1 Maabaho Daudi kalawa Nayosi kuna dibululu da Lama, kakimbilila kwa Yonasani na kalonga haulongozi wake, "Nitenda choni? Nihasanya choni? Nimuhasanya choni tati yako mbaka kageza kunikoma?"

2 Yonasani kamwidika, "Siivo bule. Hwizadanganika! Lola tati yangu hatenda chinhu chochose chikulu hebu chidodo, yang'hali hananilongela niye. Habali yanifise? Youlonga siyo kweli."

3 Daudi kailaha kalonga, "Tati yako kavimanya ng'hani kuwa nitogoligwa ng'hani na weye, nayo kagesa muumoyo wake, ‘Yonasani kolondeka sekeyavimanye, buleivo kezakwingilwa mnamilo.’ Mbali fana Mndewa Mulungu viyokala na fana weye viukala, noilaha hasigala hadodo nidanganike."

4 Yonasani kamulongela Daudi, "Chochose choulonda nitende, nizakutendela."

5 Nayo Daudi kamulongela Yonasani, "Igolo dugila da kwima kwa mwezi, niye nolondeka nije ndiya hamwe na mfalume, mbali nileke niifise kumgunda mbaka chisindo ichigulogulo. 6 One tati yako yahawona nahabule, mulongele, ‘Daudi kanilamba ng'hani yanileke muladi yalopole Beselehemu kuna dibululu jake, kwaviya nhambiko ya mwaka yolavigwa uko kwa ichimu cha lukolo lwake lose.’ 7 One yahalonga, ‘Vinoga!’ Niye msang'hani wako nizakala kwa tindiwalo. Mbali one yahawona ludoko, uvimanye kuwa kailunga kutenda mbuli ihile. 8 Ivo unitendele yanogile niye msang'hani wako, kwaviya kuija sale na niye haulongozi wa Mndewa Mulungu hamwe na weye. Mbali one nihabananga, unikome weye mwenyewo. Habali unigale kwa tati yako?"

9 Yonasani kalonga, "Haidahika! Mbali one nivimanyile kuwa tati yangu kolonda kukutenda vihile, kweli nihakulongele."

10 Daudi kamulongela Yonasani, "Yelihi yondayanilongele fana tati yako kezakwidika kwa ludoko?" 11 Yonasani kamulongela Daudi, "Izo chihite kumgunda." Ivo wose waidi wahita kumgunda.

12 Maabaho Yonasani kamulongela Daudi, "Mndewa Mulungu, Mulungu wa Isilaili yawe mkalangama. Vondaniyamanye magesa ya tati yangu lusita fana luno igolo hebu chisindo, one kuhawa na mbuli yoidaha kukufaya, kweli nizakulongela mbuli iyo. 13 Mbali one tati yangu kailungila kukutenda vihile, Mndewa Mulungu yanitendele yehile kwa ludoko one sikulongele na kukulaga uhite kwa tindiwalo. Mndewa Mulungu yawe hamwe na weye fana viyawile hamwe na tati yangu. 14 One nahagendelela kuwa mgima, nilaguse ulondo wako wa kufunya umoyo uja wa Mndewa Mulungu, mbali one nahadanganika, 15 sekeusegeze ulondo wako wa kufunya umoyo kwa ndugu zangu, hata one luhawa lusita luja Mndewa Mulungu vondayawasegeze wehi wako muna iisi."

16 Ivo Yonasani katenda lagano na kaye ya Daudi, kalonga, "Mndewa Mulungu yawalihilizile wehi wa Daudi." 17 Yonasani kamulongela Daudi yakanhamize kaidi chilaho chake cha kumulonda, kwaviya Yonasani kamulonda Daudi fana voyoilonda mwenyewo.

18 Maabaho Yonasani kamulongela Daudi, "Igolo dugila da kwima kwa mwezi. Izamanyika kuwa kwahabule, kwaviya chigoda chako chizakuwa chabule munhu. 19 Chisindo ichigulogulo hita hanhu haja howiifisile lusita magayo yano viyanduse, gozela habehi ya dibwe diya da Ezeli. 20 Nizapigisa misale mitatu hamgwazo yake, fana nolinga shabaha. 21 Maabaho nizamtuma mbwanga na kumulongela, ‘Hita ukaizahile misale.’ One nihamulongela, ‘Lola misale ya kuubanzi wako unigalile.’ Maabaho wize, kwaviya kwizakala kwa tindiwalo na habule chinhu chihile, fana viyokala Mndewa Mulungu. 22 Mbali one nihamulongela mbwanga iyo, ‘Gendelela kuulongozi hunafika hana imisale,’ kwizasegela kwaviya Mndewa Mulungu kakuleka usegele. 23 Kusonhela mbuli ija yochilongile weye na niye, Mndewa Mulungu niiyo mkalangama wa weye na niye siku zose."

24 Ivo Daudi kaifisa mumgunda, dugila da kwima kwa mwezi vidifikile, mfalume Sauli kakala hasi yaje. 25 Mfalume kakala hanhu hake fana viyazowele, hana ichigoda chikalile habehi na ng'huta. Yonasani kakala kuulongozi wake, Abineli nayo kakala habehi na Sauli, mbali hanhu ha Daudi hakala habule munhu. 26 Mbali Sauli halongile mbuli yoyose siku iyo, kwaviya kagesa, "Kuna chinhu chimulawilila Daudi kumtenda yambule mwiko, kweli kambula mwiko." 27 Siku yekaidi ya mwezi chigoda cha Daudi chikala chabule munhu kaidi. Sauli kamulongela Yonasani mwanage, "Habali mwana wa Yese hezile kuja ndiya igolo hebu diyelo?"

28 Yonasani kamwidika, "Daudi kanilamba ng'hani nimuleke yahite Beselehemu, 29 kalonga, ‘Nileke nihite kwa ndugu zangu, kwaviya wana nhambiko muna dibululu na ndugu yangu kanilongela nihite. One nihatogoligwa haulongozi wako, nilekele nihite kuwawona ndugu zangu.’ Lekamana hezile hana imeza ya mfalume."

30 Sauli kamuwonela ludoko Yonasani, kamulongela, "Weye mwana wa mwanamke mtatali na yotenda yehile! Novimanya kuwa kusagula kumtegeleza mwana wa Yese. Kwizaiguma chinyala weye mwenyewo na mami yako yakweleke. 31 Kwaviya lusita mwana wa Yese yahawa mgima muna iisi, weye hwizakuwa mfalume. Lelo hita ukanigalile, kwaviya kolondeka yadanganike!"

32 Yonasani kamwidika Sauli tati yake, "Habali kolonda kumkoma Daudi? Katenda choni?" 33 Mbali Sauli kampigisila mgoha wake muladi yamkome. Ivo Yonasani kavimanya kuwa tati yake kailunga kumkoma Daudi.

34 Yonasani kenuka hana imeza kwa ludoko lukulu na siku isondelele hadile ndiya na kasusa kwaviya kamuwonela usungu Daudi na kwaviya tati yake kamguma chinyala.

35 Igolo yake imitondo Yonasani kahita kumgunda kuiting'hana na Daudi na mbwanga kakala hamwe nayo. 36 Kamulongela imbwanga ija, "Kimbila ukazahile misale yoniipigisa." Mbwanga ija kakimbila, nayo kapigisa msale kuulongozi wake. 37 Mbwanga ija viyafikile hanhu hoilagalile misale ya Yonasani, Yonasani kamgutila, "Msale hauli kuulongozi wako?" 38 Yonasani kamgutila kaidi mbwanga ija, kamulongela, "Lopola! Sekeukalame!" Ivo mbwanga ija kadondola misale na kabwela kwa mwenevale wake. 39 Mbali mbwanga ija hamanyile chochose. Yonasani na Daudi muhala niwawo waimanyile mbuli iyo. 40 Nayo Yonasani kamwing'ha mbwanga ija via vake va ng'hondo, kamulongela, "Hita na uvibweleze kudibululu."

41 Mbwanga ija viyahitile, Daudi kenuka haja habehi na idibwe, katumbala mavindi mbaka chihanga chake chidalisa isi miyanza mitatu, nawo wainonela na walila, mbali Daudi kalila ng'hani.

42 Maabaho Yonasani kamulongela Daudi, "Hita kwa tindiwalo kwaviya cheye chose waidi chiilaha kwa zina da Mndewa Mulungu, chilonga, ‘Mndewa Mulungu kezakuwa hamwe na niye na weye na welesi wangu na welesi wako siku zose.’ " Daudi kasegela, Yonasani kabwela kuna dibululu.