1 Samweli kawalongela mbuli ya Mulungu Waisilaili wose.

Ivo Waisilaili wahita kuitowa ng'hondo na Wafilisiti. Waisilaili weka lago jawo uko Ebenezeli na Wafilisiti weka lago jawo uko Afeka. 2 Wafilisiti waisasala kuwatowa Waisilaili na viwaitowile, Waisilaili wahumigwa na Wafilisiti. Waisilaili wakomigwe wakala 4,000. 3 Watowang'hondo wa Waisilaili wabwela kuna dilago jawo, walangulizi walonga, "Habali Mndewa Mulungu kachileka chihumigwe na Wafilisiti diyelo? Chihite chikadisole sanduku da lagano kulawa Shilo chidigale kuno, dize hagati yetu na kuchikombola muna yamakono ya wehi wetu." 4 Ivo wawatuma wanhu wahite Shilo, nawo wadigala sanduku da lagano da Mndewa Mulungu Yeli na Udahi, yokala hagati ya makelubi uchanyha ya sanduku da lagano. Hofini na Finehasi, wana waidi wa Eli, wakala uko hamwe na sanduku ijo da Mndewa Mulungu.

5 Sanduku da lagano da Mndewa Mulungu vidingile muna dilago, Waisilaili wose waguta kwa deng'ho mbaka isi igudemeka. 6 Wafilisiti viwahulike woguta, walonga, "Nyangi zino zose za choni muna dilago da Waebulaniya?"

Viwavimanyile kuwa sanduku da lagano da Mndewa Mulungu dingila muna dilago da Waisilaili, 7 Wafilisiti wadumba kwaviya walonga, "Mulungu keza muna dilago, chizagaya! Mbuli ilingile vino hainalawilila. 8 Chizagaya! Yelihi yodaha kuchikombola kulawa muna yamakono ya milungu ino ili na nguvu? Iyo ni milungu iwatowile Wamisili kwa hulo uko kuchuwala! 9 Wafilisiti gangamaleni! Tendeni chilume, sekemuwe watumwa wa Waebulaniya fana wawo viwakalile watumwa wenu. Tendeni chilume mukaitowe nawo."

10 Ivo Wafilisiti waitowa nawo, Waisilaili watowigwa na chila munhu kakimbilila ukaye yake. Waisilaili wakomigwa wengi ng'hani, wakomigwa watowang'hondo 30,000 wogenda kwa migulu. 11 Sanduku da lagano da Mulungu disoligwa, nawo wana wa chilume waidi wa Eli, Hofini na Finehasi wakomigwa.

12 Siku iyoiyo munhu kulawa kabila da Benyamini kakimbila kulawa kuna ing'hondo mbaka kafika Shilo. Viwalo vake videgeka na kakala na timbwisi muna iditwi jake kulagusa kuwa kana usungu. 13 Viyafikile, Eli kakala muna ichigoda chake mumgwazo wa nzila kogozela, kwaviya moyo wake udidumba sanduku da lagano da Mulungu. Munhu ija viyengile muna dibululu kalonga mbuli iyo na wanhu wa bululu jose waguta. 14 Eli viyahulike nyangi, kauza, "Nyangi izo fambulo jake choni?" Munhu ija kahita kwa Eli kumulongela. 15 Eli kakala na miyaka malongo kenda na minane, meso yake yatulika, hadahile kuwona. 16 Munhu ija kamulongela Eli, "Niye nilawa kuna ing'hondo, nikimbila kulawa kuna ing'hondo diyelo."

Eli kamuuza, "Mwanangu, uko kulawilila choni?"

17 Munhu ija kamwidika, "Waisilaili wawakimbila Wafilisiti na wakomigwa wanhu wengi ng'hani! Wanago waidi Hofini na Finehasi iviya wadanganika na sanduku da lagano da Mulungu disoligwa."

18 Munhu ija viyaditambule sanduku da lagano da Mulungu, Eli kagwa chingalingali kulawa muna ichigoda chake hamgwazo ya lwivi lukulu lwa bululu. Kabeneka isingo na kadanganika, kwaviya kakala mulala na kazama. Kakala mulangulizi wa Waisilaili miyaka malongo mane.

19 Mkoi wake yeli muke wa Finehasi kakala na wimo na kakala habehi na kuibasula. Viyahulike kuwa sanduku da lagano da Mulungu dihokigwa na kuwa mkoi wake na mulumake wadanganika, kahita kwa mulala kuibasula kwaviya kapata usungu. 20 Viyakalile habehi kudanganika, wanaake wakalile womtaza wamulongela, "Sekeudumbe, kwaviya kuvumbula mwana wa chilume." Mbali hawedike na hawategeleze. 21 Kamwing'ha zina imwana Ikabodi, kalonga, "Utunhizo usegela Isilaili," kwaviya sanduku da lagano da Mulungu disoligwa na kwa ichimu cha ifa ya mkoi wake na mulumake. 22 Kalonga, "Ukulu usegela Isilaili, kwaviya sanduku da lagano da Mulungu dihokigwa."