1 A kɨntiuni, Yesɔ yɛrɛ nɛn shaa vishaa nɛ yumusinɛ gbete Yahudawayi i shɔ dɔlaa pɛliyɛ a Urushalima. 2 A nyejaa mɛrɛ maani, gbete a Urushalima yɛ, mii kanɛ wɔɔ si ɗɔuni, shɔ knti a tali maani, a Yahudawayi nyakoo shɔ ɓaanɛ Besaida. 3 A taliu kɔ shɔ yɔ shɔvɔrɔyi ji ɗɔukɔ a shɔ nɔgbãtiyini, shɔ gbete i dɔgbutuyini, a shɔ gbeteyi bi vɔkagbeteyɛ. 4 Aru gbete Ɗajashonɛlapa si alitɔ legbete legbete u guli miiurɛ. Shɔgbete kɛ to miiunɛ a ɗekɨn tɛ̃ɛ̃ti akɨnti gbete Ɗajashonɛlapa gulitɛ, kɛɗɔn ukɔ gatirɛ a vɔrɔ gbete pɛliuyɛni. 5 Jawɔɔ siɗɔn roovɔrɔ saa bmati atu kopi au jaa maantaa (38). 6 Yesɔ zɛu a ɗɔɔ roonɛ, si zɛ tɛttɔ nɛ jaau pɛ vɔrɔ tɛ̃ɛ̃-tɛ̃ɛ̃; kɛdɔn Yesɔ hɨ jaau nɛ,<<A kasi gatinɛtɛ ya?>>

7 Shɔ vɔrɔu kasinya nɛ,<<Mashɔwɛrɛ, n shɔ tuunɛ gbete n ting yɛti miiyɛ ɓa, aɗagbete shɔkɛ guli mii nɛyɛ ɓa. Nkɛ ntali tonɛ nɛ, shɔwɔɔ torɛ u yang-rɛ a knti.>>

8 Kɛɗɔn Yesɔ geliu nɛ,<<Yulapanɛ, a tuu a siri, a yɛrɛ.>> 9 Tɛ̃ɛ̃ti Jaau gatirɛ; a tuu sirirɛ gaa ranɛrɛ.

Lee gbete vim pɛliyɛ si a lee susunɛ, 10 Yupɛ̃ni Yahudawayi i geli jaa gbete shɔ gatiu nɛ,<<Shɔmpɛ lee susunɛ, nya ãsinɛ zãritɔ a tuu a sirirɛ.>>

11 A kasinya nɛ, <<Jaa gbete gatinyɛ ukɔ gelin jo nɛn <Tuu sirinɛ n yɛrɛ.> >>

12 I hɨunɛ, <<Jaa gbete gelaa naa tuu siri a yɛrɛ piya?>>

13 Ama jaa gbete Yesɔ gatiuyɛ ji zɛu nii ɓa, moo si ɗɔu bang, Yesɔ bɔkati ai tete ni.

14 A kɨntiuni Yesɔ kpaau a wɛrɛ Ɗa a geliunɛ,<<Weshopɛ, a gati dɔdɔrim tɛ; yaa ruuvini pɛlinɛkɛtɔ, aru vi gbete tɛɛ shɔmtɔ yɛ kpaa a rɛ.>> 15 Kɛɗɔn jaau yaa ɗɔurɛ a geli yupɛ̃ni Yahudawayi nɛ Yesɔ gatinrɛ.

16 Kɛɗɔn i gaa Yesɔ raatasinɛrɛ, aru gbete nɛ gati shɔ a lee susunɛ. 17 Yesɔ kasiyinya nɛ,<<Mayɛ shovi shonɛ a lee-lee, n kɔma ɔ̃rintɛ kaka jazɨng akɔrɔ n shovitɔ.>> 18 A rumkɔ Yahudawayi i kã nyaba gbete i nyo Yesɔ yɛ; ɓanɛ aru gbete Yesɔ ka nya ãsinɛ lee susunɛkɔ sheeli ɓa, ama aru nɛ shanɛ, Ɗalapa pɛn ɓeye, a nyabankɔ teesiu yuu a Ɗalapani zali.

19 Kɛɗɔn Yesɔ geliyinɛ, n gelɔɔm pɛ nizɛ: Jaa pɛli vi ɓau yuuni ɓa; see vigbete zɛ ɓeye a ɗɔɔ pɛlinɛyɛ. Vigbete jaa ɓeye kɛ pɛlinɛ, ukɔma yɛ pɛli ji ukɔ. 20 Aru jaa ɓeye ɔriutɔ, tasiu vigbete pɛliyɛtɔ kpai, yɛ tasiu vigbete tɛɛ shɔntɛttɔ, ɔ kpai yɛ ɔ̃kɛ vibii-zaanɛ awɔ ɗɔbiini. 21 Ji nagbete jaa ɓeye yusi vɔrɔ a sàà u ãu Suruyɛ, sɔ̃nji nankɔ jaa yɛ ã Suru sɔ̃njo shɔgbete kasiyɛ. 22 Jaa ɓeye vɔsi shɔwɔɔ ruuɓa, ama ã ɓɛɛ jaa kaka tɛttɔ kpai aru u vɔsi ruu, 23 Aru kopiya u bassi ɓɛɛ jaatɔ, nagbete shɔ bassi ɓeye yɛ. Shɔgbete ji bassi ɓɛɛ jaa ɓa si ji bassi ɓeye au shouyɛ ɓa.

24 N gelɔɔm pɛ nizɛ: Shɔgbete kɛ weshonɛ ang ruuni u ã sisɨn a shɔgbete shonyɛ biini, yɛ kpaa Suru gbete sɔ̃nya ɓatɔ. Shɔyɛ yeruu ɓa ai yuuni ɓa, ama tɛɛ kaka gbete yɛ vɔtɛ yɛnɛ Suru. 25 N gelɔɔm pɛ nizɛ: lee kaanɛ, a tɛttɔ gboti, gbete vɔrɔyi i yɛ nta Ɗa jaa yeenyatɔ, shɔgbete i kɛ ntanɛ i yɛ yulapatɔ a Suruni. 26 Ji nagbete jaa ɓeye au yuu ukɔ ɔ̃rɛ shɔgbete ã Suruyɛ, ji nankɔ pɔ̃ ɓɛɛ jaatɛjo u ɔ̃ shɔ Suru ãnɛ. 27 Ɗalapa ã ɓɛɛ jaa kakatɛ nɛu yeruu, aru upɛ Shɔzɛja.

28 Ukɔu ɔ̃rɔɔnɛ vibii-zaanɛ; lee kaanɛ shɔ gbeteyi i vɔtɛ kpai i yɛ ntau yeenyatɔ, 29 i yɛ shɛ a sàà: shɔgbete i pɛli vi tɔ̃vɨn yɛ, i yɛ yulapa i ɔ̃ a Suruni, ama shɔgbete i pɛli vi kɔ̃linɛyɛ i yɛ yurɛ Ɗalapa u yeruurɛ ai yuu.

30 N ang yuu n pɛli viwɔɔ dɔɔɓa n yɔbmni ɓa. N yeruu ɓɛɛjo nɔgbete Ɗalapa gelinyɛ. Arumkɔ n ruuyeenɛ pɛ tɔ̃vɨn, aru gbete gɨn ɓa vigbete n kasiyɛ ɓa, ama n pɛli ji vigbete shɔu shonyɛ ãsing nya nɛn pɛliyɛ.

31 Nkɛ nwanyanɛ ang yuu, vigbete n shayɛ yɛ shɔyɛ tɛɛ ɓa nɛ pɛ nizɛ ɓa. 32 Ama shɔwɔɔ ɗɔn ukɔ yɛ nwanyarɛ ang yuuni, n zɛ tɛttɔ vigbete kɛ shanɛ ang yuu pɛ nizɛ.

33 A sho jashonɛyi a Yɔhana ɗɔbii, ukɔ nwanyarɛ a yuu ruu tɔ̃vɨn ni. 34 Shɔ shinɛ akɨnti gbete n pɔ̃ng sisɨng au yuuniyɛ ɓa shɔzɛ ɓa. N sha vim ɗɔkɔ aru ɔ kpaa naranɛ. 35 Yɔhana u si naa pitila, u ɗɔɔ kpɛnɛ u ɗɔ kɔlinɛ, ɔ pɔ̃ sisɨn si tɛttɔ nɛi nta tɔ̃vɨn tɔ au ɗɔsẽsẽni.

36 Ama n shɔ shinɛ ang knti gbete nwanya ang yuu au tɛɛ shɔ gbete Yɔhana sha ang yuu aɗɔn: vigbete n pɛliyɛ, ukɔ ɔ̃rɛ, vishonɛ gbete mayɛ ãng nɛn pɛliyɛ, ukɔ nwanyajo ang yuuni, u ntasinɛ mayɛkɔ shonrɛ. 37 Mayɛ gbete shonyɛ ukɔma nwanyatɛ ang yuuni. Ɔ ji ntau yeenya ɓa lee gbete ɓa, ɔ ji zɛu nɔɔkɨn ɓa lee gbeteni ɓa, 38 U ruuɓa ɔ ji pɔ̃ ɓa awɔ sisɨn niɓa, aruukɔ ɔ ji ã sisɨn ɓa, a shɔgbete au shouyɛ biini ɓa. 39 Ɔ ɓali Ɗanyaruubiitɛ, aruukɔ ɔ tee a sisɨn nɛi yɛ kpaa Surugbete sɔ̃nya ɓayɛtɔ. Ɗa-nyaruubii gbete ɔ ɓalimi nwanyajo ang yuukɔǃ 40 A shomni kpai ɔ ji kasi anɛ ɓa ang ɗɔbiini aru ɔ kpaa Surukɨn ɓa.

41 <<N ji kã ɓa nɛ shɔzɛ i bɛlintɔ ɓa. 42 Ama n zɛ ɔ ruubii tɛttɔ, n zɛ tɛttɔ ɔ ɔrinɛ Ɗalapa ɓa awɔ sisɨn niɓa. 43 N apɛ a kaka gbete mayɛ ãng yɛ, ama ɔ ji tɛn naa ɓa; naa shɔwɔɔ kaanɛ ji au kaka, ɔ yɛ tɛu naatɔ. 44 Ɔ kasi nɛyi kpaa bɛlinɛ a zɔ ɗɔbii, ama ɔ ji nta bɛlinɛ au shɛ a Ɗalapa ɗɔbii kãnɛ ɓa, ukɔ gbete sheeli, ɔ yɛ ã sisɨn kɛpikovi ang biini viya?

45 <<Ama ɔkɔɔ sɨnɛ a sɨsɨn nɛn n yɛ wilɔɔtɔ a mayɛ naani. Shɔgbete ɔ pɔ̃ sɨsɨn au biiniyɛ ukɔ ɔ̃rɛ Musa, ukɔ yɛ wilɔɔrɛ. 46 Ɔkɛ ã sɨsin nɛ nizɛ a Musa biini, ɔ si ã sisɨntɛjo ang biini, aruviya Musa bee vi tɛttɔ ang yuuni. 47 Ama ɔ ji ã sisɨn ɓa a vigbete beeyɛ niɓa, ɔ yɛ ã sisɨn kɛpikovi a vigbete n shayɛ ni viya?>>