1 Kukala na munhu imwe wa kabila da Benyamini, zina jake Kishi, mwana wa Abieli, mwana wa Seloli, mwana wa Bekolasi, mwana wa Afiya, yeli galu na yeli na nguvu. 2 Nayo kakala na mwana wa chilume zina jake Sauli, mwa Waisilaili wose hakukalile na munhu yanogile fana yeye, kakala mtali kufosa wanhu wose.

3 Vihongwe wamwenga wa Kishi, tati yake Sauli wakala wagile. Kishi kamulongela Sauli mwanage, "Sola msang'hani imwe uhite nayo ukazahile vihongwe." 4 Wahita kwa kufosela isi ya vilima va Efulaimu na isi ya Shalisha, mbali hawawapatile. Ivo wahita kufosela isi ya Shaalimu, mbali vihongwe hawakalile uko. Maabaho wafosela isi ya Benyamini, mbali hawawapatile. 5 Viwafikile muna iisi ya Sufu, Sauli kamulongela ija imsang'hani iyahitile nayo, "Chibwele ukaye, buleivo tata kezaleka kugesa chihongwe na kezachigesa cheye."

6 Mbali msang'hani ija kamwidika, "Muna dibululu dino muna mulotezi wa Mulungu, kohishimika ng'hani na chila chinhu chiyolonga chokuwa kweli. Chihite kumwake sambi yodahika kezachilongela nzila ya kusondelela."

7 Sauli kamulongela msang'hani wake, "Chihahita kumwake chizamwing'ha choni? Mana ndiya muna imikoba imala na chabule chinhu cha kumgalila mulotezi wa Mulungu, chizamwing'ha choni?"

8 Msang'hani ija kamwidika, "Nina lobo ya shekeli ya hela muna yamakono yangu, nizamwing'ha msang'hani wa Mulungu shekeli iyo muladi yachitambulile nzila ya kusondelela." 9 Baho umwaka muna iisi ya Isilaili munhu viyahitile kuuza mbuli kwa Mulungu, kalonga, "Haya chiteni kwa mulolaji," kwaviya munhu yotangigwa mulotezi sambi, baho umwaka katangigwa mulolaji. 10 Sauli kamulongela msang'hani wake, "Kulonga goya, leka chihite!" Ivo wahita mbaka kuna dibululu diyakalile munhu wa Mulungu.

11 Viwafikile muna dibululu, waiting'hana na wandele wohita kudeha mazi, nawo wawauza wandele wawo, "Mulolaji kabaha?" 12 Wawedika, "Kabaha, loleni kakuulongozi wenu, lopoleni, diyelo keza muna dibululu kwaviya wanhu wana nhambiko hanhu ha kutambikila. 13 Muhengila muna dibululu mwizamuwona hanakwela uchanyha kuja ndiya. Wanhu hawezakuja mbaka yeye yafike, kwaviya yeye niiyo yotemela mate nhambiko, maabaho wanhu wagonekigwe woja. Kweleni sambi mana lusita luno mwizamuwona." 14 Ivo Sauli na msang'hani wake viwengile muna dibululu, wamuwona Samweli kolawa muna dibululu na kokwela hanhu ha kutambikila.

15 Siku dimwe ing'hali Sauli hanakwiza, Mndewa Mulungu kamgubulila Samweli, kamulongela, 16 "Igolo lusita fana luno nizakugalila munhu kulawa kabila da Benyamini, weye kwizamuhaka mavuta muladi yawe mulangulizi wa Waisilaili, nayo kezawakombola wanhu wangu muna yamakono ya Wafilisiti. Niyawona magayo ya wanhu wangu na kulila kwawo kunifikila niye."

17 Igolo yake Samweli viyamuwonile Sauli, Mndewa Mulungu kamulongela, "Ino iyo munhu inikulongele, kezawalanguliza wanhu wangu." 18 Sauli kamkwenhukila Samweli hana ulwivi lwa bululu na kamuuza, "Nilongele kaye ya mulolaji yahalihi?"

19 Samweli kamwidika Sauli, "Niye iyo mulolaji, longola uhite hanhu ha kutambikila, kwaviya diyelo kwizakuja hamwe na niye. Maabaho imitondo nizakuleka usegele, nizakulongela chila chinhu chiugesa. 20 Sekeugaye, vihongwe waja wagile siku nhatu zifosile wawoneka. Vino yelihi Waisilaili iwomulonda ng'hani? Vino siyo weye na kaye ya tati yako?"

21 Sauli kamwidika, "Vino niye siyo wa kabila da Benyamini dili dodo kufosa makabila yose ya Isilaili? Vino wanhu wa lukolo lwangu siyo wadodo kufosa ng'holo za kabila da Benyamini? Lelo habali konilongela ivo?" 22 Maabaho Samweli kamulongoza Sauli na msang'hani wake mbaka kuna uluhelengo na kaweka hanhu ha hishima ng'hani howokala wanhu wagonikigwe, wakala wanhu malongo matatu. 23 Samweli kamulongela mwambikaji, "Nigalile unde da nyama donikwing'hile, diya donikulongele udike hakwe." 24 Mwambikaji kasola nyama ya chima, kaika haulongozi wa Sauli. Samweli kalonga, "Ikigwe hakwe niiyo iyo! Ike haulongozi wako uje, kwaviya nyama iyo kwikiligwa weye mbaka lusita lulondeka, mana nilonga, ‘Niwagoneka wanhu.’ " Ivo Sauli kaja hamwe na Samweli siku iyo. 25 Viwahumuluke kulawa hanhu ha kutambikila na kufika kuna dibululu, Samweli kalonga na Sauli uchanyha ya chisuwili chibadagale cha kaye yake.

26 Nawo walamuka chilochilo na Samweli kamtanga Sauli viyakalile uchanyha ya ichisuwili chibadagale, kalonga, "Isasale nikulage uhite kumwenu." Ivo Sauli kaisasala, yeye na Samweli walawa hamwe. 27 Viwakalile wohumuluka kuuhelelo wa dibululu, Samweli kamulongela Sauli, "Mulongele msang'hani wako yalongole. Weye wime hano na niye chidogo, muladi nikulongele chiyanilongele Mulungu." Msang'hani wake katenda ivo.