelosi wakimbilila Gitaimu, uko wokala fana nyambenyambe mbaka diyelo.

4 Yonasani mwana wa Sauli kakala na mwana yakalile mbetembete. Sauli na Yonasani viwadanganike uko Yezileeli, mwana iyo kakala na miyaka mitano. Yaya wake viyahulike mbuli iyo, kamsola na kakimbila. Kakimbila himahima kamulagaza imwana, nayo kawa mbetembete. Mwana iyo zina jake katangigwa Mefiboshesi.

5 Lelo Lekabu na Baana wana wa Limoni kulawa bululu da Beelosi, wahita ukaye kwa Ishiboshesi, lusita lwa zuwa da imisi viyakalile kohumula. 6,7 Wengila muna ikaye waitenda fana wolonda kusola ngano, wamfika Ishiboshesi kagona muna ichiheleto chake cha kugona, wamuhoma muna umunda. Viwamkomile, wasola iditwi wasegela najo. Wafosela nzila ya Alaba, wagenda chilo chose. 8 Wamgalila Daudi ditwi da Ishiboshesi uko Hebuloni. Wamulongela mfalume, "Lola dino ditwi da Ishiboshesi mwana wa mwihi wako Sauli yalondile kukukoma. Mndewa Mulungu kamulihiliza chisasi kusonhela Sauli na welesi wake."

9 Daudi kawedika Lekabu na Baana wana wa Limoni kulawa bululu da Beelosi, kawalongela, "Noilaha kwa Mndewa Mulungu yanilopole muna yamagayo yose, 10 munhu imwe viyanilongele, ‘Sauli kadanganika,’ kagesa kuwa kagala usenga unogile, nimgwila na nimkoma uko Sikilagi. Yayo niiyo maliho yonimulihile kwa usenga wake! 11 Maliho yenu yezafosa maliho ya msenga ija. Mumkoma munhu yanogile muna dikomwa jake mwenyewo. Nizawalihiliza mweye chisasi na kuwasegeza muna iisi." 12 Ivo Daudi kawalagiliza wasang'hani wake wawakome Lekabu na Baana, nawo wawakoma. Wawakanha migulu yawo na makono yawo, maabaho wawatumbika mumgwazo mwa sima uko Hebuloni. Mbali wadisola ditwi da Ishiboshesi na wadiwanda kuna dileme da Abineli uko Hebuloni.