1 Maabaho Daudi kahita Nobu kwa mkulu wa nhambiko Ahimeleki. Nayo Ahimeleki kahita kumuhokela Daudi kuno kogudemeka, kamulongela, "Habali kwadumwe kwabule munhu imwenga?"

2 Daudi kamulongela mkulu wa nhambiko Ahimeleki, "Mfalume kanilagiliza sang'hano, kanilongela, ‘Munhu yoyose sekeyavimanye chochose kusonhela sang'hano yonikutuma hebu malagilizo yonikulagiliza!’ Niwalagiliza walume hanhu ha kwiiting'hana. 3 Kuna chinhu chochose? Ning'he magate matano hebu chochose choulinacho." 4 Mkulu wa nhambiko kamwidika Daudi, "Nabule magate yazoweleke, nina magate yalavigwe kwa Mndewa Mulungu. Nodaha kwing'higwa magate yayo one wanhu wako hawaibandame na wanaake."

5 Daudi kamwidika mkulu wa nhambiko, "Kweli chiigola na wanaake kwa siku zino ndodo fana viizoweleke muna umwanza. Ng'huli za walume waja zela vochiwa muna imiyanza izoweleke, vino diyelo haizakuwa yela ng'hani?" 6 Ivo mkulu wa nhambiko Ahimeleki kamwing'ha yamagate yaja yelile, kwaviya hakala habule magate yamwenga mbali yaja yekigwe haulongozi wa Mndewa Mulungu, yasakanyigwa na magate yeli moto siku ija viyasegezigwe.

7 Siku iyo kukala na imwe wa wasang'hani wa Sauli, ija kalondeka kuwabaho haulongozi wa Mndewa Mulungu, zina jake Doegi Mwedomu mkulu wa wadimi wa wanyama wa Sauli.

8 Maabaho Daudi kamuuza Ahimeleki, "Muna umkono wako kwabule mgoha hebu panga? Sigalile panga hebu via vangu va ng'hondo, kwaviya sang'hano ya mfalume inilonda nisegele himahima."

9 Mkulu wa nhambiko kalonga, "Panga da Goliati, Mfilisiti ija iumkomile kuna dikolongo da Ela, dino hano difungigwa muna diwalo da kuchisogo ya chizibawo. One uhadilonda usole kwaviya hano habule dimwenga mbali ijo muhala." Daudi kalonga, "Habule panga dimwenga dilingile ijo, ning'he."

10 Siku ija Daudi kambanga Sauli na kahita kwa Akishi mfalume wa Gasi. 11 Mbali wasang'hani wa Akishi wamulongela, "Vino ino siyo ija Daudi mfalume wa isi? Vino wano hawaimbile na kuvina,

‘Sauli kawakoma wanhu maelufu.

Nayo Daudi kawakoma wanhu maelufu longo?’ "

12 Daudi kazika mbuli izo muumoyo wake na kamdumba ng'hani Akishi mfalume wa Gasi. 13 Kaitenda chichala haulongozi wawo, nayo viyakalile haulongozi wawo, kavavatula muna ulwivi lukulu lwa bululu na kayaleka mate yake yalagale muna zindevu zake.

14 Akishi kawalongela wasang'hani wake, "Loleni, muwona kuwa munhu ino kana chichala, habali mumgala kumwangu? 15 Vino niye nowalonda wanhu wamwenga weli na chichala mbaka mumgala munhu ino muladi yalaguse chichala chake kumwangu? Vino munhu ino kezakwingila muna ikaye yangu?"