1 Mbwanga Samweli kamsang'hanila Mndewa Mulungu kwa kumtaza mkulu wa nhambiko Eli. Siku izo mbuli ya Mndewa Mulungu ikala haipatika ng'hani, kukala kwabule magubulo mengi.

2 Siku dimwe Eli viyakalile kagona hanhu hake, meso yake yakala hayalola goya. 3 Chitasa cha Mulungu chikala chokwaka, iviya Samweli kakala yagonile muna dihema da Mndewa Mulungu hanhu hadikalile sanduku da lagano. 4 Maabaho Mndewa Mulungu kamtanga Samweli.

Samweli kamwidika, "Nahano!"

5 Kakimbila kuhita kwa Eli, kalonga, "Nahano. Kunitanga."

Eli kamulongela, "Sikutangile, bwela ukagone."

Samweli kabwela kugona.

6 Mndewa Mulungu kamtanga Samweli kaidi. Samweli kalamka kahita kwa Eli, kalonga, "Nahano. Kunitanga."

Eli kamulongela, "Mwanangu, sikutangile bule, bwela ukagone kaidi."

7 Samweli kakala yang'hali hanammanya Mndewa Mulungu. Mbuli ya Mndewa Mulungu ikala hainagubuligwa kumwake.

8 Mndewa Mulungu kamtanga Samweli mwanza weketatu, Samweli kenuka na kahita kwa Eli, kalonga, "Nahano. Kunitanga."

Maabaho Eli kavimanya kuwa Mndewa Mulungu iyo yakalile yomtanga imbwanga iyo. 9 Ivo Eli kamulongela Samweli, "Hita ukagone, one yahakutanga kaidi, mulongele, ‘Longa, Mndewa Mulungu, kwaviya msang'hani wako kotegeleza.’ " Ivo Samweli kabwela kugona hanhu hake.

10 Mndewa Mulungu keza, kema hajahaja na kamtanga kaidi fana viyatendile ichanduso, "Samweli! Samweli!"

Samweli kamwidika, "Longa, kwaviya msang'hani wako kotegeleza."

11 Maabaho Mndewa Mulungu kamulongela Samweli, "Uteganye, nizatenda chinhu muna iisi ya Isilaili, chila munhu yondayahulike kezasinhuka. 12 Siku iyo nizafikiza chila chinhu chinilongile kusonhela kaye ya Eli. 13 Kwaviya nimulongela kuwa nizautagusa welesi wake siku zose, kwa ichimu cha wihi uja uyaumanyile, kwaviya wanage waniliga na yeye hawagomese. 14 Ivo niilaha kwa welesi wa Eli kuwa ubananzi uwatendile hawizasafyigwa kwa nhambiko hebu kwa nhosa siku zose."

15 Samweli kagona mbaka imitotondo, maabaho kavugula lwivi lwa hema da Mndewa Mulungu. Kadumba kumulongela Eli magubulo yayo, 16 mbali Eli kamtanga na kamulongela, "Samweli mwanangu."

Samweli kamwidika, "Nabaha."

17 Eli kamuuza, "Mulungu kakulongela choni? Sekeunifise. Mulungu yakutaguse one hunilongele chiya chiyakulongele." 18 Ivo Samweli kamulongela chila chinhu na hamfisile chinhu chochose. Maabaho Eli kalonga, "Iyo Mndewa Mulungu, muleke yatende chiyowona chinoga."

19 Samweli kakula, Mndewa Mulungu kamtaza na katenda chila chinhu chiyalongile Samweli chiwe kweli. 20 Waisilaili wose, kwandusila isi ya Dani ili ubanzi wa kasikazi mbaka Belisheba ili ubanzi wa kusi wavimanya kuwa Samweli kakala mulotezi yokwaminika wa Mndewa Mulungu. 21 Mndewa Mulungu kagendelela kumulawilila Samweli uko Shilo na kamulongela cha kulonga.