1 Maabaho Samweli kasola nyhupa ya mavuta na kamgidila Sauli mditwi, maabaho kamnonela na kamulongela, "Mndewa Mulungu kokuhaka mavuta uwe mulangulizi wa wanhu wake Waisilaili. 2 Vondausegele kumwangu diyelo, kwizaiting'hana na walume waidi habehi na leme da Laheli uko Selisa muna imhaka ya Benyamini, wezakulongela, ‘Vihongwe woukalile uwazahila wawoneka, tati yako kaleka kugesa mbuli ya vihongwe komgesani mweye, kolonga, "Nitendeze kumpata mwanangu?" ’ 3 Kulawa baho kwizagendelela mbaka uwone mbiki wa mwaloni uko Taboli. Kwizaiting'hana na wanhu watatu wohita kwa Mulungu uko Beseli, imwe kosola wanaluti watatu na imwenga kosola magate matatu na imwenga kosola chiya cha divai. 4 Wezakulamusa na kukwing'ha magate maidi, weye kwizayahokela. 5 Maabaho kwizafika Gibea ya Mulungu, kuna imhongono ya Wafilisiti. Vondaufike muna dibululu kwizaiting'hana na bumbila da walotezi wohulumuka kulawa hanhu ha kutambikila, wana bango na ngoma na chilongelonge kuulongozi wawo, wezakuwa wolotela. 6 Muhe wa Mndewa Mulungu wizakwizila kwa nguvu, kwizalotela hamwe nawo na wanhu hawezakumanya. 7 Vilaguso vino vihakulawilila, tenda chochose chouwona chinoga, kwaviya Mulungu kahamwe na weye. 8 Maabaho kwizahulumuka kuulongozi wangu mbaka Giligali, niye nizakuhulumukila uko muladi kulava nhambiko za kutimbula na nhambiko za kugala tindiwalo. Kwizanigozela siku saba mbaka vondanize kukulongela vinhu voulondeka kutenda."

9 Sauli viyahinduke kumuleka Samweli, Mulungu kaugalusa moyo wa Sauli unoge. Chila chinhu chiyalongile Samweli chilawilila siku ija. 10 Sauli na msang'hani wake viwafikile Gibea, bumbila da walotezi waiting'hana nawo, Muhe wa Mulungu umwizila kwa nguvu na kandusa kulotela hamwe nawo. 11 Wanhu wammanyile umwaka viwamuwone kolotela hamwe na walotezi, waiuzagiza, "Chino choni chimulawilile mwana wa Kishi? Sauli iviya imwe wa walotezi?" 12 Munhu yakalile baho kawauza, "Tati yawo yelihi?" Ivo kulawilila simwe dilonga, "Vino Sauli iviya imwe wa walotezi?" 13 Sauli viyakomeleze kulotela, kahita hanhu ha kutambikila.

14 Tati yake mdodo Sauli kamuuza Sauli na msang'hani wake, "Mukala kulihi?"

Sauli kamwidika "Chikala chozahila vihongwe, mbali vichiwonile kuwa hachiwawona chihita kwa Samweli."

15 Tati yake mdodo Sauli kalonga, "Nilongele, Samweli kamulongelani choni?"

16 Sauli kamwidika, "Kachilongela kuwa vihongwe wawoneka." Mbali hamulongele tati yake mdodo chiya Samweli chiyalongile kusonhela ufalume.

17 Samweli kawatanga hamwe wanhu wa Isilaili haulongozi wa Mndewa Mulungu uko Misipa, 18 kawalongela, "Mndewa Mulungu, Mulungu wa Isilaili, kolonga, ‘Niwalava Waisilaili muna iisi ya Misili na niwakombola muna yamakono ya Wamisili na zisi zimwenga zose zimuwoneleni.’ 19 Mbali diyelo mumulema Mulungu wenu, yomkombolani muna yamagayo yenu yose na manhesa. Na mulonga, ‘Bule, chikile mfalume.’ Lelo gendeni haulongozi wa Mndewa Mulungu kwa makabila yenu na ng'holo zenu muladi imwe yasaguligwe."

20 Samweli kayagala kuulongozi makabila yose ya Isilaili, kabila da Benyamini disaguligwa kwa mhiya. 21 Maabaho kadigala kuulongozi kabila da Benyamini, lukolo kwa lukolo, lukolo lwa Wamatili lusaguligwa kwa kutowa mhiya. Maabaho Sauli mwana wa Kishi kasaguligwa kwa kutowa mhiya, mbali viwamzahile hawamuwonile. 22 Ivo wamuuza Mndewa Mulungu, "Kuna munhu hanakwiza kuno?"

Mndewa Mulungu kawedika, "Loleni, koifisa hana zimbahasha."

23 Ivo wakimbila na wamgala Sauli, viyemile hagati ya wanhu kawa mtali kufosa wanhu wose. 24 Samweli kawalongela wanhu wose, "Mumuwona munhu iyamsagule Mndewa Mulungu? Habule munhu imwenga yalingile fana yeye hagati ya wanhu wose."

Maabaho wanhu walandula madizi yawo, walonga, "Mfalume yakale lusita lutali!"

25 Samweli kawalongela wanhu haki na sang'hano za mfalume. Kazandika muna ichitabu na kuchika haulongozi wa Mndewa Mulungu. Maabaho Samweli kawalongela wanhu wose chila munhu yahite ukaye yake. 26 Sauli iviya kahita ukaye yake uko Gibea, kakala hamwe na magalu waja, Mulungu kawaguma moyo kuhita hamwe nayo. 27 Mbali wamwenga weli watatali walonga, "Munhu ino kezachikombolaze?" Wamzeha Sauli na hawamwing'hile chinhu chochose. Mbali Sauli hawonile ludoko.