1 Siku dimwe Yonasani mwana wa Sauli kamulongela ija imbwanga yeli mpagazi wa via vake va ng'hondo, "Chihite kwa watowang'hondo wa Wafilisiti kuja kuumwambu." Mbali hamulongele tati yake. 2 Sauli kakala yokala hasi ya mbiki wa mkomamanga uli uko Migiloni habehi na Gibea. Walume magana sita wakala hamwe nayo. 3 Mwa iwawo Ahiya kakala mkulu wa nhambiko mwana wa Ahitubu ndugu yake Ikabodi. Wasaho wa Ahiya kakala Finehasi mwana wa Eli yakalile mkulu wa nhambiko wa Mndewa Mulungu uko Shilo, yavalile chizibawo. Wanhu hawavimanyile kuwa Yonasani kasegela.

4 Chila ubanzi wa kolongo Yonasani hoyalondile kuloka muladi kufika kwa Wafilisiti, kukala na mulima wa luwe. Mulima wa ubanzi umwe wa kolongo utangigwa Bosesi na wa ubanzi umwenga wa kolongo utangigwa Sene. 5 Mulima umwe ukala ubanzi wa kasikazi habehi na Mikimashi, umwenga ukala ubanzi wa kusi habehi na Geba.

6 Yonasani kamulongela ija mbwanga mpagazi wa na migoha yake, "Chiloke chihite kwa wanhu hawagumigwe ulungwana. Yodahika Mndewa Mulungu kezachitaza, kwaviya habule chondachimkimilile kuchikombola hata one chahawa wengi hebu wadodo."

7 Mbwanga ija kamwidika, "Tenda chochose chiulonda, niye nahamwe na weye muna umoyo." 8 Yonasani kalonga, "Chizaloka kuhita kwa wanhu na kuilagusa kumwawo. 9 One wahachilongela chiwagoze mbaka vondawachizile, chizawagozela na hachizahita kumwawo. 10 Mbali one wahachilongela chihite kumwawo, chizahita, kwaviya Mndewa Mulungu kachitenda chiwahume. Chino chizakuwa chilaguso chetu."

11 Ivo wailagusa kwa watowang'hondo wa Wafilisiti, Wafilisiti walonga, "Waisilaili wolawa muna yamakombo mowaifisile!" 12 Wafilisiti waja wawatanga Yonasani na imbwanga ija, walonga, "Kweleni uchanyha kuno kochili, chizamfunzani kuitowa." Yonasani kamulongela ija yopapa silaha zake, "Kwela kuchisogo changu kwaviya Mndewa Mulungu kawatenda wahumigwe na Waisilaili." 13 Yonasani kakwela kwa makono yake na magulu yake, na ija imbwanga kamsondelela. Yonasani kawatowa Wafilisiti na wagwa hasi, na ija imbwanga kawakoma. 14 Ukomaji wa mwanduso Yonasani na ija imbwanga wawakoma wanhu malongo maidi hana ihanhu heli na ukulu wa nusu heka.

15 Kukala na gudemeko muna yamalago na muna imigunda na wanhu wa muna zimhongono na wahokaji nawo wagudemeka, isi iviya igudemeka. Ivo kukala na gudemeko kulu ng'hani.

16 Wakalizi wa Sauli uko Gibea muna iisi ya Benyamini wawona Wafilisiti wokimbila kuno na uko.

17 Sauli kawalongela wanhu wakalile hamwe nayo, "Wapeteni watowang'hondo muladi muvimanye welihi wahabule." Viwawapetile, wawona Yonasani na imbwanga mpagazi wa na migoha yake wahabule. 18 Sauli kamulongela Ahiya, "Digale hano sanduku da lagano da Mulungu." Kwaviya sanduku ijo dikala hamwe na Waisilaili. 19 Sauli viyakalile kolonga na mkulu wa nhambiko, nyangi zongezeka muna dilago da Wafilisiti. Ivo Sauli kamulongela mkulu wa nhambiko, "Leka, sekeudigale kaidi sanduku da lagano." 20 Sauli na wanhu wakalile hamwe nayo waiduganya na wahita kuna ing'hondo. Wawafika Wafilisiti wana lukwale, kwaviya wakala woitowa kwa wawo kwa wawo. 21 Waisilaili wawo wakalile hamwe na Wafilisiti, wahitile hamwe nawo kuna yamalago yawo, wahita kuilumba na Waisilaili wakalile hamwe na Sauli na Yonasani. 22 Waisilaili wose waifisile muna iisi ya vilima ya Efulaimu viwahulike kuwa Wafilisiti wakimbila, wawawinga muladi wakawatowe. 23 Ivo Mndewa Mulungu kawalopola Waisilaili siku iyo. Ng'hondo igendelela na mbaka ifosa Besi Aveni.

24 Siku iyo Waisilaili wagaya ng'hani, kwaviya Sauli kawalahiza wanhu, kalonga, "Yaduwiligwe munhu yoyose yoja ndiya yoyose mbaka ichigulogulo na niye nizawalihilizila wehi wangu." Ivo habule munhu yalanzile ndiya. 25 Watowang'hondo wose wengila mwiimbago, umo mukala na uki hasi. 26 Watowang'hondo viwengile mwiimbago, uki ukala wolagala, mbali habule hata munhu imwe yagumile mkono wake kumulomo kwaviya wadumba chilaho. 27 Mbali Yonasani hahulike tati yake viyawalagilize wanhu kwa chilaho. Ivo kenula fimbo ikalile muna umkono wake na kaivabika muna dilala da uki, maabaho kaja na kapata nguvu. 28 Munhu imwe kamulongela, "Tati yako kawalagiliza wanhu kwa chilaho, kalonga, ‘Yaduwiligwe munhu yoyose yoja ndiya diyelo!’ Lekamana wanhu wabule nguvu."

29 Yonasani kalonga, "Tati yangu kawagaza wanhu. Loleni, vinilanzile uki nipata nguvu. 30 Ihawile vinoga diyelo wanhu waje vinhu viwawahokile wehi wawo. Chihadahile kuwahuma Wafilisiti wengi ng'hani."

31 Waisilaili wawatowa Wafilisiti kwandusila Mikimashi mbaka Aiyaloni. Wanhu wakala wahungukilwa na nguvu ng'hani. 32 Wanhu wavizumhila vinhu viya viwawahokile kulawa kwa wehi wawo, wasola ng'hondolo na ng'ombe na madang'ang'a, wawachinja baho baho hasi. Wanhu waja nyama izo hamwe na damu. 33 Wamulongela Sauli, "Lola, wanhu womuhasanya Mndewa Mulungu kwa kuja nyama ili na damu."

Sauli kalonga, "Muleka kuzindilila malagilizo ya Mndewa Mulungu, bimbiliseni dibwe dikulu sambi baha." 34 Maabaho Sauli kawalongela, "Hiteni kwa wanhu mukawalongele, ‘Chila munhu yanigalile ng'ombe na ng'hondolo, muwachinje muje. Sekemumuhasanye Mndewa Mulungu kwa kuja nyama ili na damu.’ " Ivo ichilo icho wanhu wose wagala ng'ombe wawo na kuwachinja baho. 35 Maabaho Sauli kamzengela lupango Mndewa Mulungu, ikala mwanza wake wa mwanduso kutenda ivo.

36 Sauli kalonga, "Chihite kuwawinza Wafilisiti ichilo chino na kuwasolela vinhu vawo mbaka imitondo, sekechimuleke mgima hata munhu imwe."

Wawo wamwidika "Tenda chochose chiuwona chinoga."

Mbali mkulu wa nhambiko kalonga, "Leka chimpule Mulungu hano."

37 Ivo Sauli kamuuza Mulungu, "Nodaha kuwatowa Wafilisiti? Vino kwizawatenda wahumigwe na Waisilaili?" Mbali Mulungu hamwidike siku ija. 38 Sauli kalonga, "Izoni hano mweye walangulizi wose wa wanhu muladi muvimanye na kuwona uhasanyi utendigwe diyelo. 39 Noilaha kwa Mndewa Mulungu yeli mgima yowalopola Waisilaili, hata one yahawa mwanangu Yonasani, kolondeka yakomigwe." Habule munhu yamwidike. 40 Maabaho Sauli kawalongela Waisilaili wose, "Mwizakwima ubanzi uja, niye na mwanangu Yonasani chizakwima ubanzi umwenga."

Wamwidika., "Tenda chochose chiuwona chinoga."

41 Sauli kampula Mndewa Mulungu, Mulungu wa Isilaili, kalonga, "Habali hunidike msang'hani wako diyelo? One ubananzi uhawa wangu hebu wa mwanangu Yonasani, weye Mndewa Mulungu, Mulungu wa Isilaili, umtende mkulu wa nhambiko yapigise dibwe doditangigwa Ulimu, one ubananzi uhawa wa Waisilaili, umtende mkulu wa nhambiko yapigise dibwe doditangigwa Sumimu." Mkulu wa nhambiko kapigisa, baho Yonasani na Sauli wawoneka wabananga, mbali wanhu wawoneka wabule ubananzi. 42 Maabaho Sauli kalonga, "Pigiseni mabwe muladi kusagula hagati yangu na mwanangu Yonasani." Mkulu wa nhambiko katenda ivo, Yonasani kawoneka kabananga.

43 Maabaho Sauli kamulongela Yonasani, "Nilongele kutenda choni?"

Yonasani kamwidika, "Nilanza uki kwa balati jangu. Lelo nolondeka nidanganike."

44 Sauli kalonga, "Mulungu yanitendele vino na kufosa, kwaviya kweli Yonasani kwizadanganika."

45 Wanhu wamulongela Sauli, "Vino Yonasani kezadanganika ija yachigalile uhumi mkulu muna iisi ya Isilaili? Aka! Fana Mndewa Mulungu viyeli mgima, halwizalagala hata lunyele lumwe lwa ditwi jake, kwaviya kasang'hana hamwe na Mulungu diyelo." Ivo wanhu wawo wamkombola sekeyadanganike.

46 Sauli kaleka kuwawinza Wafilisiti, nawo wahita kumwawo.

47 Sauli viyekigwe kuwa mfalume wa Isilaili, kaitowa na wehi wake wose chila ubanzi, kaitowa na Moabu na Waamoni na Edomu na wafalume wa Soba na Wafilisiti. Hohose kawahuma. 48 Nayo kawatowa kwa ugalu Waameleki na kuwalopola Waisilaili muna yamakono ya waja wawatekile.

49 Wana wa chilume wa Sauli wakala Yonasani na Ishivi na Malikishua, mwana wa chike imkulu wa Sauli katangigwa Melabu na imdodo katangigwa Mikali. 50 Muke wa Sauli kakala Ahinoamu mndele wa Ahimaasi. Mkulu wa watowang'hondo wa Sauli kakala Abineli mwana wa chilume wa Neli. Neli kakala tata mdodo wa Sauli. 51 Kishi kakala tati yake Sauli na Neli tati yake Abineli wakala wana wa Abieli. 52 Kukala na ng'hondo ng'hulu ng'hani hagati ya Wafilisiti siku zose za Sauli. Sauli viyamuwone munhu galu hebu mwene nguvu yoyose kamsola muladi yailumbe na watowang'hondo wake.