1 Sẽkoom shɛ ang ɗɔbiiko Bulus Kirisi jashonɛ, ɓa shɔzɛ lɔurɛ ɓa, ama shɛ a Yesɔ Kirisi kabii, a Uɓeye shɔgbete yusi Yesɔ a saa a suruniyɛ. 2 Shɔ sisɨn-ãnɛ a Ɗabii shɔ gbete i aɗɔm kpai i ɓasi yuu a ukɔɔni aru u gee shɔ sisɨn-ãnɛ Ɗabii gbeteyi a tipi Galantiya nya:

3 Ɗalapa uɓeye a Uɓeyelapa Yesɔ Kirisi u ãwɔ tɔ̃vɨn pɛlinɛ a binyatɔ̃nɛni.

4 Kirisi ãu yuu au yuu ruuvini, aru u rau a laduru kɔ̃linɛ jakɨntimiyi naa, ji naa gbete Uɓeye Ɗalapa kasiyɛ. 5 Bassinɛ yɛnɛ Ɗalapa bi yunɛ dɔdɔrim yɛnɛ ɗekɨn dangdangǃ Nankɔ.

6 Viu ɔ̃rintɛ vinamanɛbii aru vigbete ɔ pɛlim, nɔgbete ɔ yaa shɔgbeteu ɓawɔ nya a nyaba Kirisi tɔ̃vɨn pɛlinɛ, dɔdɔrim ɔ tɛ ruu tɔ̃vɨn wɔɔ tot. 7 Pɛnizɛ, <<Ruu tɔ̃vɨn wɔɔ tɔɓa,>>ama n sha vim aru shɔwɔyi i ɗɔn gbete i kasɔɔ ɗakinɛ aru i kɔsi Kirisi ruu tɔ̃vɨn. 8 Ama ko ukɔ ko Ɗajashonɛlapa, kɛ nwarɔɔ ruu tɔ̃vɨn wɔɔnɛ tot, ɓa gbete u nwarɔɔ yɛ ɓa, mɛnɛ Ɗalapa u lɔkiu a wɛrɛ yaa! 9 U shasi tɛttɔ, dɔdɔrim n sha sɔ̃ntɛ tɔti: naa shɔwɔ kɛ nwarɔɔ ruu tɔ̃vɨn wɔɔnɛ tot, ɓa shɔ gbete ɔ tɛyɛ ɓa, Mɛnɛ Ɗalapa u lɔkiu a wɛrɛ yaa!

10 Ɔ̃kɛ naa n kasinɛ shɔzɛ i pɔ̃sinnaa yaa? Ɓa nankɔ ɓa! Vi gbete n kasiyɛ ukɔ Ɗalapa naapɔ̃nɛ! N kasin kɛnɛ shɔu zɛn niitɔ waanɛ yaa? N si kasi nɛn pɛli nankɔ, n si ji ɔ̃ ɓa Kirisi jawɛrɛ ɓa.

11 N gelɔɔ pɛ n shɔbiiyi, ruu tɔ̃vɨn gbete n nwari shɔyɛ ji shɛɓa a shɔzɛ nyaɓa. 12 N ji tɛ ɓa a shɔzɛ naa ɓa, ɓa shɔwɔɔ matinnɔrɛ ɓa, ama pɛ Yesɔ Kirisi au yuu ukɔ tasinrɛ.

13 Shɔ gelɔɔ nɔgbete n ɔ̃ si tɛttɔ aɗagbete n si gɨn Ɗalapa naa Yahudawa i si gɨnyɛ, a nɔgbete n tasi shɔ sisɨn ãnɛ Ɗabii i raa fɛ̃ɛm, ang pɛli nɔgbete n sãtiyiyɛ. 14 N tɛɛ n shɔ vaayi gãsiyitɔ aɗagbete sin gɨn shɔ Yahudawayi nyaba gɨnnɛyɛni, n sã mauriyi vi nakootɔ nakaziti ang ãyuutɔ ɗɔn fɛ̃ɛm.

15 Ama Ɗalapa au tete tɔ̃vɨn pɛlinɛ lɔnrɛ si shɔ ji yeem ɓa, a ɓang-nyarɛ nɛn ɔ̃ u jawɛrɛ, aɗagbete kasinɛyɛ, 16 u tasin nɔgbete ɓɛɛ jaa ɔ̃yɛ, aru nɔgbete n nwari shɔgbeteyi ɓa Yahudawa ɓa ruu tɔ̃vɨn, n ji hɨ shɔ ruu wɔɔ ɓa au yuuni ɓa, 17 N ji yɛ shɔgbete i si jashonɛ ang ɗekɨn a Urushalima i ɗɔbii ɓa, ama n yɛkɛ tipi larabawa gbãgbã, kɛɗɔn ang sɔɔ Damasku rɛ. 18 Si a knti saa taati n yɛ Urushalimarɛ aru ntaruu a Bituru nya, n ɔ̃ au ɗɔbii lee kopi atu maani. 19 N ji zɛ jashonɛ wɔɔ ɓa see Yakubu Uɓeyelapa ɓɛzɔ̃.

20 Vigbete n beeyɛ pɛ nizɛ, Ɗalapa zɛ tɛttɔ n yeeɓa nya ɓa!

21 A kɨntiuni n yɛkɛ tipi Suriya a Kilikiya. 22 A ɗauni si shɔ sisɨn-ãnɛ a Ɗabii a tipi Yahudiya i ji zɛm ɓa shãani ɓa. 23 I nta ɓɛɛ jo vigbete shɔwɔyi shayɛ nɛː <<Jaa gbete au si tasiu raayɛ, dɔdɔrim u ɗɔgbete nwari shɔ ruu sisɨn ãnɛ gbete sãti siyɛǃ>> 24 Kɛɗɔn i bɛli Ɗalapa nii rɛ ang yuu.