1 Daudi viyakomeleze kulonga na Sauli, Yonasani na Daudi wawa wambwiya ng'hani, Yonasani kamnogela Daudi fana viyoinogela mwenyewo. 2 Kwandusila siku iyo na kugendelela Sauli kamsola Daudi yamsang'hanile na hamulekile yabwele ukaye yake. 3 Yonasani kaija sale na Daudi kwaviya kamnogela ng'hani. 4 Yonasani kamsaulila Daudi walo jake, hamwe na panga jake na mhinde yake na mkwiji wake. 5 Daudi kahuma chila hanhu hoyatumigwe na Sauli, ivo Sauli kamtenda yawe mkulu wa watowang'hondo wake. Mbuli iyo iwadeng'heleza wanhu wose mbaka wasang'hani wa Sauli.

6 Wanhu viwakalile wobwela ukaye hamwe na Daudi viyakomeleze kumkoma Mfilisiti ija, wanaake kulawa mabululu yose ya Isilaili weza kumuhokela mfalume Sauli. Wanaake wawo wakala wokwimba nyila za deng'ho na kuvina na kutowa ngoma na vilimba. 7 Iviya wakala wovina na kwimba nyila za kwidikila vino,

"Sauli kawakoma wanhu maelufu.

Nayo Daudi kawakoma wanhu maelufu longo."

8 Sauli hanogelwe na mbuli za wila uwo, ivo kehilwa na kalonga, "Wamwing'ha Daudi wanhu malongo elufu mbali niye wanhu maelufu. Chisigalile kumwing'ha Daudi ufalume." 9 Kwandusila siku iyo Sauli kamuwonela migongo Daudi. 10 Igolo yake muhe wihile kulawa kwa Mulungu umwizila Sauli kwa kusinhukiza, kakala yolosoka fana mtachichala muna ikaye yake. Daudi kakala kotowa bango fana viyatendaga siku zose. Sauli kakala na mgoha muna umkono wake. 11 Sauli kagesa, "Nizamuhoma na mgoha mbaka yaibande na ing'huta." Ivo kampigisila Daudi miyanza midi, mbali Daudi kakwepa miyanza midi yose. 12 Sauli kamdumba Daudi kwaviya Mndewa Mulungu kakala hamwe nayo, mbali kamuleka Sauli. 13 Ivo Sauli kamsegeza Daudi kumwake na kamtenda yawe mkulu wa watowang'hondo 1,000, nayo Daudi kalawa na kwingila kulanguliza mabumbila kuna ing'hondo. 14 Chila chinhu chiyatendile Daudi chidahika, kwaviya Mndewa Mulungu kakala hamwe nayo. 15 Sauli viyawonile chila choyatendile Daudi chinoga kandusa kumdumba. 16 Mbali Waisilaili wose na wanhu wa Yuda wamulonda Daudi, kwaviya kawalongoza vinogile kuna ing'hondo.

17 Sauli kamulongela Daudi, "Ino Melabu mndele wangu imkulu. Nizakwing'ha yawe muke wako, fana wahanisang'hanila kwa ugalu na kuitowa ng'hondo za Mndewa Mulungu." Mana Sauli kagesa, "Niye sizamkoma kwa mkono wangu, leka Wafilisiti wamkome!" 18 Mbali Daudi kamulongela Sauli, "Niye iyo yelihi mbaka mfalume yawe mkoi wangu? Lukolo lwangu na ndugu zangu hawamanyike muna iisi ya Isilaili." 19 Lusita lwa Sauli vilufikile lwa kumfungiza zengele Melabu kwa Daudi, hatendile ivo, mbali kamfungiza zengele kwa Adilieli wa bululu da Mehola. 20 Mikali mndele imwenga wa Sauli kamulonda Daudi. Sauli viyalongeligwe kadeng'helela ng'hani. 21 Sauli kalonga muna umoyo wake, "Leka nimwing'he Daudi mndele ino muladi yawe mtego kumwake. Maabaho Wafilisiti wezamkoma." Ivo Sauli kamulongela Daudi mwanza wekaidi, "Lelo nizakuwa mkoi wako." 22 Sauli kawalagiliza wasang'hani wake, kalonga, "Longeni na Daudi kwa mviso, mulongeleni, ‘Mfalume konogelwa na weye ng'hani, mbaka wasang'hani wake wose wokulonda. Lelo togola uwe mkoi wa mfalume.’ "

23 Wasang'hani wamulongela Daudi mbuli izo, nayo Daudi kawalongela, "Niye ngayengaye na simanyika ng'hani, vino mogesa vihuha niwe mkoi wa mfalume?"

24 Wasang'hani wa Sauli wamulongele chiwalongeligwe na Daudi. 25 Sauli kawalongela, "Mulongeleni Daudi, ‘Mfalume halonda hela ya zengele mbali kolonda uwakome Wafilisiti gana na umgalile magovi yawo, muladi yawalihize chisasi wehi wa mfalume.’ " Sauli kailunga kumkoma Daudi kufosela Wafilisiti. 26 Wasang'hani wake viwamulongele Daudi mbuli zino, Daudi kanogelwa kuwa mkoi wa mfalume. Ing'hali siku ipangigwe hainafika, 27 Daudi na wanhu wake wahita na kuwakoma Wafilisiti magana maidi. Kasola yamagovi yawo kamgalila mfalume na kampetela muladi mfalume yawe mkoi wake. Ivo Sauli kamwing'ha Daudi Mikali imndele wake.

28 Sauli viyavimanyile kuwa Mndewa Mulungu kahamwe na Daudi na iviya Mikali mndele wake kamulonda Daudi, 29 Sauli kagendelela kumdumba ng'hani Daudi na kawa mwihi wake siku zose.

30 Watowang'hondo wa Wafilisiti wahita kuitowa na Waisilaili, mbali chila viwaitowile, Daudi kahuma kufosa wasang'hani wa Sauli. Ivo zina da Daudi digendelela kutogozigwa ng'hani.