1 Samweli kamulongela Sauli, "Mndewa Mulungu kanituma nikuhake mavuta uwe mfalume wa wanhu wake Waisilaili, tegeleza usenga wa Mndewa Mulungu. 2 Mndewa Mulungu Yeli na Udahi, kolonga, ‘Nichika muumoyo chila chinhu Waameleki chiwawatendele Waisilaili viwalawile Misili. 3 Hiteni mukawatowe Waameleki na kuvibananga vinhu vose viweli navo. Sekemuleke chinhu, sekemuwawonele ubazi, wakomeni walume na wanaake na wana na ving'hele na ng'ombe na ng'hondolo na ngamia na vihongwe.’ "

4 Sauli kawatanga wanhu wake na kawapeta uko Telemu, watowang'hondo wogenda kwa magulu wakala 200,000 na wanhu wa Yuda wakala 10,000. 5 Sauli kahita kuna dibululu da Amaleki na kadisepa kuna dikolongo. 6 Sauli kawalongela Wakeni, "Segeleni kwa Waamaleki muladi sekenimnangeni hamwe nawo, kwaviya wasaho zenu wawatendela Waisilaili mbuli zinogile viwalawile Misili." Ivo Wakeni wasegela kwa Waamaleki.

7 Sauli kawatowa Waamaleki wose kwandusila Havila mbaka Shuli ili ubanzi wa ulawilo wa zuwa wa Misili. 8 Kamgwila Agagi mfalume wa Waamaleki na kawakoma wanhu wose kwa panga. 9 Mbali Sauli na wanhu wake hawamkomile Agagi, iviya hawawakomile ng'hondolo na ng'ombe na madang'ang'a yanenehe na wanang'hondolo na chochose chinogile na hawawanangile. Chila chinhu chihile chili hachifaya wachinanga.

10 Maabaho mbuli ya Mndewa Mulungu imwizila Samweli, ilonga, 11 "Muhavu sigambenimwike Sauli kuwa mfalume, kwaviya kanihinduka, kalema kunisondelela na hatendile vinimulagilize." Samweli kakala na usungu na kamulilila Mndewa Mulungu ichilo chose. 12 Imitondo ng'hani Samweli kahita kulonga na Sauli, mbali kalongeligwa, "Sauli kafika bululu da Kalimeli na kasimika mabwe ya lukumbuso kwa ichimu chake mwenyewo, kahinduka na kahita Giligali." 13 Samweli viyahitile kwa Sauli, Sauli kamulongela, "Mndewa Mulungu yakutemele mate Samweli! Niyazindilila malagilizo ya Mndewa Mulungu."

14 Samweli kauza, "Habali nohulika ng'hondolo na ng'ombe wolila?"

15 Sauli kalonga, "Wawasola kulawa kwa Waameleki. Wanhu hawawakomile ng'hondolo na ng'ombe wanenehe, muladi wawalave nhambiko kwa Mndewa Mulungu, Mulungu wako, mbali wamwenga wasigale chiwananga ng'hani."

16 Maabaho Samweli kamulongela Sauli, "Nyamala! Nizakulongela mbuli zoyanilongele Mndewa Mulungu ichilo chifosile."

Sauli kamwidika, "Nilongele."

17 Samweli kalonga, "Ingawa kuiwona kwa mdodo muna dikabila jako, vino hutendigwe kuwa mtawala wa makabila ya Isilaili? Mndewa Mulungu kakuhaka mavuta uwe mfalume wa Isilaili. 18 Maabaho Mndewa Mulungu kakutuma na kakulagiliza, kalonga, ‘Hita ukawanange Waamaleki wahasanyi, uitowe nawo mbaka uwadanganize wose.’ 19 Lelo habali humtegeleze Mndewa Mulungu? Habali kusola vinhu vihokigwe na kutenda mbuli zihile haulongozi wa Mndewa Mulungu?"

20 Sauli kamulongela Samweli, "Nizindilila dizi da Mndewa Mulungu nihita kuja koyanhumile Mulungu. Niwadanganiza Waamaleki wamwenga wose, mbali nibwela na Agagi mfalume wawo. 21 Wanhu wasola ng'hondolo na ng'ombe wanenehe ng'hani walondeke kunangigwa hamwe na vinhu viwahokile muladi wamulavile Mndewa Mulungu wako fana nhambiko hano Giligali."

22 Samweli kalonga,

"Vino Mndewa Mulungu kolonda nhambiko za kutimbula na nhambiko zimwenga?

Hebu kolonda kutegeleza dizi jake?

Kutegeleza kunoga ng'hani kufosa kulava nhambiko,

na kuhulika kunoga ng'hani kufosa bambala da bebelu da ng'hondolo.

23 Kwaviya kuleka kumtegeleza Mndewa Mulungu kulinga fana uhasanyi wa ulaguzi,

udugi ulinga fana wihi na kutambikila nyang'hiti za milungu.

Kwaviya kuilema mbuli ya Mndewa Mulungu,

nayo kakulema sekeuwe mfalume."

24 Sauli kamulongela Samweli, "Nihasanya, nileka kuzindilila ndagilizi ya Mndewa Mulungu na mbuli zako. Niwadumba wanhu wangu, ivo nitenda viwalondile. 25 Nokulamba unilekelele uhasanyi wangu na ubwele hamwe na niye muladi nimtambikile Mndewa Mulungu."

26 Samweli kamulongela, "Sizabwela hamwe na weye. Kuilema mbuli ya Mndewa Mulungu, nayo kakulema sekeuwe mfalume wa Isilaili!"

27 Samweli viyahinduke muladi yasegele, Sauli kamha mhindo ya walo jake na didegeka. 28 Samweli kamulongela, "Mndewa Mulungu kaudega ufalume wa Isilaili kwandusila diyelo na kamwing'ha Muisilaili miyago yanogile kufosa weye. 29 Mulungu wa siku zose wa Isilaili halonga uvwizi na hagalula magesa yake, kwaviya yeye siyo munhu mbaka yagalule magesa yake."

30 Sauli kamwidika, "Nihasanya. Mbali nokulamba unihishimu haulongozi wa walala wa wanhu wangu na Waisilaili na ubwele hamwe na niye muladi nimtambikile Mndewa Mulungu, Mulungu wako."

31 Ivo Samweli kabwela hamwe na Sauli, nayo Sauli kamtambikila Mndewa Mulungu.

32 Maabaho Samweli kalonga, "Nigalileni hano Agagi mfalume wa Waamaleki." Agagi kamuhitila Samweli kuno kohuwila kuilegeha. Agagi kalonga, "Kweli usungu wa ifa umala." 33 Samweli kalonga, "Fana upanga wako viuwatendile wanaake wadanganikiligwe na wana wawo, iviya mami yako kezadanganikiligwa na mwanage." Ivo Samweli kamkanha Agagi vihande haulongozi wa Mndewa Mulungu uko Giligali. 34 Maabaho Samweli kahita Lama, Sauli kahita ukaye yake uko Gibea. 35 Ingawa Samweli kamulilila Sauli, Samweli na Sauli hawaiwone kaidi mbaka Samweli viyadanganike. Mndewa Mulungu kawona vinoga sigambeyamtende Sauli kuwa mfalume wa Isilaili.