1 Lusita mfalume Daudi viyakalile muna ikaye yake, Mndewa Mulungu kamwing'ha tindiwalo, sekeyasovuligwe na wehi wake wamzunguluke chila ubanzi. 2 Hamala baho mfalume kamulongela mulotezi Nasani, "Hano hanili nokala muna ikaye inogile izengigwe kwa mibiki ya mielezi, mbali sanduku da lagano da Mulungu dokala muna dihema!"

3 Nasani kamwidika mfalume, "Hita ukatende chochose chouchigesa muna umoyo wako, kwaviya Mndewa Mulungu kahamwe na weye." 4 Mbali ichilo icho Mndewa Mulungu kamulongela Nasani, 5 "Hita ukamulongele msang'hani wangu Daudi, Mndewa Mulungu kolonga, ‘Vino weye kodaha kunizengela kaye ya kukala? 6 Kwaviya niye sikalile muna ikaye kwandusila siku ija viniwalavile Waisilaili muna iisi ya Misili mbaka diyelo, mbali nilawa hanhu hamwe kuhita hanhu hamwenga na kukala muna dihema. 7 Chila hanhu honihitile na Waisilaili, silongile na wasemi wa Waisilaili waja niwalagilize wawadime wanhu wangu Isilaili, "Habali hamunizengele kaye kwa mibiki ya mielezi?" ’

8 "Lelo mulongele msang'hani wangu Daudi kuwa Mndewa Mulungu Yeli na Udahi kolonga, ‘Nikulava koukalile kodima ng'hondolo muladi uwatawale wanhu wangu Waisilaili. 9 Kusongela lusita ulo niwa hamwe na weye kokose kouhitile. Niwananga wehi wako wose haulongozi wako. Nizaditenda zina jako kuwa kulu fana mazina ya wakulu ng'hani muna iisi yose. 10 Niye nizawasagulila wanhu wangu Waisilaili hanhu ha kukala, muladi wakale hanhu hawo wenyewo, sekewagazigwe kaidi. Wanhu wasede hawezawagaza kaidi fana viwawagazile baho ichanduso, 11 na fana viwatendile kwandusila lusita viniwekile wasemi wawatawale wanhu wangu Isilaili. Iviya nizakwing'ha tindiwalo kulawa kwa wehi wako wose na niye Mndewa Mulungu nizautenda welesi wako kuwa watawala. 12 Siku zako vondazimale na vondaugone na wasaho zako, nizamsagula mwanago imwe yawe mfalume na nizaugangamiza ufalume wake. 13 Yeye niiyo yondayazenge kaye kwa zina jangu. Iviya ufalume wake nizaugangamiza siku zose. 14 Nizakuwa tati yake, nayo kezakuwa mwanangu. Yahatenda yehile nizamtagusa kwa balati dodisang'haniligwa na wanhu na nhaguso yondaigaligwe na wanhu. 15 Mbali ulondo wangu wa kufunya umoyo hawizasegezigwa kumwake fana viya vinimsegezele Sauli muladi weye uwe mfalume. 16 Kaye yako na ufalume wako wizakala siku zose haulongozi wangu, iviya nizaugangamiza siku zose.’ "

17 Nasani kamulongela Daudi mbuli zose za magubulo yayo yose.

18 Maabaho mfalume Daudi kengila muna dihema na kakala haulongozi wa Mndewa Mulungu kalonga, "Niye yelihi, na welesi wangu welihi mbaka konigala hano hanili? 19 Mbuli ino ikala ndodo kumwako mbaka kuwekila chilagano welesi wangu kwa miyaka ikwiza. Iviya weye Mndewa Mulungu kunitenda niwone mbuli izo. 20 Na niye Daudi, nyongeze kulonga choni? Kwaviya kunimanya niye msang'hani wako, weye Mndewa Mulungu. 21 Kwa ichimu cha lagano jako na kusondelela moyo wako, kutenda yano yose makulu muladi unifundize niye. 22 Lola viya viwili mkulu, weye Mndewa Mulungu! Habule imwenga yalingile fana weye, weye Mulungu kwadumwe, fana viya vichihulike kwa magutwi yetu. 23 Wanhu welihi walingile fana wanhu wako Waisilaili, waja weye Mulungu kuhita kuwakombola kuwa wanhu wako mwenyewo? Kuitendela zina jako mwenyewo na kutenda mbuli ng'hulu na mauzauza ya kudumbiza kwa kuwawinga wanhu na milungu ya zisi zimwenga kulawa haulongozi wa wanhu wako uwakombole kulawa Misili. 24 Na kuwasagula wanhu wako Waisilaili kwa ichimu chako mwenyewo, muladi wadahe kuwa wanhu wako siku zose na weye Mndewa Mulungu kuwa Mulungu wawo.

25 "Lelo weye, Mndewa Mulungu, chifikize siku zose chiya chilagano chiulongile kusonhela niye msang'hani wako na welesi wangu na utende fana viulongile. 26 Zina jako dizakuwa kulu siku zose. Wanhu wezalonga, ‘Mndewa Mulungu Yeli na Udahi ni Mulungu wa Isilaili.’ Na kaye ya msang'hani wako niye Daudi izagendelela haulongozi wako. 27 Kwaviya weye, Mndewa Mulungu Wili na Udahi, Mulungu wa Isilaili kunigubulila niye msang'hani wako kulonga, ‘Nizautenda welesi wako kuwa watawala.’ Ivo niye nipata ugalu wa kukupula mbuli ino.

28 "Lelo weye, Mndewa Mulungu, weye kwa Mulungu na mbuli zako ni kweli, kumulaganila chinhu icho chinogile msang'hani wako. 29 Ivo nokupula uutemele mate welesi wangu niye msang'hani wako muladi wagendelele kutawala siku zose, kwaviya weye Mndewa Mulungu kulagana na kwizagendelela kunitemela mate niye na welesi wangu siku zose."