1 Ivo wanhu wa Kiliasi Yealimu weza na kudisola sanduku da lagano da Mndewa Mulungu, wadigala kuna ikaye ya Abinadabu kuna umulima. Wamwika hakwe Eleazali mwanage muladi yadikalize sanduku da lagano da Mndewa Mulungu.

2 Sanduku da lagano da Mndewa Mulungu dikala Kiliasi Yealimu kwa miyaka malongo maidi, lusita ulwo Waisilaili wose wamulilila Mndewa Mulungu yawataze.

3 Samweli kawalongela Waisilaili wose, "One muhambwelela Mndewa Mulungu kwa mizoyo yenu yose, muleke milungu yenu ya chigeni na Maashitalosi, mumsasalile Mndewa Mulungu mizoyo yenu. Mumsang'hanile yeye muhala, nayo kezamkombolani muna yamakono ya Wafilisiti." 4 Ivo Waisilaili wasegeza Mabaali na Maashitalosi, wamsang'hanila Mndewa Mulungu muhala.

5 Maabaho Samweli kalonga, "Waduganyeni hamwe Waisilaili wose uko Misipa, niye nizampulilani kwa Mndewa Mulungu." 6 Ivo wose waiting'hana hamwe uko Misipa. Wadeha mazi na kuyetila kuwa nhambiko kwa Mndewa Mulungu. Siku ija wafunga kuja na walonga, "Chimuhasanya Mndewa Mulungu." Samweli kakala msemi wa Waisilaili uko Misipa.

7 Wafilisiti viwahulike kuwa Waisilaili waiting'hana hamwe uko Misipa, walangulizi wa Wafilisiti weza kuitowa nawo. Waisilaili viwahulike ivo wawadumba Wafilisiti. 8 Wamulongela Samweli, "Sekeuleke kumulamba Mndewa Mulungu, Mulungu wetu, kwa ichimu chetu, muladi yachilopole muna yamakono ya Wafilisiti." 9 Samweli kasola mwanang'hondolo yokong'ha, kamulava wose kuwa nhambiko ya kutimbula kwa Mndewa Mulungu. Samweli kamulamba Mndewa Mulungu kwa ichimu cha Waisilaili, Mndewa Mulungu kamwidika. 10 Samweli viyakalile kolava nhambiko ya kutimbula, Wafilisiti wakwenhuka habehi muladi kuitowa na Waisilaili. Mbali Mndewa Mulungu kagala mbumo mkulu ng'hani kwa Wafilisiti siku iyo na kawadumbiza, nawo wakimbila kuno Waisilaili wowawona. 11 Waisilaili walawa Misipa, wawawinga na wawakoma Wafilisiti muna inzila mbaka viwafikile habehi na Besi Kali.

12 Maabaho Samweli kasola dibwe na kadisimika hagati ya Misipa na Sheni, kaditanga Ebenezeli* na kalonga, "Mbaka sambi Mndewa Mulungu kachitaza." 13 Ivo Wafilisiti wahumigwa na hawengile kaidi muna iisi ya Waisilaili. Mndewa Mulungu kawagaza Wafilisiti siku zose za ugima wa Samweli. 14 Mabululu yose Wafilisiti yowawahokile Waisilaili yabwelezigwa kwa Waisilaili, kwandusila Ekiloni mbaka Gasi. Waisilaili waikombola isi yawo kulawa kwa Wafilisiti. Iviya kuwa na tindiwalo hagati ya Waisilaili na Waamoli.

15 Samweli kagendelela kuwa msemi wa Waisilaili siku zose za ugima wake. 16 Chila mwaka kahita kuzunguluka uko Beseli na Giligali na Misipa, kawahumiza Waisilaili hanhu baho hose. 17 Maabaho kabwelaga Lama koikalile kaye yake, uko kawahumiza Waisilaili. Uko kamzengela lupango Mndewa Mulungu.