1 Hana kapula na kalonga,

"Moyo wangu womdeng'helela Mndewa Mulungu,

nihuma kwa kutazigwa na Mndewa Mulungu.

Nowaseka wehi wangu,

kwaviya noudeng'helela ukombola wako.

2 "Habule yelile fana Mndewa Mulungu,

kwaviya habule imwenga ila weye,

habule luwe lulingile fana Mulungu wetu.

3 "Sekemulonge kwa udugi ng'hani,

magoda sekeyalawe muna imilomo yenu,

kwaviya Mndewa Mulungu kovimanya,

kohumiza sang'hano zose.

4 Mhinde za wanhu weli na nguvu zibeneka,

mbali weli wanyondenyonde wogendelela kuwa na nguvu.

5 Waja wakalile na ndiya nyingi,

sambi wolondeka wasang'hane kupata ndiya.

Mbali wakalile na nzala,

sambi weguta.

Mwanamke yakalile mgumba kapata wana saba,

mbali mwanamke yeli na wana wengi,

kalekigwa bila mwana.

6 "Mndewa Mulungu kokoma na kubweleza ugima,

kowahulumusa wanhu kuzimu, maabaho kowakweza.

7 Mndewa Mulungu komtenda munhu yawe ngayengaye na komtenda munhu yawe na vinhu vingi.

Kowahulumusa weli na vinhu vingi na kowakweza ngayengaye.

8 Komwinula ngayengaye kulawa muna yamatimbwisi,

komkweza yolonda vinhu kulawa muna dizalala,

muladi yaweke hamwe na wafalume,

wakachihazi chigoda cha chifalume cha utunhizo.

Chila chinhu chilumbigwa na Mndewa Mulungu,

nayo kachika chila chinhu hanhu hake.

9 "Kezaikaliza migulu ya wanhu wake wokwaminika,

mbali wanhu wehi wezakwikigwa muna diziza.

Habule munhu yondayahume kwa nguvu muhala.

10 Wehi wa Mndewa Mulungu wezadanganizigwa,

kezawagalila ng'huwa kulawa kuulanga.

Mndewa Mulungu kezazitagusa zisi zose.

Nayo kezamwing'ha nguvu mfalume wake,

na kezamtenda yahume munhu wake iyamsagule kwa sang'hano yelile."

11 Maabaho Elikana kabwela ukaye yake uko Lama, mbali imwana Samweli kasigala uko na kumsang'hanila Mndewa Mulungu kwa ulangulizi wa mkulu wa nhambiko Eli.

12 Wana wa chilume wa Eli wakala hawafaya ng'hani, hawamtegeleze Mndewa Mulungu. 13 Chihendo cha wakulu wa nhambiko lusita ulo kwa wanhu ikala, munhu yoyose yahalava nhambiko ya kutimbula, msang'hani wa mkulu wa nhambiko kokwiza na uma uli na meno matatu kuno nyama yokimula. 14 Nayo kowingiza uma uwo muna inongo hebu vugwa hebu lukalango hebu muna ichia, nyama yoyose inuligwe kwa uma uwo kamwing'ha mkulu wa nhambiko. Vino niivo viwatendile Waisilaili wose wezile uko Shilo. 15 Kaidi ing'hali kutimbula mavuta, kokwiza msang'hani wa mkulu wa nhambiko, komulongela ija yolava nhambiko, "Ning'he nyama mbisi nimgalile mkulu wa nhambiko yakabanike, kwaviya kolema kwing'higwa nyama ikimusigwe."

16 One munhu yahamulongela, "Mabambala yatimbuligwe teng'hu, maabaho usole chochose choulonda." Mbali msang'hani kezakwidika, "Bule, ning'he sambi, one hulonda nizaisola kwa nguvu."

17 Uhasanyi wa wabwanga wa Eli ukala mkulu ng'hani haulongozi wa Mndewa Mulungu, kwaviya waizeha nhosa ya Mndewa Mulungu.

18 Mbwanga Samweli kamsang'hanila Mndewa Mulungu kuno kayawala chizibawo cha chitani. 19 Chila mwaka mami yake kamsonela ng'hanzu ndodo na kumgalila viyahitile hamwe na mulumake kulava nhambiko ya chila mwaka. 20 Eli kamtemela mate Elikana na muke wake, kalonga, "Mndewa Mulungu yakwing'he wana kwa mwanamke ino, wasole hanhu ha ija youmtulile kwa Mndewa Mulungu." Maabaho wabwela ukaye yawo. 21 Mndewa Mulungu kamuwonela ubazi Hana, nayo kapata wana wamwenga wa chilume watatu na wa chike waidi. Mbwanga Samweli kagendelela kukula haulongozi wa Mndewa Mulungu.

22 Eli kakala mulala ng'hani. Kahulika mbuli zose wanage ziwawatendele Waisilaili wose na hata viya viwawabandame wanaake wowasang'hane usang'hano hana ihanhu ha kwingilila hana dihema da Mulungu. 23 Ivo kawalongela, "Habali motenda mbuli zino? Nihulika sang'hano zenu zihile kulawa kwa wanhu wose. 24 Siivo bule wanangu! Kwaviya mbuli ino hainogile, yoniihulika yopwililika mwa wanhu wa Mndewa Mulungu. 25 One munhu imwe yahamuhasanya miyage, munhu imwenga kodaha kumpulila kwa Mulungu, nayo Mulungu kodaha kumgombela, mbali one munhu yahamuhasanya Mndewa Mulungu, yelihi yondayampulile?"

Mbali iwana hawamtegeleze tati yawo, kwaviya Mndewa Mulungu kailungila kuwakoma.

26 Mbwanga Samweli kagendelela kukula na kamnogeza Mndewa Mulungu na wanhu.

27 Siku dimwe mulotezi wa Mulungu kamwizila Eli, kamulongela, "Mndewa Mulungu kolonga, ‘Vino niye silawilile muna ikaye ya tati yako lusita viwakalile watumwa uko Misili kwa mfalume wa Misili? 28 Kulawa muna yamakabila yose ya Isilaili niwasagula wasaho zako muladi wawe wakulu wa nhambiko wangu, wasang'hane muna ulupango, kusoma ubani na kuvala chizibawo haulongozi hangu. Iviya niweng'ha wasaho zako hanhu ha nhambiko za Waisilaili zozitimbuligwe. 29 Habali kozeha nhambiko na nhosa zonizilagilize muna ikaye yangu? Habali kuwahishimu wanago kufosa niye na kuineneheza kwa nhambiko zose zinogile za wanhu wangu wa Isilaili?’ "

30 "Ivo Mndewa Mulungu, Mulungu wa Isilaili, kolonga, ‘Kweli, nilonga kuwa kaye yako na kaye ya wasaho yako wezanisang'hanila siku zose.’ Mbali sambi Mndewa Mulungu kolonga, ‘Mbuli ino haidahika, kwaviya waja wonihishimu nizawahishimu, waja wonizeha nizawalema. 31 Lusita lokwiza vondanikukome weye na chila munhu muna ulukolo lwako. Habule munhu yondayafike kuulala. 32 Kwizayawona magayo muna ikaye yangu. Waisilaili wezakwing'higwa vinhu vingi, mbali muna ulukolo lwako hakwizakuwa na munhu yondayafike kuulala siku zose. 33 One nihamuleka munhu yoyose muna ulukolo lwako kuwa mkulu wa nhambiko, kezatulika yameso na kezakuwa na usungu. Mbali walume wose muna ulukolo lwako wezadanganika vihile.

34 " ‘Chondachiwalawilile wanago wa chilume waidi, Hofini na Finehasi, chizakuwa chilaguso kumwako. Wose waidi wezadanganika siku dimwe. 35 Nizamsagula mkulu wa nhambiko yonitegeleza na kutenda chila chinhu chonilonda kutenda. Nizamwing'ha nyelesi zisang'hane siku zose haulongozi wa munhu wangu yonimsagule kuwa mfalume. 36 Maabaho chila munhu yondayasigale muna ulukolo lwako, kezahita kumtumbalila mavindi mkulu wa nhambiko iyo na kumulongela, "Nokulamba unigume muna usang'hano wako wa ukulu wa nhambiko muladi nipate kuja chihande chidogo cha gate." ’ "