1 Akɨnti vim, Yesɔ shɛ sɔ̃n au jaɗɔɔyi bi a nyaɓooti wapo Tibariya. N pɛ nɔgbete pɛliyɛ. 2 Siman Bituru, Tooma (Gbete shɔ ɓaunɛ jabɔ̃) Nataniyɛ ( Shɔgbete shɛ arɛ a Kaana a tipi Galili), Zabidi ɓɛjaayi, a Yesɔ jaɗɔɔ gãsi wɔyi ziti i sijo ɗɔzɔɔ. 3 Siman Bituru geli gãsi jadɔɔyi nɛ, <<N yɛ pɛ a ɗɔɔ jazɨng sãnɛ.>>

I geliunɛ. <<U yɛ yɛjo a mɔkɔni,>>Kɛɗɔn i to latosi rɛ i yɛrɛ, ama a zɨng bau kpai i ji sã vi wɔɔ ɓa. 4 Naa dii kɛ kaanɛ, kɛɗɔn Yesɔ shi a nya sassa mii wapo, ama u jaɗɔɔyi i ji zɛ ɓa nɛpɛ ukɔ ɓa. 5 Kɛɗɔn Yesɔ hɨyinɛ, <<Jakasayi ɔ ji sã vi wɔɔ ɓaya?>>

I kasinya nɛ,<< ko vi wɔɔ ɓa.>>

6 Yesɔ geliyinɛ, <<Ɔ loki jang nɛ a ka nakɨn ɗɔgbete latosi mii aɗɔnyɛ, ɔ yɛ sãtɔ.>>Kɛɗɔn i lokiyi jang rɛ ama i ji zɛnɔɔ jang-u shɛshinɛ ɓa a miini ɓa, aru gbete i sã jazɨng waanɛ.

7 Yesɔ jaɗɔɔ gbete au ɔriuyɛ geli Bituru nɛ, <<Shompɛ Uɓeyelapa!>>Naa Bituru ntatɛ nɛ pɛ Uɓeyelapa, kɛɗɔn tuu u fãrã a tosirɛ, aru u si bi waati, yurɛ a tasi a yɛti mii. 8 Gãsi Yesɔ jaɗɔɔyi i arɛ nyasasa a yɛti latosi, i ɗɔɔ jang gɔ̃nɛ yiitɛ a jazɨnni lot, i si ɓa kpɛlɛ a nyadoddoni ɓa, mɛnɛ dɔɔ laa maani. 9 Naa i to nyasasatɛ, kɛɗɔn i zɛ sheli yaarɛ ɗɔu, a jazɨng ni au yuu wɔsɔ̃n borodi. 10 Kɛɗɔn Yesɔ geliyinɛ, << Ɔ n ti jazɨng gãsi gbete ɔ sãyɛ dɔdɔrim pɛ yɛm.>>

11 Siman Bituru yɛrɛ to latosi rɛ miyi shɛshi jang rɛ a nyasasa, jang u yii a jazɨng pẽniɓa ni laa maanzii au jaa kopi tu taati, si jazɨn wi jitɔ waanɛ a nankɔni jang u ji ntaa ɓa. 12 Yesɔ geliyinɛ, <<Ɔ anɛ u sha vishaanɛrɛ.>>U jaɗɔɔwi i ji hɨu ruu ɓa nɛ,<<Mɔkɔ piya?>>Aru i zɛ tɛttɔ nɛ pɛ Uɓeyelapa. 13 Kɛɗɔn Yesɔ yurɛ a tuu borodi a ãirɛ, pɛli sɔ̃n ji nankɔ a jazɨnni.

14 Shom kɔ ɔ̃rɛ ɓa taati gbete Yesɔ shɛ au jaɗɔɔyi bi yɛ akɨnti gbete yuu a suruni sàà yɛ.

15 Naa i yisi vishaanɛ shaanɛtɛ, Yesɔ geli Siman Bituru nɛ, <<Siman Yɔhana ɓɛɛ jaa, a ɔrin tɛttɔ tɛɛ shɔ gãsi miyi ɓɛɛtɛ ya?>>

Siman Bituru kasinya nɛ<<Nn, Uɓeyelapa, a zɛ tɛttɔ n ɔraatɔ.>>

Yesɔ geliunɛ,<<Kɔsin jamɛrɛ̃yitɔ.>> 16 Yesɔ geli Simani Bituru sɔ̃n nɛ, <<Siman Yɔhana ɓɛɛ jaa, a ɔrintɛ ya?>>

Siman kasi Yesɔ nyanɛ, <<Nn, Uɓeyelapa, a zɛ tɛttɔ n ɔraatɔ.>>

Yesɔ geliunɛ, <<Kɔsin mɛrɛ̃yi tɔ.>> 17 Toti ɓa taati Yesɔ geli Siman nɛ, <<Siman Yɔhana ɓɛɛ jaa, a ɔritɛ ya?>>

Bituru sisɨn lɛsirɛ aru nɛ Yesɔ hɨu ruu gbetenkɔ ɓaa taati, Yesɔ hɨu sɔ̃n nɛ, <<A ɔrintɛ ya?>> Siman kasi Yesɔ nyanɛ, <<Uɓeyelapa, a zɛ ko iviya tɛttɔ; a zɛ tɛttɔ nɛn ɔraatɛǃ>>

Yesɔ geliunɛ, <<Kɔsin jamɛrɛ̃yitɔ. 18 N gelɔɔm pɛ nizɛ: Aɗagbete a si jakasa yɛ, ɗɔgbete ɔ kasi yɛnɛ a yɛtɔ a ɗagbete a kasiyɛ; ama naa akɛ kpẽnɛ, a yɛ gɨnnaa nɛ shɔwɔ u tosaa virɛ bi u n taa ɗɔgbete a ji kasi yɛnɛ ɓayɛ.>> 19 (Yesɔ sha vim u tasi nɔgbete Bituru yɛ vɔyɛ au yɛ n ti Ɗalapa nii bassinɛ.) Kɛɗɔn Yesɔ geliunɛ,<<Gɨnnɛ! >>

20 Bituru zaa kɨnnɔɔ au knti a zɛ Yesɔ jaɗɔɔ gbete Yesɔ ɔriuyɛ, shɔgbete u si a Yesɔ ɗɔbiini maani aɗagbete i si ɗɔɔ vishaanɛ yumusinɛ tɛnɛɗa shaanɛyɛ, Yesɔ jadɔɔu hɨnɛ, <<Uɓeyelapa, shɔu yɛ mɛlaa yɛ piya?>> 21 Naa Bituru zɛutɛ, hɨ Yesɔ nɛ,<<Uɓeyelapa, Jaam fa?>>

22 Yesɔ kasiunya nɛ, <<N si tɔnɛn kasitɔ nɛu ɔ̃ a suruni setɛ n sɔɔtɛ, a ruu kɛnɛ-ivi ɗɔn viya? Gɨnnɛ!>>

23 Kɛɗɔn ruum to shɔgbete i gɨn Yesɔ sho piti kpai nɛ, Yesɔ jaɗɔɔ shɔm nɛyɛ vɔ ɓa. Ama Yesɔ ji shaɓa nɛyɛ vɔɓa ɓa; Yesɔ shanɛ, <<N si tɔnɛn kasitɔ nɛu ɔ̃ a suruni setɛ n sɔɔtɛ, a ruu kɛnɛ-ivi aɗɔn viya?>>

24 Ukɔ ɔ̃rɛ Yesɔ jaɗɔɔ gbete au nwanya ayuu vimiyi yɛ, bee sɔ̃n tɛttɔ; u zɛ tɛttɔ viu shayɛ pɛ nizɛ.

25 Vi wɔɔ ɗɔn gbete Yesɔ pɛli waanɛ. Shɔ si tɔnɛn beetɔ gbete gbete kpai, ang zɛnɛ shɔ kootipimiyi kpai i si yɛ zɛnɔɔ laabeenɛm sãnɛ dɔɔɓa.