1 Wafilisiti waiting'hana kwa kuitowa ng'hondo uko bululu da Soko muna isi ya Yuda. Weka lago jawo uko Efesi Damimu, hagati ya Soko na Azeka. 2 Sauli na Waisilaili waiting'hana na weka lago kuna dikolongo da Ela na waisasala kuitowa na Wafilisiti. 3 Wafilisiti wema uchanyha ya mulima umwe na Waisilaili wema uchanyha ya mulima umwenga, hagati yawo hakala na kolongo.

4 Galu imwe yatangigwe Goliati yolawa Gasi, kalawa kunze ya lago da Wafilisiti. Utali wake ukala fana mita nhatu. 5 Mditwi jake kavala kofiya ya shaba, iviya kavala chizibawo cha shaba muna imhambaga na nzamo wa chilo malongo matano na saba. 6 Iviya kavala mbote za shaba muna imigulu yake, iviya kumgongo wake kakala na mwele wa shaba. 7 Muhini wa mgoha wake ukala mgalamu fana mbiki wa mfumaji, nzamo ya chuma cha mgoha bila ya muhini wake chikala chilo saba. Munhu yapapile chinhu chake cha kuigombela kamulongolela. 8 Nayo kema na kawalandulila dizi watowang'hondo wa Waisilaili, kawalongela, "Habali mulawa na kusasala ng'hondo? Vino niye siyo Mfilisiti na mweye siyo wasang'hani wa Sauli? Saguleni munhu yaitowe na niye. 9 One yahadaha kuitowa na niye na kunikoma, chizakuwa watumwa wenu. Mbali one nihamuhuma na kumkoma, mwizakuwa watumwa wetu na mwizachisang'hanila." 10 Maabaho Mfilisiti iyo kalonga, "Diyelo nowaliga watowang'hondo wa Isilaili, ning'heni munhu chiitowe." 11 Sauli na Waisilaili wose viwahulike mbuli izo za Wafilisiti, wafa moyo wadumba ng'hani.

12 Daudi kakala mwana wa ija Mwefulasi wa Beselehemu ili Yuda yatangigwe Yese. Yese kakala na wana wa chilume wanane. Chipindi cha utawala wa Sauli, Yese kakala mulala ng'hani. 13 Waja wana wa Yese iwakulu wahitile hamwe na Sauli kuna ing'hondo wakala watatu. Chaudele kakala Eliabu na wekaidi Abinadabu na weketatu Shama. 14 Daudi kakala mzuwanda. Waja sekulu zake watatu wamsondelela Sauli, 15 mbali Daudi kakala kohita kwa Sauli na kubwela muladi yawadime ng'hondolo wa tati yake uko Beselehemu. 16 Kwa siku malongo mane Mfilisiti ija kalawilila na kwima imisi na ichilo.

17 Yese kamulongela Daudi mwanage, "Wasolele sekulu zako chilo longo za uhishi na magate yano longo, uwagalile kuna dilago hima hima. 18 Umgalile vidoto longo va mtindi ija imkulu wa watowang'hondo magana longo. Ukawalaule sekulu zako fana wogendelela vinogile, maabaho nigalile chinhu kulagusa kuwa wose wagima." 19 Lusita ulo mfalume Sauli na sekulu zake Daudi na watowang'hondo wose wa Isilaili wakala kuna dibawe da Ela woitowa na Wafilisiti.

20 Igolo yake Daudi kalamka chilochilo ng'hani, kawaleka ng'hondolo hamwe na imdimi, kavisola vinhu viya viyalagilizigwe na Yese tati yake. Kafika hana dilago da watowang'hondo, kawafika woipanga hanhu hawo na woguta nyangi za ng'hondo. 21 Watowang'hondo wa Isilaili na watowang'hondo wa Wafilisiti waisasala kuitowa. Watowang'hondo wakala woilola. 22 Daudi kamwing'ha vinhu vake munhu ija yokaliza vinhu, kawakimbilila watowang'hondo na kuwalamsa sekulu zake. 23 Viyakalile kolonga nawo, Goliati ija galu wa Wafilisiti kulawa Gasi kalawilila haulongozi ha watowang'hondo wa Isilaili fana viyazowele. Daudi nayo kamtegeleza. 24 Waisilaili viwamuwonile Goliati, wamkimbila kuno wodumba ng'hani. 25 Wanhu wa Isilaili walonga, "Mumuwona munhu ino yezile? Kweli keza kuwakeweza Waisilaili. Mfalume Sauli kezamwing'ha utajili mwingi munhu yondayamkome munhu ino. Iviya kezamfungiza zengele na mndele wake na wanhu wa muna ikaye ya tati yake wezailegeha. Iviya hawezaliha kodi."

26 Daudi kawalongela wanhu wemile habehi nayo, "Vino kezatendigwa choni munhu yondayamkome Mfilisiti ino na kuwakombola Waisilaili kulawa muna ichinyala chino? Mana Mfilisiti ino hengizigwe ulungwana niiyo yelihi mbaka yawalige watowang'hondo wa Mulungu yeli mgima?" 27 Wanhu wamulongela Daudi chinhu chondayeng'higwe munhu yondayamkome Goliati. 28 Eliabu sekulu wake imkulu kahulika Daudi viyakalile kolonga na wanhu. Eliabu kawona ludoko, kalonga, "Habali kwiza? Vino ng'hondolo waja iwadodo kumulekela yelihi kuja kuchuwala? Weye kwa mdugi na niyamanya magoda yako, kwaviya kwiza kulola ng'hondo." 29 Daudi kalonga, "Nitenda choni? Vino sekenilonge mbuli?" 30 Maabaho kamuhindukila munhu imwenga na kamuuza ivo ivo, munhu iyo nayo kamwidika fana ichanduso.

31 Mbuli ziyalongile Daudi vizihulikike, wanhu wamulongela Sauli, nayo kamtuma munhu yamgale. 32 Daudi kamulongela Sauli, "Munhu yoyose sekeyadumbe muna umoyo wake kwa ichimu cha Mfilisiti ino. Niye msang'hani wako nizahita kuitowa nayo." 33 Sauli kamulongela Daudi, "Weye hudaha kuhita kuitowa na Mfilisiti ija kwaviya weye mbwanga. Munhu iyo kaitowa ng'hondo kwandusila yang'hali mbwanga." 34 Daudi kamulongela Sauli, "Msang'hani wako nizowela kudima ng'hondolo wa tati yangu, chila lusita simba na dubu waheza kugwila mwanang'hondolo, 35 niye nomsondelela na kumtowa simba, nomkombola mwanang'hondolo muna umulomo wake. One simba hebu mnyama mkali yahanizumhila, nomwamha mazoya yake ya muisingo na nomtowa na kumkoma. 36 Niye msang'hani wako nikoma simba wengi na wanyama wengi wakali. Lelo hata ija Mfilisiti hengizigwe ulungwana, yoyawaligile watowang'hondo wa Mulungu yeli mgima, kezakuwa fana wawo. 37 Mndewa Mulungu yoyanikombole muna imikombe ya simba na mnyama mkali, kezanikombola kwa Mfilisiti iyo." Sauli kamulongela Daudi, "Hita, Mndewa Mulungu kezakuwa hamwe na weye." 38 Sauli kamuyawaza Daudi viwalo vake va ng'hondo na kofiya da shaba muna iditwi jake na koti da kuikingila muimhambaga. 39 Nayo Daudi kaiyawala mawalo yake na kasomeka panga mchigudi na kageza kugenda kwaviya kakala yang'hali hanavigeza. Daudi kamulongela Sauli, "Sidaha kuhita na vinhu vino kwaviya sivigezile." Daudi kavihambula. 40 Daudi kasola balati jake na kasagula mbwewe tano kulawa muna ichizanda, kaziguma muna umkoba wake. Ng'humbwewe yake ikala muna yamakono imala, kandusa kumsondelela Goliati.

41 Goliati Mfilisiti kandusa kumkwenhukila Daudi, munhu ija yampapile chinhu chake cha kuigombela kakala haulongozi hake. 42 Mfilisiti ija viyamuwone Daudi kamwehula kwaviya kakala mbwanga, yeli na nguvu na yeli na chihanga chinogile. 43 Goliati kamulongela Daudi, "Vino niye imbwa mbaka kwiza na balati?" Mfilisiti kamduwila Daudi kwa milungu yake. 44 Goliati kamulongela Daudi, "Izo hano, lukuli lwako nizaweng'ha ndege wose na wanyama wa kumbago!" 45 Mbali Daudi kamulongela Mfilisiti, "Weye konizila na mgoha na panga na mwele, mbali niye nokwizila kwa zina da Mndewa Mulungu Yeli na Udahi, Mulungu wa watowang'hondo wa Isilaili, youmuligile. 46 Diyelo Mndewa Mulungu kezakuguma muna yamakono yangu. Nizakubwanha hasi na nizakukanha ditwi jako na mitufi ya watowang'hondo wa Wafilisiti nizaweng'ha ndege wose na wanyama wa kumbago, muladi wanhu wose wavimanye kuwa Mulungu kamuna iisi ya Isilaili. 47 Wanhu wose wowaiting'hane baho diyelo, wezavimanya kuwa Mndewa Mulungu halonda mgoha hebu panga kuwakombola wanhu. Ino ng'hondo ya Mndewa Mulungu, nayo kezamgumani mweye wose muna yamakono yetu." 48 Goliati viyamkwenhukile Daudi, Daudi kakimbila hima kuhita kuna ing'hondo kuitowa na ija Mfilisiti. 49 Daudi kengiza mkono muna umkoba wake na kalava mbwewe imwe, kaipigisa kwa ng'humbwewe, kamtowa nayo Goliati muna ichihanga, mbwewe imtula Goliati hachanyha hana yameso na ingila mgati. Goliati kagwa chingubingubi. 50 Ivo Daudi kamuhuma Goliati kwa ng'humbwewe na mbwewe. Kamtowa Goliati na kumkoma, mbali Daudi hakalile na panga mumkono wake. 51 Daudi kakimbila na kema uchanyha ya Goliati, kasomola panga da Goliati muna iyala yake na kamkoma najo kwa kumkanha muna iditwi. Wafilisiti viwamuwonile galu wawo kadanganika, wakimbila. 52 Wanhu wa Yuda na wanhu wa Isilaili wandusa kuguta nyangi za uhumi, wawawinga Wafilisiti mbaka Gasi na mbaka kuna zinyivi za Ekiloni. Wafilisiti waja walumile kuna ing'hondo wagwa kuna inzila yoihita Shaalaimu mbaka Gasi na Ekiloni. 53 Waisilaili viwabwelile kulawa kuwawinga Wafilisiti, wasola vinhu va Wafilisiti muna dilago. 54 Daudi kasola ditwi da Goliati na kadigala Yelusalemu, mbali via va ng'hondo va Goliati kavika muna dihema jake.

55 Sauli viyamuwone Daudi kohita kuitowa na Goliati, kamuuza Abineli mkulu wa watowang'hondo wake, "Abineli, vino ino mwana wa yelihi?" Abineli kamwidika, "Weye mfalume fana viukala, niye sivimanyile bule." 56 Mfalume Sauli kalonga, "Lelo uza ino mwana wa yelihi?" 57 Daudi viyabwelile kulawa kumkoma Mfilisiti ija, Abineli kamsola na kamgala kuulongozi wa Sauli kuno kamha ditwi da Goliati. 58 Sauli kamuuza Daudi, "Weye mwana wa yelihi?" Daudi kamwidika, "Niye mwana wa msang'hani wako Yese wa Beselehemu."