1 Baho Daudi kagesa muumoyo wake, "Siku dimwe muna zisiku zino, Sauli kezaninanga. Nzila inogile kumwangu ni kukimbilila kuna iisi ya Wafilisiti. Baho Sauli kezaleka kunizahila hohose muna iisi ya Isilaili na nizakuwa nihonyokwa muna yamakono yake."

2 Daudi kasegela hamwe na wanhu magana sita wakalile hamwe nayo, wahita kwa Akishi mwana wa Maoki mfalume wa Gasi. 3 Daudi na wanhu wake wakala uko Gasi hamwe na Akishi. Chila munhu kakala hamwe na wanhu wa muna ikaye yake. Daudi nayo kakala na wake zake waidi Ahinoamu wa Yezileeli na Abigaili mgane wa Nabali wa Kalimeli. 4 Sauli viyalongeligwe kuwa Daudi kakimbilila Gasi, hagendelele kumzahila.

5 Daudi kamulongela Akishi, "One ihakunogela, nileke nikale muna dibululu dimwe muna imigunda. Sifaya kukala hamwe na weye muna dibululu dino da chifalume." 6 Siku iyo Akishi kamwing'ha Daudi bululu da Zikilagi. Ivo kwandusila siku iyo Zikilagi diwa bululu da wafalume wa Yuda. 7 Daudi kakala muna iisi ya Wafilisiti lusita lwa mwaka umwe na miyezi mine.

8 Daudi na wanhu wake wakala wohita kuwatowa Wageshuli na Wagilizi na Waamaleki wakalile wakaya wa isi iyo kwandusila umwaka. Kawatowa muna iisi yawo mbaka Shuli muna imhaka ya Misili. 9 Daudi kawatowa wanhu wa isi iyo, hamsigaze mulume hebu muke, kasola ng'hondolo na ng'ombe na vihongwe na ngamiya na mawalo. Maabaho kabwela kwa Akishi.

10 Akishi viyamuuzile, "Diyelo mutowa ubanzi ulihi?" Daudi kamwidika kwa kumvwizila, "Chiitowa ng'hondo ubanzi wa Negebu ya Yuda hebu ubanzi wa Negebu ya Wayelameeli hebu ubanzi wa Negebu ya Wakeni." 11 Daudi hamulekile mgima mulume hebu muke muladi yadahe kumgala Gasi, kwaviya Daudi kagesa, "Wodaha kuchilongeleza na kulonga, ‘Vino niivo viyatendile Daudi.’ " Vino niivo ili chihendo chake lusita wose luyakalile muna iisi ya Wafilisiti. 12 Akishi kahuwila mbuli za Daudi na kailongela mwenyewo, "Kawatenda wanhu wake Waisilaili wamwihile kwa kuwatowa, ivo kezakuwa msang'hani wangu siku zose."