1 Ɗajashonɛlapa tasing wɔsɔ̃n ɓooti mii suru ãnɛ, aɗɔ kolinɛ naa takolo, aɗɔ zɛɛnɛ a lakpati Ɗalapa a jamɛ̃rɛ̃ni 2 a ɗɔ zɛɛnɛ atette nyaba lanɛ koomo. ko-pi ɓootiu kapiya laa gbete ã suru ɗɔn, au rɛɛ jaa ɓa kopi atu ziti a saa, ko-pi shɛlɛ shɔpiya rɛɛ jaa ɓa gbete, gapa laau sɔ̃n shɔ shɔ gatinɛ. 3 Vigbete Ɗalapa wiritɛttɔ yɛ shɔ yɛ kpaa ɓa a koomouni ɓa.

Ɗalapa lakpati a shɔ jamɛ̃rɛ̃ni yɛ ɔ̃ a koomowakɔ, u jawɛrɛyi i yɛ bassiutɔ. 4 I yɛ zɛu nɔkɨntɔ, shɔ yɛ beeu nii ai nɔkɨnyi ni. 5 Zɨmba yɛ ɔ̃ tɔkɨn ɓa, i yɛ kã pitila ko ɗaa sẽsẽ tɔkɨn ɓa, aruviya Uɓeyelapa Ɗalapa ukɔ yɛ ɔ̃rɛ i ɗɔsẽsẽ, i yɛ ɔ̃ naa kpati i sã shɔ dangdang.

6 Kɛɗɔn Ɗajashonɛlapa gelin nɛ,<<Ruum pɛ nizɛ yɛtɛtɔ nɔgbete shɔ ã sisɨn ɗɔn. Uɓeyelapa Ɗalapa au ãu janyagadiyi u Ɗa suru, shou ɗajashonɛlapatɛ aru u tasi u jawɛrɛyi vi gbete yɛ pɛli ɗekɨn sekaa.

7 Yesɔ shanɛ,<<Weshoo pɛ! N yɛn ɔ̃ ɓa ɗɔkɔkɔ ɓa n atɔ! Ɗa u tasi shɔ gbeteyi gɨn janyagadiyi ruu gbete i bee a labeenɛm susãri a biini!

8 Nkɔng Yɔhana, n ntatɛ n zɛ vimiyi tɛttɔ kpai, akɨnti gbete n nta vimiyitɛ n zɛyi sɔ̃ntɛ, ɗajashonɛlapa au tasing vimiyi yɛ n nwesi au ɗekɨn, n kasiu bassinɛ. 9 Ama a gelin nɛ,<<Mɔkaa pɛlinɛ nankɔ! N pɛ jo jawɛrɛkɔ a mɔkɔni a mɛzɔyi janyagadiyini piti a shɔ gbeteyi gɨn ruu labeenɛmni kpai. Bassi Ɗalapa! 10 A gelin nɛ, <<Mokaa kukki ruu e janyagadiyi sha a labeenɛm nɛ, aruviya ɗaa ɓatɛ maani vim piti kpai yɛ pɛlitɔ. 11 Shɔ gbete pɛli vikɔ̃linɛ u yɛ ɗekɨn a vikɔ̃linɛ pɛlinɛni, shɔu pɛli kpantang u yɛ ɗekɨn a kpantang pɛlinɛni; shɔu pɛli vitɔ̃vɨng u yɛ ɗekɨn a vitɔ̃vɨng pɛlinɛni, shɔ gbeteu kɛ ɔ̃nɛ wɔsɔ-wɔsɔ ɔ̃tɛ kaa jazɨng akɔrɔ u yɛ ɗekɨn a ɔ̃nɛ wɔsɔ-wɔsɔni.>>

12 Yesɔ shanɛ,<<Weshopɛ, yɛ ɔ̃ ɓa dɔkɔkɔ ɓa n atɔǃ N yɛn n ti n kaatɔ, n ã kopiya jo nɔgbete pɛli vishonɛyɛ. 13 N kɔn ɔ̃rɛ gɨn-gɨn a sɔ̃sinɛ, gaanɛ au yisinɛni.>>

14 Ɗalapa u tasi shɔ gbeteyi sɔkiyi fãrã gbɛm tɛ tɛpɛ-tɛpɛ susãri a biini, i kaka ɗɔn i shaa nɔlaa a laa gbete ã suruyɛ, i sɔɔ nyajaa i to koomou rɛ. 15 Ama shɔ gbeteyi a koomo ɓili ikɔyi ɔ̃rɛ shɔ vizara pɛlinɛyi, shɔ vigãnki pɛlinɛyi, shɔ gbeteyi roo a shɔ soni ko a shɔ vɔshɔni, shɔ yuuvɔ nyonɛyi, shɔ gbeteyi bassi jaɗayi, shɔ nyayeenɛ a shanɛ a shonɛni.

16 <<N kɔng Yesɔ n shong ɗajashonɛlapa u gelɔɔ vimiyitɔ ɔ shɔ sisɨn ãnɛyi kpai. Nkɔng Dauda jawuru, n kɔng sɛgadi au kɔliyɛ.>>

17 Ɗa suru a su sɔɔ i shanɛ,<<Anɛ!>> ,

Kopiya au nta vim kpai ɔ̃tɛ kaka jazɨng a kɔrɔ u shanɛ,<<Anɛ!>> Anɛ

Shɔ gbeteu nta sutu yɛ, u anɛ; kɛ kasinɛyɛ u tɛ mi suru ãnɛ weze.

18 N kɔng Yɔhana n gɔ̃ kopiya yushoo, shɔ gbeteu kɛ nta ruu gbete janyagadiyi nwa a labeenɛm nɛ, kɛ pɔ̃ viwɔɔnɛ ɗɔn, Ɗalapa yɛ pɔ̃siu raaɓoonɛ gbete shɔ bee a labeenɛm ɗɔn. 19 Shɔ gbeteu kɛ zɔ̃ viwɔɔnɛ a vigbete janyagadiyi bee a labeenɛm nɛ, Ɗalapa yɛ zɔ̃ viwɔɔ jo ai nɔlaa gbete ã suru yɛ a shɔ koomo wɔsɔ-wɔsɔni, nagbete shɔ tasi a labeemkɔ.

20 Yesɔ shɔ gbeteu shi akɨnti vim kpai, shanɛ,<<Nizɛ! Yɛ ɔ̃ ɓa dɔkɔkɔ ɓa n atɔ!>>

Nankɔ. Anɛ, Uɓeyelapa Yesɔ! 21 Mɛnɛ Uɓeyelapa Yesɔ tɔ̃vɨn shonɛ u ɔ̃ a kopiyani.