1 Wafilisiti wawaduganya hamwe watowang'hondo wawo wose uko Afeki, Waisilaili weka lago jawo habehi na nzasa ili uko Yezileeli. 2 Wakulu wa Wafilisiti viwakalile wofosa hamwe na mabumbila yawo ya watowang'hondo magana na maelufu, Daudi na wanhu wake wakala kuchisogo hamwe na Akishi. 3 Walangulizi wa Wafilisiti wauza, "Habali Waisilaili wawo wabahano?"

Akishi kawedika, "Vino ino siyo Daudi yakalile msang'hani wa Sauli mfalume wa Isilaili? Kahamwe na niye lusita lutali. Kwandusila viyamulekile Sauli mbaka sambi siwonile ubananzi wowose kumwake."

4 Mbali walangulizi wa Wafilisiti wamuwonela ludoko, wamulongela, "Mbweleze munhu iyo yabwele hanhu hake houmwing'hile. Sekeyahite hamwe na cheye kuna ing'hondo, buleivo kezahinduka na kuwa mwihi wetu. Huwona kuwa munhu ino kezapata nzila inogile ya kuilumba na mwenevale wake na kudumula matwi yetu wenyewo? 5 Vino siyo ija Daudi yowembile mbuli zake muna uwila,

‘Sauli kawakoma wanhu maelufu.

Daudi kawakoma wanhu maelufu longo’?"

6 Ivo Akishi kamtanga Daudi, kamulongela, "Fana Mndewa Mulungu viyokala, weye kuwa mwaminika na niye nilonda uwe hamwe na niye muna dibumbila da watowang'hondo. Kwandusila lusita luufikile kumwangu mbaka sambi sinawona ubananzi wowose kumwako, mbali wenevale wamwenga hawakutogola bule. 7 Ivo bwela kwa tindiwalo, sekeuwatendele dihile jojose walangulizi wa Wafilisiti."

8 Daudi kamuuza Akishi, "Nitenda choni? Vino kuwona choni kumwangu niye msang'hani wako, lusita lose lunikalile kumwako mbaka sekenitogoleligwe kuhita kuitowa na wehi wako diyelo?"

9 Akishi kamwidika Daudi, "Niye nivimanya kuwa weye kunoga haulongozi wangu fana viya msenga wa Mulungu, mbali walangulizi wa Wafilisiti walonga, ‘Ino hezahita hamwe na cheye kuna ing'hondo.’ 10 Ivo uidawe chilochilo, weye hamwe na wasang'hani wa mwenevale wako Sauli wezile hamwe na weye, segeleni kuhakunguzuka."

11 Ivo Daudi na wanhu wake walamka chilochilo kubwela kuna iisi ya Wafilisiti. Nawo Wafilisiti wahita Yezileeli.