1 Mfalume Nahashi Mwamoni keza na watowang'hondo wake kudizunguluka bululu da Yabeshi Gileadi. Wanhu wose wa bululu ijo wamulongela Nahashi, "Chitendele lagano da tindiwalo, chizalangulizigwa na weye."

2 Mbali Nahashi Mwamoni kawalongela, "Nizatenda lagano na mweye. One muhatogola, nizawaguma chinyala Waisilaili wose kwa kung'ola ziso da kulume da chila munhu."

3 Walala wa Yabeshi walonga, "Ching'he siku saba muladi chitume wasenga muna iisi yose ya Isilaili, one habule yondayachikombole, chizahumigwa na weye."

4 Wasenga viwafikile uko Gibea, hanhu Sauli hayakalile yokala, wawalongela wanhu mbuli iyo na wanhu wose wandusa kulila. 5 Sauli kakala yokwiza kulawa kuna umgunda kuno kawalongoza ng'ombe wake, kauza, "Habali chila munhu kolila?" Nawo wamulongela mbuli ziwalongile wanhu walawile Yabeshi. 6 Bahaja Muhe wa Mndewa Mulungu umulongoza Sauli na kumtenda yawone ludoko. 7 Kasola ng'ombe walume waidi, kawakanha vihande vingi, maabaho kawatuma wasenga wagale vihande viya muna iisi yose ya Isilaili, walonga, "Munhu yoyose hawasondelela Sauli na Samweli, ng'ombe wake wezatendigwa fana vino!"

Kwa ichimu icho Mndewa Mulungu kawadumbiza Waisilaili. Ivo Waisilaili wose wailumba fana munhu imwe viwalawile kuhita kuna ing'hondo. 8 Sauli kawaduganya hamwe na kawapeta uko Bezeki. Wakala walume 300,000 kulawa Isilaili na walume 30,000 kulawa Yuda. 9 Wawalongela wasenga wezile kulawa Yabeshi, "Walongeleni walume wa Yabeshi Gileadi, ‘Igolo zuwa vondajake ng'hani mwizalopoligwa.’ " Wasenga viwawalongele wanhu wa Yabeshi, wadeng'helela. 10 Ivo wanhu wa Yabeshi wawavwizila Waamoni, walonga, "Igolo chizatogola kuhumigwa na mweye, mwizachitendela chochose chomuwona chiwanogela."

11 Sauli kakala kawapanga watowang'hondo muna yamabumbila matatu, igolo yake imitondo ng'hani wawatowa. Wandusa kuwakoma Waamoni na kugendelela mbaka imisi. Waamoni wasigale wapwililika wose mbaka habule hata wanhu waidi wasigale hamwe.

12 Maabaho wanhu wamulongela Samweli, "Wakulihi wanhu walongile Sauli hadaha kuwa mfalume? Wagaleni chiwakome!"

13 Mbali Sauli kalonga, "Habule munhu yondayakomigwe diyelo, kwaviya diyelo Mndewa Mulungu kawalopola Waisilaili." 14 Maabaho Samweli kawalongela wanhu, "Haya, chihite Giligali muladi chikaitogolele kuwa Sauli yagendelele kuwa mfalume wetu." 15 Ivo wanhu wose wahita Giligali, uko wamtogola Sauli kuwa mfalume wawo. Wanhu walava nhambiko za kugala tindiwalo kwa Mndewa Mulungu. Sauli na Waisilaili wose wadeng'helela ng'hani.