1 Aru nankɔ mazɔ̃yi, ɔ shɔ gbete Ɗalapa ɓawɔ nya a kolapayɛ! Ɔ kpaa sisɨn a Yesɔ bi shɔ gbete Ɗalapa shouyɛ aru u ɔ̃ shɔlansi pɛ̃nɛba a nyaba sisɨn ãnɛ au kɛ shanɛm. 2 Yesɔ ãsisɨntɔ a Ɗalapa biini, shɔgbete lɔurɛ nɛu pɛli vishonɛm, ji na gbete Musa ãsisɨn au vishonɛ a Ɗalapa wɛrɛ yɛ. 3 Shɔgbete maa wɛrɛ yɛ kpaa basinɛtɔ u tɛɛ wɛrɛurɛ. Ji nankɔ Yesɔ yɛ tɛttɔ shɔu basiurɛ u tɛɛ Musa tɔ. 4 Ko-pi wɛrɛ shɔpiya shɔzɛ maarɛ, ama Ɗalapa kɔ ɔ̃rɛ shɔgbete maa ko-iviyarɛ. 5 Musa au vishonɛ naa jaawɛrɛ u si shɔ sisɨn pɔ̃nɛ a Ɗalapa wɛrɛni, nwanyatɔ aru vigbete kaanɛ ɗekɨn shɔgbete Ɗalapa si nwanya au yuuniyɛ. 6 Ama Kirisi kasinyatɔ nɛmpɛ Ɗa jaa a ã sisɨntɔ a Ɗalapa wɛrɛni kpai, a pɛli vigbete Ɗalapa geliu nɛu pɛliyɛtɔ piti kpai, ukɔ ɔ̃rɛ shɔzɛ gbete a Ɗalapa wɛrɛyɛ naa ukɛ sãu sisɨn manɛnɛ katakatani, au kaka ãnɛ a vigbeteu pɔ̃sisɨn au yuuniyɛni.

7 Aru nankɔ, ji nagbete Ɗa suru shayɛ nɛ,

Naa ɔkɛ nta Ɗalapa yeenya nɛ nɛm,

8 Ɔkɔɔ laki ɔ sisɨnnɛ naa mɛuruyi pɛliyɛ aɗagbete i bɛ̃ɛ̃ Ɗalapa nyagɨnnɛyɛ,

nagbete i ntan sisɨnyɛ a ɗɔgbete laa ɓa ɗɔn ɓamɓayɛ. 9 Ɗalapa shanɛ, aɗɔwakɔ mɛuruyi i ntan sisɨnyɛ, ai zɛ vigbete n shoyɛ yɛnɛ saa laa ziti.

10 Aru nankɔ n sisɨn lɛsitɔ a shɔwini n shanɛ,

<Kopiɗaviya i bɛ̃ɛ̃n tɛttɔ ai sisɨnni

ai bɛ̃ɛ̃ n nya-ãsinɛyi gɨnnɛtɔ.

11 N sisɨn lɛsirɛ waanɛ ang tee a sisɨn lɛsinɛ nɛ:

I yɛ to tipi gbete n ãyi susunɛ a ɗɔnni ɓa!>>>

12 Mazɔ̃yi ɔ kɔyuutɔ ko shɔwɔ awɔ tete u sisɨn ãnɛ u ɔ̃ ɓa u ruuvini u pɔ̃urɛ u risi Ɗalapa gbeteu suru aɗɔn knti. 13 Nɔgbete si pɛli nam, ɔ pɛli vishonɛ a vigbete laabeenɛ Ɗanyarubii ɓaanɛ ''Nɛm'' ɔ pɔ̃si zɔ naatɔ kopileepiya aruviya ruuvini yɛ ɗaki shɔzɛ gbeterɛ awɔ tetteni u ɔ̃rɛ shɔ yulakinɛ, 14 U pɛ shɔ yuɓassinɛ a Kirisini naa ukɛ shinɛ a kakani au sisɨn ãnɛ anɛ u nyayisinɛ nagbete u gaa a ɗekɨn yɛ.

15 Shɔm pɛ vigbete laabeenɛ Ɗanyaruubii shayɛ nɛ:

<<Ɔkɛ nta Ɗalapa yeenyanɛ nɛm,

ɔkɔɔ lakɔɔ sisɨnɛ, nagbete mɛuruyi pɛliyɛ, aɗagbete i bɛ̃ɛ̃ Ɗalapa nyayɛ.>>

16 N ɓa shɔgbeteyi nta Ɗalapa nyeenya ai bɛ̃ɛ̃ showenɛ au nyaniyɛ ɓaya? Ikɔyi ɔ̃rɛ shɔgbete Musa tɛɛsiyi ɗekɨn a tipi Masar piti kpai. 17 N ɓa shɔgbete a Ɗalapa tuu sisɨn a yini yɛnɛ saa laa ziti ɓaya? Ikɔyi ɔ̃rɛ shɔgbeteyi pɛli ruuvini, ai nwesirɛ i vɔlirɛ a jalaa. 18 Aɗagbete Ɗalapa u sisɨn lɛsirɛ a teerɛ nɛ, <<I yɛ to tipi gbete n yɛn ãi susunɛyɛ ɓa>> Nwanya si a piya? Si a shɔgbete i bɛ̃ɛ̃ Ɗalapa nyagɨnnɛyɛ. 19 Aru nankɔ u zɛ tɛttɔ wasa-wasa Ɗalapa ji yaayi ɓa nɛyi to ɗɔsusunɛurɛ ɓa, aruviya i ji ãsisɨn ɓa.