1 Kaidi Daudi kawaduganya waja watowang'hondo magalu wa Isilaili, peta yawo maelufu malongo matatu. 2 Daudi kasegela kahita na wanhu wake wose wowakalile hamwe nayo kulawa Baala ya Yuda, muladi kudigala sanduku da lagano ditangigwe kwa zina da Mndewa Mulungu Yeli na Udahi wose, yoyokala uchanyha ya makelubi muna disanduku ijo. 3 Wadisola sanduku da lagano da Mulungu kulawa muna ikaye ya Abinadabu yoyakalile kuna umulima na wadipapa muna ditololi da sambi. Uza na Ahiyo wana wa Abinadabu wakala wowalongoza ng'ombe wakalile wobulula tololi ijo 4 dili na sanduku da lagano da Mulungu uchanyha yake. Ahiyo kakala yogenda haulongozi hake. 5 Daudi na wanhu wose wa Isilaili wakala wovina na kwimba nyila kwa nguvu zawo zose haulongozi wa Mndewa Mulungu. Watowa via va nyila, fana viya chinubi na bango na mbugi na kayamba na mbilinge.

6 Viwafikile hanhu ha kubigila ndiya ha Nakoni, Uza kaugolosa mkono wake na kujamha sanduku da lagano kwaviya ng'ombe waikwala. 7 Mndewa Mulungu kamuwonela ludoko Uza kwa chiya chiyatendile. Mulungu kamkoma Uza baho hamgwazo ha sanduku da lagano da Mulungu. 8 Daudi kengilwa na ludoko kwaviya Mndewa Mulungu kamkoma Uza. Ivo hanhu baho hotangigwa Pelesi Uza.*

9 Daudi kamdumba Mndewa Mulungu siku ija na kalonga, "Nodahaze kudigala sanduku da lagano kumwangu?" 10 Ivo Daudi halondile kudigala sanduku da lagano da Mndewa Mulungu mbaka muna dibululu jake, mbali kadigala muna ikaye ya Obedi Edomu, Mgiti. 11 Ivo sanduku da lagano da Mndewa Mulungu kadiguma muna ikaye ya Obedi Edomu, Mgiti kwa lusita lwa miyezi mitatu. Mndewa Mulungu kamtemela mate Obedi Edomu na wanhu wa kaye yake.

12 Mfalume Daudi kahulika kuwa kwa ichimu cha sanduku da lagano, Mndewa Mulungu kamtemela mate Obedi Edomu na kaye yake na vose viyakalile navo. Ivo Daudi kahita kudisola sanduku da lagano kulawa kwiikaye ya Obedi Edomu mbaka Yelusalemu kwa chelekocheleko ng'hulu. 13 Wanhu wakalile wopapa sanduku da lagano da Mndewa Mulungu viwamalile kuhita hatua sita, Daudi kachinja ng'ombe lume na dang'ang'a dinenehe. 14 Daudi kuno kaifunga chizibawo cha mkulu wa nhambiko mchigudi chake, kavina kwa nguvu zake zose haulongozi wa Mndewa Mulungu. 15 Ivo Daudi na Waisilaili wose wadigala sanduku da lagano da Mndewa Mulungu kwa chelekocheleko na dizi kulu da mhalati.

16 Sanduku da lagano vidikalile dokwingila muna dibululu da Daudi, Mikali mndele wa Sauli kasungulila muna dizonzo na viyamuwone mfalume Daudi kovina na kozumhazumha haulongozi wa Mndewa Mulungu kamwehula. 17 Na wadingiza sanduku da lagano na wadika hanhu hake muna dihema diya diyazengile Daudi kwa ichimu chake. Nayo Daudi kalava nhambiko za kutimbula na nhambiko za kugala tindiwalo haulongozi wa Mndewa Mulungu. 18 Baho Daudi viyakomeleze kulava nhambiko za kutimbula na nhambiko za kugala tindiwalo, kawatemela mate wanhu kwa zina da Mndewa Mulungu Yeli na Udahi. 19 Kawagolela wanhu wose wa bumbila da Isilaili, walume na wanaake, chila imwe gate da ngano na unde da nyama na chibugulu cha zabibu zinyalile. Maabaho wanhu wose wabwela muizikaye zawo.

20 Daudi viyabwelile kuwatemela mate wanhu wa ikaye yake, Mikali mndele wa Sauli kalawa kunze kumuhowela Daudi. Kalonga, "Diyelo mfalume wa Isilaili kailagusa kuwa mbunye, koigubula nyawalo zake haulongozi wa watumwa wa chike wa wasang'hani wake bila chinyala, kalinga munhu mbozi voyotenda!"

21 Daudi kamulongela Mikali, "Nitenda ivo haulongozi wa Mndewa Mulungu yanisagule niye hanhu ha tati yako hebu welesi wake hebu umwenga wowose kulawa muna ikaye yake, muladi kunika niwe mulangulizi wa Waisilaili, wanhu wake Mndewa Mulungu. Ivo niye nizavina haulongozi wa Mndewa Mulungu. 22 Nizazehigwa kufosa vino. Kodaha kugesa niye siyo chinhu, mbali watumwa waja wa chike woulonga nawo wezanihishimu!"

23 Ivo Mikali mndele wa Sauli kadanganika bila ya kupata mwana yoyose.