1 Sauli kakala mwaka umwe na maabaho kawa mfalume. Viyalangulize isi ya Isilaili miyaka midi, 2 Sauli kasagula walume wa Isilaili 3,000. Walume 2,000 wakala hamwe nayo uko Mikimashi na kuna isi ya vilima ya Beseli. Walume 1,000 wakala hamwe na Yonasani uko Gibea muna iisi ya Benyamini. Wanhu wasigale kawalongela chila munhu yabwele ukaye yake.

3 Yonasani kawahuma Wafilisiti wakalile muna dilago uko Geba, Wafilisiti wahulika mbuli iyo. Sauli katowa mhalati muna iisi yose, kalonga, "Waisilaili nawahulike." 4 Waisilaili wose wahulika kuwa Sauli kawatowa Wafilisiti muna dilago jawo, lelo Wafilisiti wawehila ng'hani Waisilaili. Ivo wanhu waiduganya hamwe kuilumba na Sauli uko Giligali.

5 Wafilisiti waiduganya hamwe muladi kuitowa na Waisilaili, matololi 30,000 ya kubululigwa na falasi na wakwelafalasi 6,000 na wanhu wengi fana msanga wa mhwani. Wakwela uchanyha na kwika lago jawo uko Mikimashi ubanzi wa ulawilo wa zuwa wa Besi Aveni. 6 Waisilaili viwawonile kuwa wamuna yamagayo, mana watowigwa ng'hani, wanhu waifisa muna yamatuka na muna yamakombo na muna imiluwe na kuna yamaleme na muna yamasima. 7 Waisilaili wamwenga waloka lwanda lwa Yoludani wengila muna iisi ya Gadi na Gileadi.

Sauli kakala uko Giligali, wanhu wose wamsondelela kuno wogudemeka kwa kudumba. 8 Kawagoza siku saba, lusita lwikigwe na Samweli. Mbali Samweli hezile Giligali, ivo wanhu wa Sauli wandusa kupwililika. 9 Ivo Sauli kalonga, "Nigalileni nhambiko ya kutimbula na nhambiko za kugala tindiwalo." Nayo kalava nhambiko ya kutimbula. 10 Viyakomeleze kulava nhambiko ya kutimbula, Samweli keza. Sauli kahita kumuhokela na kumulamsa. 11 Samweli kamuuza, "Kutenda choni?"

Sauli kamwidika, "Viniwonile wanhu wopwililika na weye hwizile kwa lusita lwikigwe, iviya Wafilisiti waiduganya hamwe uko Mikimashi, 12 nigesa kuwa sambi Wafilisiti wezanizila kuno Giligali kunitowa na niye sipulile kutazigwa na Mndewa Mulungu. Ivo nilondeka kulava nhambiko ya kutimbula."

13 Samweli kamulongela Sauli, "Kutenda ubozi, huzindilile lagilizo diyakulagilize Mndewa Mulungu, Mulungu wako. One uhazindilile, Mndewa Mulungu yahawatendile welesi wako kuwa wafalume wa Isilaili siku zose. 14 Mbali lelo ufalume wako hawizagendelela. Mndewa Mulungu kezamwing'ha munhu mwene moyo wa kumnogeza. Nayo Mndewa Mulungu kamulagiliza yawe mulangulizi wa wanhu wake, kwaviya weye huzindilile lagilizo jake."

15 Samweli kasegela Giligali na kahita Gibea muna iisi ya Benyamini, Sauli kawapeta walume wakalile hamwe nayo, wakala 600. 16 Sauli na Yonasani mwanage na wanhu wakalile hamwe nawo, weka lago jawo uko Geba muna iisi ya Benyamini, mbali Wafilisiti weka lago jawo uko Mikimashi. 17 Wahokaji walawa muna dilago da Wafilisiti vibumbila vitatu, chibumbila chimwe chihindukila nzila yoihita bululu da Afula mbaka isi ya Shuali. 18 Wamwenga wahindukila nzila yoihita Besi Holoni, chibumbila chimwenga chihindukila nzila ya muna imhaka yoihita kuna dibawe da Seboimu ubanzi wa kuchuwala.

19 Hakukalile na muhunzi yoyose muna iisi yose ya Isilaili, kwaviya Wafilisiti walonga, "Buleivo Waisilaili wezatenda na migoha." 20 Waisilaili wose wahita kwa Wafilisiti kunola magembe yawo na sengo zawo na nhemo zawo na masululu yawo. 21 Walondeka kuliha hela nyingi kunola gembe na sululu na uma na nhemo na migoha. 22 Ivo muna isiku ya ng'hondo habule mtowang'hondo yakalile na panga hebu mgoha, mbali Sauli na Yonasani mwanage wakala navo.

23 Wafilisiti wagala bumbila da watowang'hondo kukaliza nzila isonhela Mikimashi.