1 Wafilisiti viwadisolile sanduku da lagano da Mulungu, wadisola kulawa lago da Ebenezeli mbaka bululu da Ashidodi. 2 Maabaho wadingiza muna ikaye ya Dagoni mulungu wawo na wadika habehi na nyang'hiti ya Dagoni. 3 Wanhu wa Ashidodi viwalamkile imitondo, nyang'hiti ya mulungu Dagoni igwa hasi chingubingubi haulongozi wa sanduku da lagano da Mndewa Mulungu. Ivo wainula nyang'hiti iyo na waika hanhu hake kaidi. 4 Igolo yake imitondo viwalamkile, nyang'hiti iyo igwa hasi chingubingubi haulongozi wa sanduku da lagano da Mndewa Mulungu. Ditwi jake na makono yake yose maidi yakanhika visigala hana ichizingiti, nyang'hiti ya Dagoni isigala dibungubungu muhala. 5 Lekamana wakulu wa nhambiko wa Dagoni na wanhu wose wokwingila muna ikaye ya Dagoni hawabojoga ichizingiti uko Ashidodi mbaka diyelo.

6 Mndewa Mulungu kawagaza wanhu wa Ashidodi na vibululu vili habehi, kawananga na kuwagaza kwa maihu. 7 Wanhu wa Ashidodi viwawone mbuli izo zilawilila, walonga, "Sanduku da lagano da Mulungu wa Isilaili sekedikale hano na cheye, kwaviya kachigaza cheye na mulungu wetu Dagoni." 8 Ivo wawatanga hamwe walangulizi wose wa Wafilisiti na wawauza, "Chiditende choni sanduku da lagano da Mulungu wa Isilaili?"

Wawo wamwidika, "Sanduku da lagano da Mulungu wa Isilaili dihamizigwe dihite Gasi." Ivo wadihamiza sanduku ijo. 9 Viwadihamize, Mndewa Mulungu kawagaza wanhu wa bululu ijo na kawadumbiza ng'hani, kawatowa wadododo na wakulu kwa kuweng'ha maihu. 10 Ivo wadigala sanduku da lagano mbaka Ekiloni. Sanduku da lagano da Mulungu vidifikile Ekiloni, wanhu wa Ekiloni waguta, walonga, "Wadigala sanduku da lagano da Mulungu wa Isilaili kumwetu kuchikoma cheye na wanhu wetu." 11 Ivo wawatanga hamwe walangulizi wose wa Wafilisiti na wawalongela, "Disegezeni sanduku da lagano da Mulungu wa Isilaili, dibwelezeni hanhu hake muladi sekedichikome cheye na wanhu wetu." Wanhu wa bululu jose wadumba kudanganika kwaviya Mulungu kawagaza. 12 Waja hawadanganike wagazigwa na maihu na waipula milungu yawo iwataze.