1 Dɔdɔrim,Vigbete Ɗalapa marɛ nɛn ang shɔbiiyi susunɛ au nwanya au yuuniyɛ dooɗɔnni, aru nankɔ u nta Ɗalapa setitɔ aruviya shɔwɔkɔ nwesinɛ a nyaba ji kpa susunɛu ɓa. 2 Aru u nta ruu tɔ̃vɨntɛ ji nagbete i ntayɛ. I nta ruu tɔ̃vɨn wu, ama ruu tɔ̃vɨn wu ji pɛliyi vitɔ̃vɨng ɓa, aruviya naa i ntatɛ, i ji tɛɓa a sisɨn ãnɛni ɓa. 3 Ama u shɔgbete u ã sisɨnyɛ, u tɛ susunɛutɔ. Ji nagbete Ɗalapa shayɛ,

<<N sisɨn lɛsitɔ n teerɛ nɛ:

<<Iyɛ to tipi gbete n yɛn ãyi susunɛ aɗɔnyɛ ɓaǃ>>>

Ɗalapa sha nankɔ si yisinya vishonɛ tɛttɔ a ɗagbete shɛshi kotipiyɛ. 4 Nizɛ kɔ a laabeenɛ Ɗanyaruubii nwanyatɔ aru dii manziini nɛ:<< Ɗalapa susu a dii manzii au vishonɛni piti kpai.>> 5 Ji ruugbetenkɔ shɔ nwanya sɔ̃nrɛ nɛː <<Iyɛ to tipi gbete n ãi susunɛ aɗɔnyɛ ɓa.>> 6 Shɔgbete i gaa Ruu Tɔ̃vɨn ntanɛyɛ i ji kpa susunɛu ɓa, aruviya i ji ã sisɨn ɓa. Dɔdɔrim nyaba aɗɔn aru shɔgbete i yɛ kpa susunɛuyɛ. 7 Aru nankɔ Ɗalapa pɔ̃ dii wɔɔtɛ gbete ɓaanɛ <<Nɛm.>>Ɗalapa nwanya sitɛtɔ a ruumni tɛ̃ɛ̃tɛ̃ɛ̃ a Dauda kabii a laabeenɛ Ɗanyaruubii gbete shanɛ,

<<Ɔkɛ nta Ɗalapa yeenyanɛ nɛm,

ɔkɔɔ laki sisɨnnɛ.>>

8 Naa Joshuwa si ã shɔ susunɛutɔ gbete Ɗalapa mayɛ, Ɗalapa si ji nwanya tɔɓa aru leewɔɔni ɓa. 9 Ji nagbete vim tasiyɛ nɛ Ɗalapa shɔbiiyi i susunɛ dooɗɔn naa Ɗalapa susu a dii manziiniyɛ. 10 Aru shɔgbeteyi kpa susunɛ gbete Ɗalapa mayɛ, iyɛ susutɔ ai vishonɛni, ji nagbete Ɗalapa susu au vishonɛyɛ. 11 Aruukɔ u pɛli vigbete uyɛ pɛliyɛ u kpa susunɛmtɔ, a nɔgbete shɔwɔ yɛ nwesi ɓa nagbete i nwesi aru gbete iji ã sisɨn ɓa aru vi tɔ̃vɨn pɛlinɛ ni ɓa.

12 Ɗalapa nyaruubii u suru aɗɔn aɗɔ vi shonɛ, u yɔnɛ tɛɛ zaali au nya kaziti tɛttɔ, kɔvitɔ ɓuzɨn yɛnɛ ɗɔgbete suru bi kpaa zɔ a suruyɛ, ɗɔgbete gboki a rɨti i kpaa zɔyɛ. Zɛ vigbete a sisɨn lɛriyɛtɔ a vi gbete a sisɨn ɔriyɛ. 13 Shɔ ɓusi Ɗalapa viwɔɔ ɓa; Vigbete shɛshi piti kpai shɔ ɓusi dɔɔɓa Ɗalapa nɔɔni ɓa. U shau vigbete u pɛliyɛ piti kpai sɔ̃n au ɗɔbiikɔ au nya.

14 Aru u yupɛ̃ni shɔlansi pɛ̃nɛba aɗɔn u shi a kakani au sisɨn ãnɛni gbete au yɛ tɛttɔ a Ɗalapa ɗɔbii Yesɔ, Ɗa jaa. 15 U yupɛ̃ni Shɔlasi pɛ̃nɛba upɛ shɔgbete nta shɔ raa ɓa naa japɛ̃pɛ̃ɛ̃ nta shɔ sisɨnnɛyɛ, a nyabawɔ u shɔ yupɛ̃ni lansi a ɗɔn pɛ̃nɛba gbete shɔ ntau sisɨn ji nagbete shɔ ntau ɓɛyɛ, ama ji pɛli ruuvini ɓa. 16 Aru nankɔ u pɔ̃ sisɨntɔ u kpa bi a Ɗalapa laa kpatini maani, a ɗɔgbete tɔ̃vɨn shonɛ a ɗɔnyɛ. A ɗɔgbete u yɛ kpa raantanɛyɛ a tɔ̃vɨn shonɛni au yɛ pɔ̃siunaa a ɗagbete ukɛ kasinɛyɛ.