1 Wazifi wahita kwa Sauli uko Gibea na walonga, "Vino Daudi haifisile muna ichilima cha Hakila chili habehi na Yeshimoni?"

2 Sauli kasegela na kahita kuichuwala cha Zifu, nayo kakala na wanhu 3,000 wa Isilaili waja wasaguligwe muladi kumzahila Daudi. 3 Sauli kasimika hema hana ichilima cha Hakila chochiilola na Yeshimoni mwiinzila ng'hulu, mbali Daudi kakala yokala kuichuwala. Viyawonile kuwa Sauli kamsondelela kuichuwala, 4 katuma wanhu wakapelembe, kalongiligwa kuwa kweli Sauli kafika.

5 Daudi kenuka na kahita hanhu haja Sauli hoyekile lago jake. Daudi kahalola hanhu haja hayagonile Sauli na Abineli mwana wa Neli mkulu wa watowang'hondo wa bumbila jake. Nayo Sauli kakala kagona mgati ya dilago da bumbila jake kuno wamzunguluka.

6 Ivo Daudi kamuuza Ahimeleki Muhiti na Abishai ndugu yake Yoabu, mami yawo katangigwa Seluya, kalonga, "Yelihi yondayahite hamwe na niye kuna dilago da Sauli?"

Abishai kamwidika, "Niye nizahita hamwe na weye."

7 Daudi na Abishai wahita kuna dibumbila da watowang'hondo lusita lwa ichilo. Sauli kakala yagonile muna dilago na mgoha wake ukala usimikigwe hasi habehi na ditwi jake. Abineli na watowang'hondo wakala wagona kumzunguluka Sauli.

8 Abishai kamulongela Daudi, "Lelo diyelo Mulungu kamguma mwihi wako muna yamakono yako. Lelo nilekele nimuhome mbaka muna iisi mwanza umwe muhala. Sizamuhoma miyanza midi."

9 Mbali Daudi kamulongela Abishai, "Sekeumkome! Kwaviya Mndewa Mulungu kezamtagusa munhu yoyose yondayamkome mfalume yoyamsagule. 10 Fana viya Mndewa Mulungu viyokala, Mndewa Mulungu kezamkoma Sauli hebu kezadanganika ifa imanyike hebu kezakomigwa kuna ing'hondo. 11 Haidahika hata chidogo! Sekenimtowe munhu yasaguligwe na Mndewa Mulungu. Mbali sola umgoha na ichibuyu cha mazi vili habehi ya ditwi jake."

12 Ivo Daudi kasola mgoha na chibuyu cha mazi vikalile habehi ya ditwi da Sauli, nawo wasegela. Habule munhu yoyose yamuwonile hebu kuhulika mbuli ino, hebu habule munhu yoyose yalamkile muna zinhongo. Wose wakala wagona, kwaviya Mndewa Mulungu kawaguma vuwevuwe da nhongo.

13 Maabaho Daudi kaloka umwambu, kema uchanyha ya chilima, hanhu hakalile hatali na bumbila da Sauli. 14 Daudi kawagutila nyangi watowang'hondo na Abineli mwana wa Neli, kalonga, "Abineli konihulika?"

Abineli kamwidika, "Weye yelihi youmtanga mfalume?"

15 Daudi kamulongela Abineli, "Weye siyo galu? Yelihi yalingile fana weye muna iisi ya Isilaili? Lelo habali humkalize mwenevale wako mfalume? Kwaviya munhu imwe keza kumdanganiza mfalume, mwenevale wako. 16 Mbuli youtendile hainogile bule. Kweli fana Mndewa Mulungu viyokala, weye na wanhu wako molondeka kudanganika, kwaviya hamumkalize mwenevale wenu yasaguligwe na Mndewa Mulungu. Loleni, mgoha wa mfalume na chibuyu cha mazi vovikalile habehi ya ditwi jake vakulihi?"

17 Nayo Sauli kadimanya dizi da Daudi, kalonga, "Ijo dizi jako Daudi mwanangu?"

Daudi kamwidika, "Ona niijo dizi jangu, mwenevale wangu mfalume." 18 Kongezela kulonga, "Habali mwenevale wangu konipelemba msang'hani wako? Nitenda choni? Hebu nibananga choni? 19 Mbali mwenevale wangu mfalume, nokulamba utegeleze mbuli zangu niye msang'hani wako. One Mndewa Mulungu kakutenda unihile, niye nilave nhosa muladi kumnogeza. Mbali one wanhu watenda ivo, waduwiligwe na Mndewa Mulungu. Mbali wawo waniwinga kulawa ihanhu hangu hana uhazi wa Mndewa Mulungu, wolonga, ‘Hita ukasang'hanile milungu imwenga.’ 20 Lelo sekeuleke nikomigwe muna iisi ya wanhu wamwenga kutali na chihanga cha Mndewa Mulungu. Weye mfalume wa Isilaili kulawa kuzahila kupatu, fana viya munhu viyosaka ng'hwale muna imilima."

21 Maabaho Sauli kalonga, "Nitenda uhasanyi. Bwela Daudi mwanangu. Kwaviya kuwona kuwa ugima wangu wofaya diyelo, sizageza kukulumiza kaidi. Kweli nitenda ubozi na nitenda ubananzi ng'hani."

22 Daudi kedika, "Mgoha wa mfalume wabahano, mbwanga imwe yaloke yeze kuusola. 23 Mndewa Mulungu komuliha chila munhu kwa sang'hano zinogile zoyotenda na uwaminika wake. Mndewa Mulungu kakwika muna yamakono yangu diyelo, mbali sizamulumiza munhu yasaguligwe na Mndewa Mulungu kwa sang'hano yelile. 24 Maabaho lola, fana viya ugima wako viufaya haulongozi wangu, iviya ugima wangu ufaye haulongozi wa Mndewa Mulungu yanilopole muna yamagayo yose."

25 Maabaho Sauli kamulongela Daudi, "Mwanangu Daudi, nokupulila kwa Mndewa Mulungu yakutemele mate na yakutende uhume."

Daudi kasegela, Sauli nayo kabwela kumwake.