1 Daudi na wanhu wake viwafikile Zikilagi siku yeketatu, Waamaleki wakala waitowa isi ya Negebu na Zikilagi. Waditowa bululu da Zikilagi na kuditimbula kwa moto, 2 na wawasola wanaake wakalile umo, wakulu kwa wadodo, hawawakomile mbali wahita nawo.

3 Daudi na wanhu wake viwafikile Zikilagi, wafika bululu ditimbuligwa, wake zawo na wana wawo wa chilume na wana wawo wa chike wasoligwa mateka. 4 Daudi na wanhu wakalile hamwe nayo, walandula madizi yawo walila kwa usungu mbaka wamalilwa nguvu ya kulila kaidi. 5 Iviya wake waidi wa Daudi wasoligwa mateka, Ahinoamu wa Yezileeli na Abigaili, mgane wa Nabali wa Kalimeli. 6 Daudi kakala na lugano mkulu kwaviya walonga wolonda kumtowa na mabwe. Chila munhu kakala na usungu muna umoyo wake kwa ichimu cha kwagilwa na wanage wa chilume na wachike. Mbali Daudi kaigangamiza kwa ichimu cha Mndewa Mulungu, Mulungu wake.

7 Maabaho Daudi kamulongela mkulu wa nhambiko Abiasali mwana wa Ahimeleki, "Nigalile chizibawo." Nayo Abiasali kamgalila. 8 Daudi kamuuza Mndewa Mulungu, "Vino niwasondelele wanhu waja waditimbule bululu jetu? Vino nodaha kuwapata?"

Mndewa Mulungu kamwidika, "Wasondelele. Kweli kwizawapata na kwizawakombola wasoligwe."

9 Daudi hamwe na wanhu waja magana sita, wafika kuna dikolongo da Besoli, hanhu baho wanhu wamwenga walekigwa kuchisogo. 10 Daudi na wanhu wake magana mane wagendelela kusondelela, mbali wanhu magana maidi wasigala kuchisogo kwaviya walegela ng'hani mbaka wapotigwa kuloka chizanda cha Besoli.

11 Wamfika Mmisili kuichuwala, wamgala kwa Daudi. Wamwing'ha gate na mazi ya kung'wa. 12 Maabaho wamwing'ha chibuluga cha nhini na vipambo vidi va zabibu zinyalile. Kaja na kapata nguvu, kwaviya kakala hanakuja chinhu chochose hebu kung'wa mazi kwa siku nhatu.

13 Daudi kamuuza, "Mwenevale wako yelihi na kolawa kulihi?"

Nayo kamwidika, "Niye Mmisili, msang'hani wa Mwamaleki. Mwenevale wangu kanileka kuchisogo kwaviya nikala mtamu siku nhatu zifosile. 14 Chiwatowa wanhu wa isi ya Negebu ya Wakelesi na isi ya Yuda na Negebu ya Kalebu. Bululu da Zikilagi chiditimbula kwa moto."

15 Daudi kamuuza, "Vino weye kodaha kunigala kwa Waamaleki waja?"

Nayo kamwidika, "One uhanilahila kwa Mulungu kuwa hwizanikoma hebu kuniguma muna yamakono ya mwenevale wangu, nizakugala."

16 Kamgala Daudi mbaka hanhu howakalile Waameleki, nawo wakala wapwililika chila hanhu kwaviya wakala woja na kung'wa na kutenda dugila, kwa ichimu cha vinhu vingi viwasolile kulawa muna iisi ya Wafilisiti na isi ya Yuda. 17 Daudi kaitowa nawo kwandusila imitondo mbaka ichigulogulo, habule mulume yadahile kwiibanga, mbali wabwanga magana mane wowakwelile ngamiya na kuibanga. 18 Daudi kabweleza chila chinhu chiwasolile Waamaleki, hamwe na wake zake waidi. 19 Habule chinhu chagile, mdodo hebu mkulu, mwana wa chilume hebu wa chike hebu mateka hebu chila chinhu chiwasolile, Daudi kavibweleza vose. 20 Iviya Daudi kasola mabumbila yose ya ng'hondolo na ng'ombe, wanhu wake wowawalongoze kuulongozi wa wanyama wamwenga, walonga, "Wanyama wano Daudi kawahoka kuna ing'hondo."

21 Maabaho Daudi kawafikila wanhu waja magana maidi wowakalile wolonda kusinduka mbaka wapotigwa kumsondelela Daudi, waja wawalekile wakale habehi na chizanda cha Besoli. Nawo walawa kunze muladi kuwahokela Daudi na wanhu waja wakalile hamwe nayo. Daudi viyawakwenhukile wanhu wawo kawalamsa. 22 Mbali wanhu wotenda yehile na watatali mwa wanhu wa Daudi, walonga, "Kwaviya hawahitile hamwe na cheye, hachizaweng'ha chinhu chochose chochisolile kulawa kwa Waameleki, mbali chila munhu kezakwing'higwa muke wake na wanage. Wawasole, wasegele."

23 Daudi kedika, "Siivo bule ndugu zangu, hamudaha kutenda ivo kwa chiya Mndewa Mulungu choyachipatile. Yeye kachikaliza na kadika muna yamakono yetu bumbila diya dikalile doitowa na cheye. 24 Vino yelihi yondayategeleze mbuli zomulonga? Waja wasigale na vinhu vetu wezakwing'higwa sawa na waja wahitile kuna ing'hondo. Wose wezagoliligwa sawa." 25 Daudi kaitenda mbuli iyo iwe lagilizo na ndagilizi kwa Waisilaili, kwandusila siku iyo mbaka diyelo.

26 Daudi viyafikile Zikilagi, katuma vinhu vimwenga viyasolile kwa walala wa Yuda, kalonga, "Loleni, chitumetume chenu kulawa muna ivinhu va wehi wa Mndewa Mulungu."

27 Vinhu ivo kawatuma walala waja wakalile Beseli na Lamosi Negebu na Yatili 28 na Aloeli na Sifimosi na Eshitemoa 29 na Lakali na kwa walala wa mabululu ya Wayelameeli na mabululu ya Wakeni 30 na kwa walala wa Holima na kwa walala wa Boli Ashani na kwa walala wa Asaki 31 na kwa walala wa Hebuloni. Iviya Daudi kawatuma vinhu kwa walala wa mabululu yose koyahitile yeye na wanhu wake.