1 Sauli viyabwelile kulawa kuwatowa Wafilisiti, kalongiligwa kuwa Daudi kauko kuna ichuwala cha Engedi. 2 Ivo Sauli kasola walume magalu 3,000 kulawa muna iisi yose ya Isilaili na kahita kuwazahila Daudi na wanhu wake habehi ya Miluwe ya Lutimbago uko Engedi.

3 Kafika hana ivikwama va ng'hondolo mumgwazo wa nzila, uko kukala na tuka na Sauli kahita mwanza mkulu. Daudi na wanhu wake wakala waumuja muna dituka mbali kwa mgati ng'hani. 4 Wanhu wa Daudi wamulongela, "Ino niiyo siku iyalongile Mndewa Mulungu viyakulongele, ‘Nizamguma mwihi wako muna yamakono yako muladi umtendele vovose vondaulonde.’ " Ivo Daudi kamsepa Sauli bila ya kuwoneka na kakanha mhindo ya walo jake. 5 Mbali Daudi moyo wake unyunguwala kwaviya kakanha mhindo ya walo da Sauli. 6 Kawalongela wanhu wake, "Mndewa Mulungu yanigome sekenimtendele mbuli ifanile iyo mwenevale wangu yasaguligwe na Mndewa Mulungu hebu kumulumiza, kwaviya niiyo yasaguligwe na Mndewa Mulungu." 7 Daudi kawakalikila wanhu wake na kawagomesa sekewamtowe Sauli. Nayo Sauli kenuka, kalawa muna dituka na kasegela. 8 Maabaho Daudi kalawa muna dituka na kamtanga Sauli, kalonga, "Mwenevale wangu, mfalume!" Sauli viyahinduke kuchisogo, Daudi kamtumbalila mavindi na kadulisa chihanga chake hasi. 9 Daudi kamulongela Sauli, "Habali kotegeleza mbuli yowolonga wanhu, ‘Daudi kailungila kukulumiza?’ 10 Lola, diyelo meso yako yawona viya Mndewa Mulungu viyakugumile muna yamakono yangu muna dituka. Wanhu wamwenga wonilongela nikukome, mbali niye nikuleka, nilonga, ‘Sidaha kumulumiza mwenevale wangu, kwaviya kasaguligwa na Mndewa Mulungu.’ 11 Lola tati yangu, nokulamba ulole chihande cha walo jako muna yamakono yangu! Nikanha mhindo ya walo jako mbali sikukomile muladi uvimanye sikuhasanye hebu kukuhinduka. Sikubanange chochose ingawa weye konisaka unikome. 12 Mndewa Mulungu yachihumize niye na weye na yalihilize kwa yehile younitendela, mbali niye sizakulumiza. 13 Fana viwalongile wanhu wa umwaka, ‘Mwa wanhu wehi molawa wihi.’ Mbali mkono wangu hawizakutendela yehile.

14 "Mfalume wa Isilaili komuwinga yelihi? Komsepa yelihi? Imbwa yafile hebu kupatu? 15 Mndewa Mulungu yachihumize niye na weye, yaniwone na yanigombele, yanikombole kulawa muna umkono wako."

16 Daudi viyakomeleze kulonga mbuli izo, Sauli kamuuza, "Daudi mwanangu, weye niiyo ulonga ivo?" Sauli kalila kwa usungu. 17 "Weye kotenda yanogile kufosa niye, kwaviya weye kunitendela yanogile, mbali niye nikutendela yehile. 18 Diyelo kulagusa viya viunitendele yanogile, kwaviya Mndewa Mulungu kaniguma muna yamakono yako, mbali hunikomile. 19 Vino munhu yahamuwona mwihi wake kezamuleka yawe mgima? Mndewa Mulungu yakulihe yanogile kwa yano younitendele diyelo. 20 Kweli novimanya kuwa kwizakuwa mfalume. Ufalume wa Isilaili wizagangamala kwa ulangulizi wako. 21 Lelo unilahile kwa Mndewa Mulungu kuwa hwizawakoma welesi wangu hebu hwizadibananga zina jangu muna uwelesi wa tati yangu." 22 Daudi kamulahila Sauli. Maabaho Sauli kahita ukaye yake, mbali Daudi na wanhu wake wabwela kuna imhongono.