1 Daudi viyakalile kalufosa chidogo ludonho lwa umulima, kamfika uko Siba msang'hani wa Mefiboshesi kakala baho kumuhokela Daudi. Kuno kana vihongwe waidi niwawo wowakalile wapapa magate magana maidi na vipambo gana va zabibu zinyalile, matunda gana ya lusita lwa chiyangazi na chiya chimemile divai.

2 Mfalume kamuuza Siba, "Habali kugala vinhu vino vose?"

Siba kamwidika, "Vihongwe kwa ichimu cha kukwela ndugu zako, gate na matunda kwa wanhu kuja, divai ya kung'wa wanhu hondawalegele muna ichuwala."

3 Mfalume kamuuza, "Mefiboshesi kakulihi?"

Siba kamwidika, "Kasigala umo Yelusalemu, kwaviya kochilongela, ‘Lelo, wanhu wa Isilaili wezanibwelezela ufalume wa wasaho yangu.’ "

4 Mfalume kamulongela Siba, "Chila chinhu cha Mefiboshesi ni chako."

Siba kamwidika, "Niye msang'hani wako, notumbala mavindi haulongozi wako mwenevale wangu mfalume, niye nolamba nipate kutogoligwa kumwako."

5 Mfalume Daudi viyafikile bululu da Bahulimu, imwe wa lukolo lwa Sauli yotangigwa Shimei mwana wa Gela, kalawa uko. Kamduwila Daudi viyakalile yogenda. 6 Shimei kandusa kumpigisila mabwe Daudi na wasang'hani wake, ingawa Daudi kakala kazungulukigwa na wanhu na wakalizi wake. 7 Shimei kamduwila Daudi kalonga, "Segela! Segela! Mkomaji! Weye hufaya! 8 Mndewa Mulungu kalihiliza chisasi kwa ichimu cha kuwakoma wanhu wose wa kaye ya Sauli, ija weye kusola ufalume hanhu hake. Lelo Mndewa Mulungu kamwing'ha Abisalomu. Lola lelo kunangigwa kukupata kwaviya weye ni mkomaji."

9 Abishai mwana wa Seluya kamulongela mfalume, "Habali ino umbwa yafile kokuduwila weye, mwenevale wangu mfalume? Nilekele nimuhitile nidumule ditwi jake."

10 Mfalume kamulongela Abishai na ndugu yake, "Mbuli iyo siyo yenu mweye wana wa Seluya. One Mndewa Mulungu kamulongela Shimei, ‘Mduwile Daudi,’ vino yelihi yodaha kumkimilila sekeyatende ivo?"

11 Daudi kamulongela Abishai na wasang'hani wake wose, "One mwanangu kolonda kunikoma, siyo chinhu cha kwazanya ndugu wa Sauli kulonda kunikoma. One Mndewa Mulungu kamulongela, yaniduwile. Mulekeni yakale na mulekeni yatende ivo. 12 Yodahika Mndewa Mulungu kezalola manhesa yangu, nayo kezaniliha mbuli zinogile kwa duwilo dino donidipata diyelo." 13 Daudi na wanhu wake wagendelela na mwanza mudikulugumbi. Kuno Shimei kagendelela mumgwazogwazo mwa chilima, wagenda malola kuno komduwila na kompigisila Daudi mabwe na timbwisi. 14 Mfalume hamwe na wanhu wose wowakalile nayo, wafika muulwanda lwa Yoludani kuno walegela na wahumula.

15 Abisalomu hamwe na Waisilaili wose, wengila Yelusalemu. Ahitofeli kakala hamwe nayo. 16 Hushai Mwaliki, mbwiya wa Daudi kamuhitila Abisalomu na kamulongela, "Mfalume yakale siku zose!"

17 Abisalomu kamuuza Hushai, "Vino uno ulondo woulagusa kwa mbwiyako? Habali huhitile hamwe na mbwiyako?"

18 Hushai kamwidika Abisalomu, "Siivo bule, niye nizasigala na munhu ija yasaguligwe na Mndewa Mulungu na wanhu wano na Waisilaili wose. Nizakuwa wake yeye. 19 Iviya, yelihi yondanimsang'hanile? Vino nimsang'hanile mwanage? Fana viya vinimsang'hanile tati yako, niivo vondanikusang'hanile weye."

20 Abisalomu kamulongela Ahitofeli, "Ching'he magesa yako. Chitende choni?"

21 Ahitofeli kamwidika Abisalomu, "Wabandame wake wadodo wa tati yako woyawalekile kulolesa goya kaye yake. Uhatenda ivo, wanhu wose wa Isilaili wezahulika kuwa kwihiligwa na tati yako, maabaho wanhu wose weli ubanzi wako wezapata nguvu." 22 Ivo wanhu wamwikila hema Abisalomu uchanyha ya chisuwili chibadagale, nayo kawabandama wake wadodo wa tati yake kuno Waisilaili wolola.

23 Siku izo chiyalongile Ahitofeli chikala fana viya chilongigwa na Mulungu. Lekamana Daudi na Abisalomu wasondelela mbuli yoyalongile Ahitofeli.