1 Daudi viyalongeligwe, "Lola Wafilisiti woditowa bululu da Keila na wohoka mhule hana ihanhu ha kuhwagila," 2 Daudi kamuuza Mndewa Mulungu, "Nihite kuwatowa Wafilisiti wawo?"

Mndewa Mulungu kamwidika, "Hita ukawatowe na kudilopola bululu da Keila."

3 Mbali wasang'hani wa Daudi wamulongela, "Hano Yuda chodumba. Chizadumba ng'hani one chihahita uko Keila kuwatowa Wafilisiti."

4 Daudi kamuuza Mndewa Mulungu kaidi, nayo kamwidika, "Humuluka uhite Keila, kwaviya nizakutenda uwahume Wafilisiti." 5 Daudi na wasang'hani wake wahita kuna dibululu da Keila, waitowa na Wafilisiti na wawahoka ng'ombe wawo na kuwakoma vihile. Ivo Daudi kawalopola wanhu wa Keila. 6 Lusita Abiasali mwana wa Ahimeleki viyamkimbilile Daudi uko Keila, kamha chizibawo mumkono wake.

7 Sauli kalongeligwa kuwa Daudi kahita Keila, nayo Sauli kalonga, "Mulungu kamguma muna yamakono yangu, kwaviya Daudi kaifunga mwenyewo kwa kwingila bululu dili na nyivi na mhalalingwe." 8 Sauli kawatanga wanhu wose wahite kuna ing'hondo uko Keila na kumzinga Daudi na wanhu wake. 9 Daudi viyamanyile kuwa Sauli kailunga kumtendela mbuli zihile, kamulongela mkulu wa nhambiko Abiasali, "Gala hano ichizibawo." 10 Daudi kalonga, "Weye Mndewa Mulungu, Mulungu wa Isilaili, niye msang'hani wako nihulika kuwa Sauli kolonda kwiza kuno Keila kudinanga bululu kwa ichimu changu. 11 Vino wakaya wa Keila wezanilava yanigwile? Vino Sauli kezakwiza fana msang'hani wako viyahulike? Weye Mndewa Mulungu, Mulungu wa Isilaili, nilongele niye msang'hani wako." Mndewa Mulungu kamwidika, "Kezakwiza." 12 Daudi kauza kaidi, "Vino wakaya wa Keila wezaniguma muna yamakono ya Sauli?" Mndewa Mulungu kedika, "Ona, wezatenda ivo." 13 Daudi na wanhu wake magana sita, wasegela Keila na wahita chila hanhu howalondile. Sauli viyalongeligwe kuwa Daudi kakimbila Keila, Sauli hahitile bule uko. 14 Daudi kakala yokala muna zimhongono za chuwala muna izisi za milima muna ichuwala cha Zifu. Sauli kakala yomzahila chila siku, mbali Mulungu hamulekile yamgwile. 15 Daudi viyakalile uko Holeshi muna ichuwala cha Zifu, kavimanya kuwa Sauli keza kumkoma. 16 Yonasani mwana wa Sauli kenuka na kahita kwa Daudi uko Holeshi na kamguma moyo kuwa Mulungu komkaliza. 17 Kamulongela, "Sekeudumbe Daudi, tati yangu hezakugwila. Kwizakuwa mfalume muna iisi ya Isilaili na niye nizakuwa mtazi wako. Tati yangu Sauli kaimanya mbuli iyo." 18 Wawo waidi waija sale haulongozi wa Mndewa Mulungu. Maabaho Yonasani kahita ukaye, mbali Daudi kasigala uko Holeshi. 19 Ivo Wazifi wahita kwa Sauli uko Gibea na wamulongela, "Daudi koifisa kumwetu kuna imhongono uko Holeshi kuna ichilima cha Hakila, ubanzi wa kusi wa Yeshimoni. 20 Lelo weye mfalume wize lusita lolose fana voulonda muumoyo wako, cheye chizakutaza kumguma muna yamakono yako." 21 Sauli kedika, "Mndewa Mulungu yamtemeleni mate kwaviya muniwonela ubazi. 22 Hiteni mukavimanye goya. Mukahamanye hanhu hoyoifisa na yelihi yamuwonile uko, kwaviya nilongeligwa yeye mbala ng'hani. 23 Zahileni muhamanye hanhu hoyoifisa, maabaho mubwele kumwangu na mbuli imanyike. Niye nizahita hamwe na mweye. One yahawa muna iisi, nizamzahila mwa ng'holo zose za Yuda." 24 Nawo wasegela wahita mbaka Zifu wamulongolela Sauli, mbali Daudi na wanhu wake wakala muna ichuwala cha Maoni, umo Alaba ubanzi wa kusi ya Yeshimoni. 25 Sauli na wanhu wake wandusa kuwazahila. Daudi viyalongeligwe mbuli iyo, kahumuluka mbaka kuna uluwe na kakala muna ichuwala cha Maoni. Sauli viyahulike mbuli iyo, kamsondelela Daudi kuna ichuwala cha Maoni. 26 Sauli kakala yohita ubanzi uno wa mulima na Daudi na wanhu wake wahita ubanzi umwenga wa mulima. Daudi katenda himahima ng'hani muladi yambange Sauli, kwaviya Sauli na wanhu wake wakala wowazinga Daudi na wanhu wake muladi wawagwile. 27 Mbali msenga keza kwa Sauli, kalonga, "Izo himahima, kwaviya Wafilisiti woitowa isi." 28 Ivo Sauli kabwela na kaleka kumsepa Daudi, kahita kuitowa na Wafilisiti. Lekamana hanhu baho wahatanga "Luwe lwa kuibangila." 29 Maabaho Daudi kalawa uko na kahita kukala muna imhongono ya Engedi.