1 Siku izo Wafilisiti waduganya watowang'hondo wawo kuhita kuitowa ng'hondo na Isilaili. Akishi kamulongela Daudi, "Uvimanye kuwa weye na watowang'hondo wako mwizahita hamwe na niye kuna ing'hondo."

2 Daudi kamulongela Akishi, "Vinoga! Kwizavimanya chiyodaha kutenda msang'hani wako." Nayo Akishi kamulongela Daudi, "Vinoga, nizakutenda unikalize siku zose."

3 Samweli kadanganika, Waisilaili wose wamulilila na wamuwanda kuna dibululu jake uko Lama. Sauli kawawinga walaguzi na wahawi muna iisi ya Isilaili.

4 Wafilisiti waiduganya na wahita kwika lago uko Shunemu. Sauli kawaduganya Waisilaili wose na weka lago uko Giliboa. 5 Sauli viyawawonile watowang'hondo wa Wafilisiti, kadumba na kagudemeka ng'hani. 6 Ivo Sauli viyamuuzile Mndewa Mulungu yatende choni, Mndewa Mulungu hamwidike muna inzozi hebu kwa Ulimu hebu kwa walotezi. 7 Sauli kawalongela wasang'hani wake, "Nilondeleni mwanamke yodaha kulagula muladi nihite nikalole."

Wasang'hani wake wamulongela, "Kauko imwe uko Endoli."

8 Ivo Sauli kaigalusa kwa kuyawala mawalo yamwenga, maabaho yeye na wanhu wake waidi wamuhitila mwanamke iyo ichilo. Sauli kalonga, "Unilotele kwa ulaguzi, unigalile yondanimtambule kumwako."

9 Mwanamke ija kamulongela, "Lola, weye kovimanya viyatendile Sauli, viya viyawawingile walaguzi na wahawi muna iisi, habali konitegela mtego ugima wangu muladi nidanganike?"

10 Sauli kamulahila kwa Mndewa Mulungu, kalonga, "Fana Mndewa Mulungu viyokala, hwizatagusigwa kwa mbuli ino."

11 Maabaho mwanamke ija kamuuza, "Nikugalile yelihi?"

Sauli kamwidika, "Nigalile mzimu wa Samweli."

12 Mwanamke ija viyauwone mzimu wa Samweli, kaguta. Maabaho kamuhindukila Sauli, kamulongela, "Habali kunivwizila kuwa weye niiyo Sauli?"

13 Mfalume kamulongela, "Sekeudumbe. Kowona choni?"

Mwanamke ija kamulongela, "Nowona mzimu wolawa hasi."

14 Sauli kamuuza, "Ulinga fana choni?"

Nayo kamwidika, "Ulinga fana mulala wa chilume, kaiyawala ng'hanzu."

Baho Sauli kavimanya kuwa kakala Samweli. Ivo katumbala mavindi mbaka chihanga chake chidalisa hasi. 15 Samweli kamulongela Sauli, "Habali kunitanga na kunigaza?"

Sauli kamwidika, "Niye nigaya ng'hani kwaviya Wafilisiti woitowa ng'hondo na niye, nayo Mulungu kanileka, hanidike kwa walotezi hebu kwa nzozi. Ivo nikutanga muladi unilongele nitende choni."

16 Samweli kalonga, "Habali koniuza niye kuno Mndewa Mulungu kakuleka na kawa mwihi wako? 17 Mndewa Mulungu kakutendela fana viyalongile kwa mulomo wangu, Mndewa Mulungu kausegeza ufalume wako kulawa muna yamakono yako na kamwing'ha Muisilaili miyago, niiyo Daudi. 18 Kwaviya weye huditegeleze dizi da Mndewa Mulungu na huwadanganize Waamaleki wose, lekamana Mndewa Mulungu kokutendela vino diyelo. 19 Mndewa Mulungu kezawaguma Waisilaili muna yamakono ya Wafilisiti. Igolo weye na wanago wa chilume mwizakuwa hamwe na niye. Iviya Mndewa Mulungu kezawaguma watowang'hondo wa Isilaili muna yamakono ya Wafilisiti."

20 Baho Sauli kagwa chingubingubi, kadumba kwaviya kahulika chiyalongile Samweli. Nguvu zimala, kwaviya kakala hanakuja chochose, imisi yose na ichilo chose.

21 Mwanamke ija viyamuhitile Sauli na kumuwona kogaya ng'hani, kamulongela, "Lola niye msang'hani wako nikutegeleza. Niwika ugima wangu muna iifa na nitegeleza chiya chounilongele. 22 Sambi unitegeleze niye msang'hani wako, nikakusasalile gate chidogo uje muladi upate nguvu za kugendelela na mwanza wako."

23 Mbali Sauli kalema, kalonga, "Niye silonda kuja." Mbali wasang'hani wake hamwe na mwanamke ija wamulamba yaje, nayo kawategeleza chiwalongile. Ivo kenuka hasi na kakala muna dikomwa.

24 Mwanamke ija kakala na dang'ang'a da ng'ombe dinenehe ukaye yake, kadichinja himahima, maabaho kasola usage kaubuluga na katenda gate dilibule lusu. 25 Maabaho keka ndiya ija haulongozi wa Sauli na wasang'hani wake, nawo waja. Ichilo icho wenuka na wasegela.