1 Kukala na nzala lusita wa Daudi miyaka mitatu dimwe kwa dimwe. Ivo Daudi kapula nhazo kwa Mndewa Mulungu. Mndewa Mulungu kalonga, "Sauli na kaye yake wabananga kwa kuwakoma Wagibeoni." 2 Mfalume kawatanga Wagibeoni na kalonga nawo. Wagibeoni hawawile wana wa Isilaili bule, mbali wakala wasigale kulawa kwa Waamoli. Waisilaili wakala wailaha kuwaleka wagima. Mbali Sauli kageza kuwananga kwa ichimu cha migongo yake kwa Isilaili na Yuda. 3 Ivo Daudi kawauza Wagibeoni, "Niwatendeleni choni? Nizalihaze kwa wihi woutendiligwe, muladi mudahe kuitemela mate isi ino na wanhu wa Mndewa Mulungu?" 4 Wagibeoni wamwidika, "Mbuli ya Sauli na kaye yake siyo mbuli ya kulihigwa hela hebu zahabu, hebu si mbuli ya kukoma munhu yoyose muna iisi ya Isilaili."

Daudi kawauza, "Lelo niwatendele choni?"

5 Wamwidika mfalume, "Sauli kachagiza na kuchitendela yehile ya kuchinanga, sekechikale hanhu hohose muna iisi ya Isilaili. 6 Chipatileni walume saba kulawa muna uwelesi wa Sauli, chiwakome haulongozi wa Mndewa Mulungu uko Gibea ya Sauli muna umulima wa Mndewa Mulungu."

Mfalume kawedika, "Nizawatula kumwenu."

7 Mbali mfalume kamuwonela ubazi Mefiboshesi mwana wa Yonasani mzukulu wa Sauli kwa ichimu cha chilaho haulongozi wa Mndewa Mulungu kwa Daudi na Yonasani. 8 Mbali mfalume kamsola Alimoni na Mefiboshesi imwenga, wana waidi wa Lisipa mndele wa Aya iyo yakalile kamwelekela Sauli. Iviya kawasola wana watano wa Melabu mndele wa Sauli yoyamwelekele Adilieli mwana wa Balizilai, Mmeholasi, 9 na kawatula mmakono kwa Wagibeoni. Nawo wawakoma mchanyha ya mulima haulongozi wa Mndewa Mulungu. Na wose saba wadanganika hamwe muna isiku ya mwanduso ya kuhuna shayili.

10 Maabaho Lisipa mndele wa Aya, kasola viwalo va maguniya, katandika muna uluwe na kakala habehi na mitufi, kwandusila mwanduso wa kugobola mbaka viwatonyiligwe na mvula. Kawawinga ndege sekewakwenhukile mitufi imisi na ichilo kawawinga wanyama wa mbago. 11 Daudi viyahulike chiya chiyakalile yotenda Lisipa mndele wa Aya, muke mdodo wa Sauli, 12 kahita kusola mivuha ya Sauli na mwanage Yonasani kulawa kwa wanhu wa Yabeshi Gileadi. Wakala waisola kwa chifiso kulawa kudibuga da wanhu wose uko Besi Shani, hanhu baho Wafilisiti wakala wawatumbika siku yowamkomile Sauli uko Giliboa. 13 Daudi kaibweleza mivuha ya Sauli na Yonasani kulawa uko na iviya mivuha ya waja saba wowakomigwe. 14 Waiwanda mivuha ya Sauli na ya mwanage Yonasani kuna dileme da Kishi, tati yake Sauli uko Sela muna iisi ya Benyamini. Watenda chila chinhu mfalume chiyalagilize. Viyakomeleze yayo, Mulungu kayedika mapulo kwa ichimu cha isi.

15 Maabaho kukala na ng'hondo kaidi na Wafilisiti na Waisilaili. Daudi na wanhu wake wahita kwiitowa na Wafilisiti, nayo kakala yalegele ng'hani kuing'hondo. 16 Imwe wa watowang'hondo wa Wafilisiti yatangigwe Ishibi Benobu wa welesi wa Walefai, kalonda kumkoma Daudi. Kakala na mgoha wili na nhonga ya shaba yili na nzamo ya chilo nhatu na nusu na panga da sambi. 17 Mbali Abishai mwana wa Seluya keza na kamtaza Daudi, kamtowa Mfilisiti iyo na kamkoma. Baho wanhu wamulahila Daudi na walonga, "Weye huzahita kaidi kuing'hondo, sekewize kuutenda moto wa Isilaili kufa."

18 Vilufosile lusita kukala na ng'hondo kaidi na Wafilisiti uko Gobu. Baho Sibekai Muhushahi kamkoma Safu imwe wa welesi wa Walefai. 19 Kukala na ng'hondo kaidi na Wafilisiti uko Gobu, Elihanani mwana wa Yaali Olegimu, kulawa Beselehemu kamkoma ndugu yake Goliati Mgiti na uwo mgoha wake ukala na muhini mkulu fana viya mbiki wa mbotaji mawalo. 20 Kukala na ng'hondo kaidi uko Gasi. Uko kukala na munhu mtali ng'hani yeli na vidole sita kwa chila mkono na vidole sita kwa chila mgulu, peta ya vidole vake ikala malongo maidi na vine. Iviya nayo kakala wa welesi wa Walefai. 21 Yeye iyo yawaligile Waisilaili, Yonasani mwana wa Shimei sekulu wake Daudi kamkoma.

22 Wawo wane wakala welesi wa Walefai uko Gasi, nawo wakomigwa na Daudi hamwe na watowang'hondo wake.