1 Mndewa Mulungu kamulongela Samweli, "Kwizamulilila Sauli mbaka zuwaki, kwandusila vinimulemile sekeyawe mfalume wa Isilaili? Dimemeze mavuta hembe jako uhite kwa Yese wa uko Beselehemu. Nimsagula mwanage imwe kuwa mfalume."

2 Samweli kalonga, "Nizadahaze kuhita? Sauli yahahulika mbuli iyo kezanikoma."

Mndewa Mulungu kamulongela, "Sola dang'ang'a zike uhite najo, ukalonge, ‘Niza kumulavila nhambiko Mndewa Mulungu.’ 3 Mgoneke Yese kuna ukulava nhambiko, nizakulagusa choulondeka kutenda. Kwizamuhaka mavuta kwa ichimu changu munhu ija yondanikulagusile."

4 Samweli katenda viyalagilizigwe na Mndewa Mulungu. Viyafikile Beselehemu, walala wa bululu wagudemeka viwaiting'hane nayo. Wamuuza, "Kwiza kwa tindiwalo?"

5 Samweli kawedika. "Ona, niza kwa tindiwalo, niza kumulavila nhambiko Mndewa Mulungu. Isafyeni mweye wenyewo na mwize mulave nhambiko hamwe na niye." Maabaho kawasafya Yese na wanage na kawagoneka kuna inhambiko.

6 Viwafikile, Samweli kamuwona Eliabu mwana imkulu wa Yese, Samweli kagesa, "Kweli munhu ino niiyo yasaguligwe na Mndewa Mulungu."

7 Mbali Mndewa Mulungu kamulongela Samweli, "Sekeulole utali wake hebu chihanga chake, kwaviya niye nimulema. Niye silola fana wanhu viwolola. Wanhu wolola lukuli mbali niye nolola moyo."

8 Maabaho Yese kamtanga Abinadabu na kamfoseza kuulongozi wa Samweli. Mbali Samweli kalonga, "Mndewa Mulungu hamsagule ino." 9 Maabaho Yese kamfoseza Shama. Samweli kalonga, "Mndewa Mulungu hamsagule ino." 10 Ivo Yese kawafoseza wanage saba wa chilume muhala kuulongozi wa Samweli, mbali Samweli kamulongela, "Mndewa Mulungu hawasagule wano." 11 Maabaho Samweli kamuuza Yese, "Kuna wana wa chilume wamwenga?"

Yese kamwidika, "Kasigala imdodo, mbali kodima ng'hondolo." Samweli kamulongela, "Tuma wanhu wakamgale, kwaviya hachizakala hasi mbaka yafike." 12 Ivo kamtuma munhu, nayo kamgala. Mwana imdodo kakala na nguvu na yeli na meso yanogile na chihanga chinogile. Mndewa Mulungu kamulongela Samweli, "Muhake mavuta muna iditwi munhu ino, kwaviya niiyo yeye!"

13 Samweli kasola hembe jake dili na mavuta na kamuhaka haulongozi wa sekulu zake. Kwandusila siku iyo na kugendelela Muhe wa Mndewa Mulungu umwizila Daudi kwa nguvu. Maabaho Samweli kahita Lama. 14 Muhe wa Mndewa Mulungu usegela kwa Sauli na muhe wihile kulawa kwa Mndewa Mulungu umgaza.

15 Wasang'hani wa Sauli wamulongela, "Muhe wihile kulawa kwa Mndewa Mulungu wokugaza. 16 Leka weye mwenevale wetu uchilagilize wasang'hani wako chili hano chikuzahilile munhu yodaha kutowa bango. Kezatowa lusita muhe wihile kulawa kwa Mndewa Mulungu vondaukwizile, nayo kezatowa bango na weye kwizanyamala." 17 Ivo Sauli kawalongela wasang'hani wake, "Nizahilileni munhu yadahile kutowa bango vinogile munigalile." 18 Imwe wa wasang'hani wake kalonga, "Nimuwona mwana imwe wa Yese Mbetelehemu kadaha kutowa bango, iviya ni galu wa ng'hondo na kofambula mbuli goya na kana chihanga chinogile. Mndewa Mulungu kahamwe nayo." 19 Ivo Sauli kawatuma wasenga kwa Yese, kalonga, "Mtume mwanago Daudi kumwangu yoyodima ng'hondolo." 20 Yese kasola vihongwe wa kupapa magate na mkoba wa mbende wa divai na mwanaluti, kawatuma kwa Sauli hamwe na mwanage Daudi. 21 Daudi kahita kwa Sauli na kandusa kumsang'hanila. Sauli kamnogela ng'hani Daudi, ivo kawa mpagazi wa via vake va ng'hondo. 22 Maabaho Sauli katuma usenga kwa Yese, kalonga, "Muleke Daudi yasigale na niye mana ninogelwa nayo." 23 Chila lusita muhe uja wihile kulawa kwa Mulungu viumwizile Sauli, Daudi kasola chinubi katowa kwa mkono wake, nayo Sauli kasangalala na kaihulika vinogile na muhe uja wihile umuleka.